Read Nzema Dan 9 Bible Online

Dan 9 - Nzema bible

Dan 9

¹Midianli Dalayɛse, Atazɛzɛse ara nrenya ne lile belemgbunli wɔ Babelonia.

² Ɔlile ebia ne la ye ɛvolɛ ne mɔɔ lumua la ala anu, medame Daneɛle mɔɔ ɛnee melɛneɛnlea mbuluku nwuanzanwuanza ne mɔ anu na melɛdwenledwenle mɔɔ Ɛdɛnkɛma ɛlua Nyamenle kpɔmanvolɛ Gyɛlɛmaya anwo zo ɛha ɛdo ɛkɛ ne la, mendele ɔ bo kɛ Gyɛlusalɛm babɔ toonwo ɛvolɛ abulasuu.

³Mengyele ɛhɔne, mengedale ɛrele, membɔle nzonle na membodole menzɛlɛle Awulae Nyamenle.

⁴Menzɛlɛle Ɛdɛnkɛma me Nyamenle ne na menganle me nee me menli ne ɛtane ne mɔ mendole gua. Mese: “O Awulae, Nyamenle Bedevinli anwo ɛzulolɛ mɔɔ di wɔ ngyekyeleɛ zo na ɛkile wɔ ɛhulolɛ kpundii ne wɔ menli mɔɔ kulo wɔ, na bɛdi wɔ mɛla nee wɔ ngyehyɛlɛ ne mɔ azo la anwo zo a,

⁵yɛyɛ ɛtane yɛtia wɔ, yɛyɛ mɔɔ bɛnyɛ la. Yɛyɛ amumuyɛ, yɛde atua na yɛhakyi yɛ nzi yɛzi wɔ mɛla ne nee wɔ ngyehyɛlɛ ne mɔ.

⁶Yɛandie wɔ sonvolɛ kpɔmanvolɛma ne mɔ ane. Bɛluale wɔ duma nu bɛbɔle edwɛkɛ ne nolo bɛhilele yɛ arelemgbunli, yɛ maanlebuvolɛma, yɛ ze mɔ, yɛɛ maanlema kɔsɔɔti.

⁷Wɔmɔ, O Awulae, dahuu ɛyɛ mɔɔ le tenlene la, na yɛmɛ, ɛnɛ nee ɛnɛ ala, yɛtɛgua yɛ nyunlu aze, yɛdayɛ mɔɔ yɛwɔ Dwuda la o, yɛdayɛ mɔɔ yɛwɔ Gyɛlusalɛm la o, bɛnye bie. Zɔhane ala yɛɛ Yizilayɛma kɔsɔɔti, bɛdabɛ mɔɔ bɛwɔ sua nu nee bɛdabɛ mɔɔ ɔlua bɛ nyɛleɛ ɛtane mɔɔ bɛyɛ bɛtia wɔ la ati wɔkponde bɛ maanle maanle zo la de a.

⁸O Awulae, yɛdayɛ, yɛ arelemgbunli, yɛ maanlebuvolɛma, yɛɛ yɛ ze mɔ ɛbɔ anyiemgba, ɔboalekɛ yɛyɛ ɛtane yɛtia wɔ.

⁹O Awulae yɛ Nyamenle, yɛvo wɔ, yɛde ɛ nwo atua, noko wɔmɔ ala a ɛse anwunvɔne na ɛfa ɛtane ɛkyɛ a.

¹⁰Yɛanli wɔ mɛla ne mɔ mɔɔ ɛluale wɔ sonvolɛma, Nyamenle kpɔmanvolɛma anwo zo ɛvale ɛmanle yɛ la azo.

¹¹Yizilayɛma kɔsɔɔti ɛdo wɔ mɛla ne, bɛhakyi bɛ nzi bɛzi wɔ, na bɛkpo kɛ bɛnrɛdie ɛ ne. Ɔlua zolɛ munzule ne nee ndane ne mɔ mɔɔ bɛhɛlɛ wɔ wɔ sonvolɛ Mosisi Mɛla ne anu la ɛha yɛ, ɔboalekɛ yɛyɛ ɛtane yɛtia wɔ.

¹²Ninyɛne mɔɔ ɛzele kɛ ɛbava wɔayɛ yɛ nee yɛ mgbanyima mɔɔ sie yɛ la ɛyɛ zɔhane ɛmaa munzule mɔɔ ɛdo yɛ la ɛyɛ totohyia, ɔluakɛ mɔɔ ɛzi Gyɛlusalɛmma anwo zo la, bie ɛtɛsile ewiade ye anu ɛleka biala.

¹³Kɛmɔ bɛhɛlɛ ye wɔ Mosisi Mɛla buluku ne anu la, munzule ɛhye mɔ amuala ɛra yɛ nwo zo, noko yɛtɛkpale Ɛdɛnkɛma yɛ Nyamenle ne kyɛlɛ, yɛtɛgyakyile ɛtane ɛyɛlɛ, yɛɛ yɛtɛkpondɛle wɔ nɔhalɛ adenle ne.

¹⁴Zɔhane ati, Ɛdɛnkɛma, wɔboɔboa wɔmaa munzule ne ɛdo yɛ, ɔluakɛ wɔmɔ Ɛdɛnkɛma yɛ Nyamenle, ɛyɛ mɔɔ le tenlene la, na yɛmɛ, yɛndie ɛ ne.

¹⁵“O Awulae yɛ Nyamenle, mɔɔ ɛvale wɔ tumi kpole ne ɛyele wɔ menli ne ɛvile Yigyibiti, na wɔlie duma wɔmaa ɛ nwo toonwo a yeradwu ɛnɛ la, yɛyɛ ɛtane, O Awulae, yɛyɛ amumuyɛ mɔɔ bɛnyɛ a.

¹⁶Dua wɔ tenlene adenle ne azo ye wɔ ɛya ne wɔ suakpole Gyɛlusalɛm, wɔ boka nwuanzanwuanza ne azo, ɔluakɛ yɛ ɛtane ne nee yɛ ze mɔ amumuyɛ ne mɔ ati, Gyɛlusalɛm nee wɔ menli ne ɛnɛ ɛyɛ ɛfenle mɔɔ la akɔlɛ nee anloma nloa a.

¹⁷Yemɔti, O yɛ Nyamenle, tie wɔ sonvolɛ, me nzɛlɛlɛ nee me modolɛ, na ɔlua wɔ duma ne ati, kakyi ɛ nye wɔ wɔ Ɛzonlenlɛ Sua ye mɔɔ bɛzɛkye ye la anwo.

¹⁸O me Nyamenle, gyele ɛ nzo tie yɛ. To ɛ nye nea mgbane mɔɔ yɛyɛ, nee suakpole ye mɔɔ bɛfa wɔ duma bɛfɛlɛ ye la, ɔluakɛ tɛ yɛ tenleneyɛlɛ ti yɛɛ yɛlɛbodo yɛazɛlɛ wɔ a, na wɔ anwunvɔnezelɛ kpole ne ati ɔ.

¹⁹O Awulae, tie yɛ; O Awulae fa yɛ ɛtane kyɛ yɛ; O Awulae, tie yɛ na keha ɛ nwo. Wɔ duma ne ati, O me Nyamenle, mmasi aze, ɔboalekɛ bɛfa wɔ duma a bɛfɛlɛ wɔ suakpole ne nee wɔ menli ne a.”

²⁰Mekɛ mɔɔ megua zolɛ melɛka me ɛtane nee Yizilayɛma kɔsɔɔti ɛtane, na melɛbodo meazɛlɛ Ɛdɛnkɛma me Nyamenle ne wɔ me Nyamenle ne boka nwuanzanwuanza ne ati la,

²¹ Geebeleɛle mɔɔ alumua ne menwunle ye wɔ me ɛnyelɛzodeɛnwunlɛ ne anu la, rale me nwo ɛkɛ ne ndɛndɛ wɔ nɔsolɛ nu azubɔlɛ mekɛ ne.

²²Na ɔzele me kɛ, “O Daneɛle, mera kɛ mebɛlɛ wɔ nrɛlɛbɛ nee ndelebɛbo.

²³Ɛbɔle ɔ bo kɛ ɛyɛ wɔ modolɛ nzɛlɛlɛ ne ala la yɛɛ Nyamenle diele wɔ a, na mera kɛ mebaha meahile wɔ, ɔluakɛ ɔkulo wɔ kpole. Yemɔti tie na te wɔ ɛnyelɛzodeɛnwunlɛ ne abo.

²⁴“Ɛnyelɛzodeɛnwunlɛ ne kile kɛ wɔ menli Yizilayɛma bava ɛvolɛ ɛya nna abulahɔnla (ɛvolɛ abulasuu fane nsuu) a alie bɛ nwo nee bɛ suakpole ne wɔ ɛtane nee munzule nu, bɛayɛ bɛ ɛtane nwo mgbɔdalɛ nzɛlɛlɛ na bɛali pɛlepɛle dahuu a, amaa ɛnyelɛzodeɛnwunlɛ ne nee Nyamenle nrɛlaleɛ ne ali munli, na bɛadu Ɛzonlenlɛ Sua ne bɛamaa Nyamenle bieko.

²⁵Yɛ edwɛkɛ ɛhye nzonlɛ na nyia nwolɛ ndelebɛbo kɛ ɔvi mekɛ mɔɔ bɛkɛha Gyɛlusalɛm ɛkyekyelɛ bieko anwo edwɛkɛ ne mɔɔ kɔdwu sonla ne, belemgbunli bie, mɔɔ bɛkpa nu bɛye ye na bɛkpokpa ye nwole la ɛralɛ mekɛ zo la, bayɛ ɛvolɛ nsuu fane nsuu. Bɛbava ɛvolɛ nsuu fane abulasia nee nwiɔ a bɛakyekye Gyɛlusalɛm fofolɛ, bɛadudu ye gua na bɛasisi ye aranemgbole ne mɔ a, na mekɛ ɛhye bayɛ amaneɛnwunlɛ mekɛ.

²⁶Mekɛ zɔhane anzi bɛbahu sonla ne mɔɔ bɛkpokpa ye nwole la atisesebɛ nu. Na belemgbunli holɛ ko ne mɔɔ bara la ɛlɔnema ne bazɛkye suakpole ne nee ɛleka nwuanzanwuanza ne. Ye awieleɛ bara kɛ azuyilɛ na nzinlii yeawie konle. Ninyɛne dɔɔnwo bazɛkye, kɛmɔ Nyamenle ɛhyehyɛ la.

²⁷ Ɔ nee menli dɔɔnwo bayɛ ngyekyeleɛ ketekete ɛvolɛ nsuu, na ɛvolɛ nsuu ne foa ko, ɔbadua azubɔlɛ nee azubɔdeɛ ɛvalɛ. Bɛbava ‘Munzudeɛ ne mɔɔ bɔ Maanle’ la bɛazie Ɛzonlenlɛ Sua ne ɛleka mɔɔ wɔ anwuma kpalɛ kpalɛ la. Ɔbawoa ɛkɛ yeahɔdwu mekɛ mɔɔ ahenle mɔɔ vale ziele ɛkɛ ne la anye kɛpe ɔ bo, kɛmɔ Nyamenle ɛhyehyɛ ɛzie ɛkɛ ɛmaa ye la.”