Read Nzema Dan 8 Bible Online

Dan 8 - Nzema bible

Dan 8

¹Mekɛ mɔɔ Belemgbunli Bɛlehyaza lile ɛvolɛ nsa wɔ ebia zo la, medame Daneɛle, menwunle ɛnyelɛzodeɛnwunlɛ bieko.

²Wɔ ɛnyelɛzodeɛnwunlɛ ne anu, menwunle kɛ ɛnee mewɔ Yilam maanzinli nu suakpole Susa azo, na megyi Azule Yulae anloa.

³Memanle me nye zo la, menwunle kɛ boane nyinli gyi azule ne anloa. Boane ne lɛ mɛne ndendenle nwiɔ, ko wale tɛla ko, na tendenle kpalɛ ne a nzinlii fifile a.

⁴Menwunle kɛ boane ne tudu kɔ adɔleɛ, sɔlɔ, yɛɛ nyiakɛ, nane biala ɛngola ɔ nyunlu gyinla, yɛɛ bie ɛnle ɛkɛ mɔɔ kola die debie fi ye tumi bo a; ɔyɛle mɔɔ ɔdaye ɔkulo la na ɔmemanle ɔ nwo zo.

⁵Me nye gyi ɛhye anwo melɛdwenle nwolɛ la, menwunle kɛ abɔnkye nyinli vi adɔleɛ ɛlɛba, na ɔ gyakɛ ɛnga aze; ɔlɛ mɛne ɛzulolɛ ko gyi ɔ ndo avinli.

⁶Ɔvale ye anwosesebɛ kɔsɔɔti nee ɛya kpole ɔdule hyee ɔrale boane nyinli ne, mɔɔ lɛ mɛne nwiɔ ne, mɔɔ menwu kɛ ɔgyi azule ne anloa la anwo zo.

⁷Menwunle kɛ yebikye boane nyinli ne na yeva ɛya kpole yezi ye yebubu ye mɛne nwiɔ ne. Boane nyinli ne angola abɔnkye nyinli ne anyunlu gyinla. Ɔzile ye ɔdole aze na ɔtietiale ɔ nwo zo. Nane biala angola anlie boane nyinli ne wɔ abɔnkye nyinli ne asa anu.

⁸Abɔnkye nyinli ne dule ɔ nloa anu kpole kpalɛ; na mɔɔ ye anwosesebɛ ne dwule aze kpole kpalɛ la, ye mɛne kpole ko ne bule na mɛne nna fifile ɔ bo zo ne. Mɛne nna ne, ko anye kɔ ɛbɔ nu, ko kɔ nyiakɛ, ko kɔ aduduleɛ, yɛɛ ko kɔ adɔleɛ.

⁹Mɛne ekyi bie vi mɛne ɛhye mɔ ko anu fifile; ɔfifile ɔyɛle kpole kpalɛ na ɔ nye kɔne nyiakɛ, aduduleɛ, yɛɛ anyunlunyia azɛlɛ ne anwo.

¹⁰ Ɔnyinle tendenle kpalɛ ɔdwule anwumaneamra anu, na ɔhanle nwɔlɔra ne mɔ bie ɔguale aze ɔtietiale bɛ nwo zo.

¹¹Ɔmemanle ɔ nwo zo wɔ anwuma ɛlɔnema Safohyenle ne bɔbɔ anyunlu. Ɔliele ye dahudahu ɛyelalɛ azubɔdeɛ ne ɔ sa nu, na ɔzɛkyele ye ɛleka nwuanzanwuanza ne.

¹²Kɛ menli kɛbɔ tenlene azu ɛkɛ ne la, bɛanyɛ ye zɔhane na bɛyɛle ɛtane. Bɛgyakyile nɔhalɛ ɛzonlenlɛ ne bɛdole aze na nane ne lile konim wɔ debie biala anu.

¹³Nzinlii mendele kɛ Nyamenle soanvolɛ ko ɛlɛtendɛ na ko ɛlɛbiza ye kɛ, “Kenlenzu, mekɛ ne boni yɛɛ dahuu ɛyelalɛ azubɔdeɛ ne, mɛladonlɛ mɔɔ maa debie biala yɛ mgbane, yɛɛ ɛleka nwuanzanwuanza ne nee nuhua menli ne anwo zo ɛtietialɛ ɛnyelɛzodeɛnwunlɛ ne kɛgua a?”

¹⁴Ɔbuale ye kɛ, “Ɔbava kenle kɔkɔlɛ apenle ko ɛya ko abulanlu na ɛleka nwuanzanwuanza ne azia agyinla ye gyinlabelɛ dɛba ne.”

¹⁵Mɔɔ ɛnee medame Daneɛle melɛdwenle kɛ ɔkɛyɛ na meade ɛnyelɛzodeɛnwunlɛ ne abo la, mɔɔ arɛlevilɛ nu menwunle ye la a le kɛ, debie bie mɔɔ le kɛ sonla la gyi me nyunlu ɛkɛ.

¹⁶ Na mendele ɛnelɛ bie wɔ Azule Yuleeyae ne anloa, ɔse, “Geebeleɛle, kile nrenya ɛhye ɛnyelɛzodeɛnwunlɛ ne abo.”

¹⁷Yemɔti Geebeleɛle ragyinlanle me nwo ɛkɛ; ɔrale la me ahonle dule na membutule mutule nu. Na ɔzele me kɛ, “Sonla ra, te ɔ bo kɛ ɛnyelɛzodeɛnwunlɛ ne kile kɛ ewiade bazi ara awieleɛ la.”

¹⁸Mɔɔ mebutu ɔ nyunlu ɛkɛ ne mutule nu na ɔlɛtendɛ yeahile me la, meannwu ɛleka mɔɔ mengale ye bieko a. Na ɔzɔle me ɔdwazole me ɔgyinlanle.

¹⁹Ɔzele me kɛ, “Mekile wɔ ninyɛne mɔɔ basisi awieleɛ mekɛ ne, kɛmɔ ɛnyelɛzodeɛnwunlɛ ne kile la.

²⁰“Boane ne mɔɔ ɛnwunle ye kɛ ɔlɛ mɛne nwiɔ ne la gyi ɛkɛ maa Midia nee Pɛhyea arelemgbunli ne mɔ.

²¹Abɔnkye nyinli ne gyi ɛkɛ maa Gilisi belemgbunli ne, yɛɛ mɛne totohyia ne mɔɔ gyi ɔ ndo avinli la kile maanle ne belemgbunli ne mɔɔ lumua la.

²²Mɛne nna ne mɔɔ fifile ko ne mɔɔ dule la abo zo ne la kile kɛ arelemgbunli maanle nna badwazo maanle ko ne ala anu na bɛ nwo ɛnrɛyɛ se kɛ alumua maanle ne la.

²³“Saa arelemgbunli ɛhye mɔ di bɛ ebia ne toonwo na bɛ belemgbunlililɛ ne ɛlɛba awieleɛ, mɔɔ mɛladonlɛma kɔpo ne ɛwie yi la, belemgbunli bie badwazo, na yemɔ, ɔnzulo ɛhwee, yɛɛ ɔte agyiba biala abo.

²⁴Ɔbayɛ belemgbunli mɔɔ ye tumi le kpole yɛɛ ɔbazɛkye ninyɛne dɔɔnwo. Ye debie biala bayɛ boɛ amaa ye, yɛɛ ɔbazɛkye menli mgbole nee Nyamenle menli ne.

²⁵Kɛmɔ ɔ nwo yɛ ɛvɛlɛ la ati, ɔbamaa adalɛ alie ebia wɔ ye mekɛ zo. Ɔ ti akunlu bayɛ ye fɛ yeamaa yeamemaa ɔ nwo zo. Ɔnrɛbɔ menli kɔkɔ na yeava konle yeadoa bɛ. Ɔbamia ɔ nwo bɔbɔ yeava konle yeadoa arelemgbunli Belemgbunli ne. Noko awie ɛnrɛva ɔ sa ɛnrɛha ye bɔbɔ na yeakpo aze.

²⁶Aledwolɛ nee alehyenlɛ ɛnyelɛzodeɛnwunlɛ ɛhye mɔɔ wɔnwu ye la bayɛ zɔhane, noko mmabɔ ye nolo kɛkala na mekɛ tɛbɔ nu kpalɛ.”

²⁷Na medame Daneɛle, debie dɔle me nwo zo, ɔyɛle me anwondolɛ mekɛ dɔɔnwo. Nzinlii mendele kpɔkɛ na mendwazole mengɔle me gyima zo wɔ belemgbunli sua nu. Na ɛnyelɛzodeɛnwunlɛ ne manle me nwo bubule me, meande ɔ bo.