Read Nzema Dan 7 Bible Online

Dan 7 - Nzema bible

Dan 7

¹Daneɛle hanle ɛlalɛ na ɔnwunle ɛnyelɛzodeɛnwunlɛ wɔ ɛvolɛ ko ne ala mɔɔ Babelɔn Belemgbunli Bɛlehyaza lile ebia ne la anu. Ɔhɛlɛle ɛlalɛ ne mɔɔ ɔnwunle ye la na ɔhanle ɔ muala.

²Ɔse, “Menwunle ye wɔ me ɛlalɛ ne anu wɔ nɔe ne kɛ anwoma vi aduduleɛ nee adɔleɛ, ɛbɔ nu nee nyiakɛ ɛlɛbɔ na yemaa nyevile kpole ne ɛlɛbegye.

³ Menwunle nane mgbole nna kɛ bɛvi nyevile ne anu bɛvinde, na asolo ko biala.

⁴ Mɔɔ lumua la zɔho awenade na ɔlɛ kɔleɛ ndɛbalɛ. Menwunle kɛ bɛdudule ɔ ndɛba ne mɔ, na bɛmanle ye zo bɛmanle ɔdwazole ɔgyinlanle ɔ gyakɛ nwiɔ azo kɛ sonla la, na bɛmanle ye sonla adwenle.

⁵“Nane ne mɔɔ tɔ zolɛ nwiɔ la zɔho ezizile. Bɛzɔle ye bɛdwazole ye. Ɛnee ɔlɛ sonla nvenle mbowule nsa ɔ gye nu, na bɛzele ye kɛ, ‘Dwazo, kɔ zolɛ di nane dɔɔnwo.’

⁶“Ɛhye anzi memanle me nye zo na menwunle kɛ nane bieko ɛvinde, yemɔ ɔzɔho sobolɛ, ɔlɛ anloma ndɛbalɛ nna gyigyi ɔ nzi, yɛɛ ɔ ti le nna; eza bɛmanle ye tumi.

⁷ “Ɛhye anzi, wɔ ɛlalɛ ko ne ala anu, menwunle nane bieko. Ɛhye tɔ zolɛ nna, ɔ nwo yɛ ɛzulolɛ, yɛɛ ɔ nwo yɛ se kpole kpalɛ. Ɔlɛ mbulalɛ egyele mɔɔ ɔfa ɔtete nane nu ɔbubu ye mbowule nu, na yeava ɔ gyakɛ yeatietia mɔɔ kɛha la azo. Nane ɛhye le ngakyile bɔkɔɔ tɛla alumua ɛdeɛ ne mɔ; ɔlɛ mɛne bulu.

⁸ Mɔɔ melɛnea mɛne ne mɔ kpalɛ la, menwunle kɛ mɛne ekyi bie ɛlɛfinde alumua mɛne ɛdeɛ ne mɔ avinli. Ɔdudule alumua mɛne ne mɔ nsa ɔguale. Na nea, mɛne ɛhye lɛ ɛnyelɛ nee ɛnloanlɛ kɛ sonla la na ɔlɛka mgbole.

⁹ “Meneanle la, menwunle kɛ bɛva arelemgbunli mbia bɛraziezie ɛkɛ. Sonla ne mɔɔ ɔvi tete ɛnee ɔwɔ ɛkɛ ne la radɛnlanle aze. Ye tɛladeɛ ne le nwohyee kɛ ezukɔtweaba, yɛɛ ɔ ti enrinli le kɛ boane enrinli. Ye ebia ne le kɛ senle mɔɔ ɛlɛsɔ gbolamgbolam la, yɛɛ ebia ne agyakɛ ehwili ne mɔ le senle.

¹⁰ Senle mɔɔ se kɛ azule la vi ebia ne anu finde. Menli apenle apenle zonlenle ye, yɛɛ menli apenle bulu mɔnwo apenle bulu gyigyi ɔ nyunlu ɛkɛ. Akee bɛdɛnlanle aze kɛ bɛdi edwɛkɛ na bɛbukebukele mbuluku ne mɔ anu.

¹¹“Me nye gyi ɛhye anwo la, mendele mgbole mɔɔ mɛne ne ɛlɛkeha la. Mekanlea la, menwunle kɛ bɛhu nane ne bɛzɛkye ye, na bɛvuandi ye bɛdo senle nu kɛ bɛyela ye.

¹²Bɛangu nane ne mɔ mɔɔ hale la, bɛliele bɛ belemgbunlililɛ tumi ne bɛ sa nu na bɛmanle bɛlile kenle ko nee ebule wɔ azɛlɛ ye azo.

¹³ “Wɔ nɔe ne ɛnyelɛzodeɛnwunlɛ ne anu, menwunle debie bie mɔɔ zɔho sonla ra la kɛ ɔlua amungu nu ɔlɛba, na ɔrale Tetenli ne anyunlu na bɛvale ye bɛhilele ye.

¹⁴ Bɛmanle ye ebialilɛ tumi, anyunlunyia, yɛɛ enililɛ, amaa aleɛabo maanle maanle mɔɔ ka aneɛ ngakyile la azonle ye. Ye belemgbunlililɛ ne ɛnlɛ awieleɛ, ɔnrɛpɛ nu ɔnrɛze ɛlɛ yɛɛ awie ɛnrɛhola ye sɛkye.

¹⁵“Ɛnyelɛzodeɛnwunlɛ ne mɔ yɛle me adwenleadwenle na menzulole.

¹⁶Membikyele menli mɔɔ gyigyi ɛkɛ la anu ko na membizale ye ninyɛne ɛhye mɔ abo. Yemɔti ɔhilele me ɔ bo na ɔhilehilele nu ɔhilele me.

¹⁷Ɔse, ‘Nane mgbole nna ɛhye gyi ɛkɛ maa arelemgbunli nna mɔɔ bara aleɛabo a.

¹⁸ Na Anwuma Anwumanli ne menli ne asa baha belemgbunlililɛ ne na yeayɛ bɛ ɛdeɛ mekɛ mɔɔ ɛnlɛ awieleɛ.’

¹⁹“Ɛnee mekulo kɛ menwu deɛ mɔɔ yemɔti nane ne mɔɔ tɔ zolɛ nna la le ngakyile bɔkɔɔ tɛla ɛhendeɛ ne mɔ la. Duzu ati a ɔ nwo yɛ ɛzulolɛ, ɔlɛ mbulalɛ egyele nee kɔbele ɛweɛlɛ mɔɔ ɔfa ɔtete nane na yeava ɔ gyakɛ yeatia mɔɔ kɛha la azo a?

²⁰Eza mekulo kɛ mete mɛne bulu ne mɔɔ gyigyi ɔ ti zo, mɛne ne mɔ mɔɔ nsa dudule guale aze, mɛne ekyi ne mɔɔ vile na ɔlɛ ɛnyelɛ nee ɛnloanlɛ kɛ sonla, na ɔhanle mgbole la anwo edwɛkɛ. Duzu ati a yemɔ ɔlɛ tumi ɔtɛla ɛhendeɛ ne mɔ a?

²¹ “Mekanwu ye la ɛnee nane mɛne ɛhye nee Anwuma Anwumanli ne menli ne ɛho na yeli bɛ nwo zo konim.

²² Akee Tetenli ne rale rabuale Anwuma Anwumanli ne menli ne benle; mekɛ ne dwule la maamulɛ ne zenle lile Nyamenle menli ne asa anu.

²³“Ɔhanle kɛ, ‘Nane ne mɔɔ tɔ zolɛ nna la kile kɛ maanle mɔɔ tɔ zolɛ nna la badwazo, mɔɔ bayɛ ngakyile wɔ maanle maanle mɔɔ wɔ ewiade la anu a. Ɔbali maanle maanle kɔsɔɔti anwo zo konim, na yeazɛkye bɛ.

²⁴ Mɛne bulu ne kile kɛ arelemgbunli bulu a babu maanle ɛhye a. Nzinlii belemgbunli ko bie badwazo. Asolo belemgbunli ɛhye, na ɔbaha arelemgbunli nsa yeagua.

²⁵ Ɔbadendɛ ɛtane ɛtane yeatietia Anwuma Anwumanli ne na yeayɛ Anwuma Anwumanli ne menli ne mɔ kpɔdekpɔde. Ɔbamia ɔ nwo kɛ ɔkakyi nyamenlezonlenlɛ mɛla ne nee nuhua ɛvoyia mekɛ ne mɔ. Yemɔ yɛɛ Nyamenle menli ne bahɔ ɔ bo ɛvolɛ nsa siane nsia a.

²⁶Na ndɛnebuavolɛ ne baradɛnla aze, abua ndɛne alie ye belemgbunlililɛ ne ɔ sa nu, na bɛabɔ ɔ bo zo bɔkɔɔ.

²⁷ Ewiade belemgbunlililɛ ne nee tumi kɔsɔɔti bapɛ ali Anwuma Anwumanli ne menli ne asa anu. Bɛ belemgbunlililɛ ne ɛnrɛbɔ aze ɛlɛ, yɛɛ maanle maanle kɔsɔɔti barazonle bɛ ayɛ tieyɛ amaa bɛ.’

²⁸“Edwɛkɛ ne awieleɛ ɛne. Na mame Daneɛle, ɔmanle ɛzulolɛ hanle me, na me adwenle zɛkyele, noko menvale edwɛkɛ ne menziele me ti anu.”