Read Nzema Hoz 11 Bible Online

Hoz 11 - Nzema bible

Hoz 11

¹ Ɛdɛnkɛma se, “Mɔɔ Yizilayɛ le kakula la, mengulole ye, na menvɛlɛle me ra nrenya ne menvile Yigyibiti.

²Na fane dɔɔnwo mɔɔ menvɛlɛle ye la, fane dɔɔnwo ɔhwenle ɔ nwo ɔvile me nwo. Me menli ne bɔle azu manle awozonle Beeyale ne mɔ na bɛkpunle ɛyɛlɛ bɛmanle mmonle.

³Noko medame yɛɛ mengilele Yifelaemma ɛdialɛ a; mendedɛle bɛ me sa zo, noko bɛnze kɛ medame a meneanle bɛ a.

⁴Menvale ahunlunyeleyɛlɛ nee ɛhulolɛ menlile bɛ ti, menyele bɛ kɔme kpomgbolo, na membutule memanle bɛ aleɛ.

⁵“Bɛkpole kɛ bɛnrɛzia bɛnrɛra me nwo bieko, yemɔti bɛbazia bɛahɔ Yigyibiti, na Aselea bazie bɛ.

⁶Konle bava bɛ azuamgbole ne mɔ aze, abubu bɛ azuamgbole nlenkɛ mgbole ne mɔ.

⁷Me menli ne gyi zolɛ ɛsesebɛ kɛ bɛte bɛ nwo bɛavi me nwo. Yemɔti bɛva kpomgbolo bɛgua bɛ kɔme, na bɛnrɛnyia awie ɛnrɛye ɛnrɛmaa bɛ.

⁸ “O Yifelaem, kɛ ɔyɛ mɔɔ ɔwɔ kɛ meye wɔ memaa ɛ? O Yizilayɛ, kɛ ɔyɛ mɔɔ ɔwɔ kɛ meye wɔ memaa ɛ? Asoo ɔwɔ kɛ mesɛkye wɔ kɛ menzɛkyele Adema la? Kɛ ɔyɛ mɔɔ ɔwɔ kɛ meyɛ wɔ kɛ menyɛle Zɛboyem la ɛ? Me ahonle ɛndie me! Me kunlu yelɛyela me kpole wɔ ɛ nwo.

⁹Menrɛva me ɛya kpole ne menrɛgua ɛ nwo zo, menrɛzɛkye Yifelaem, ɔluakɛ mele Nyamenle, menle sonla. Medame a mele Nwuanzanwuanza Ko ne mɔɔ nee wɔ de la, menrɛra kɛ mebazɛkye wɔ.

¹⁰“Saa metea me menli ne kpɔvolɛma ne mɔ nu kɛ awenade a, me menli ne akee badoa me bo zo. Saa metea nu a bɛbava anwowozolɛ bɛvi adɔleɛ bɛara.

¹¹Bɛvi Yigyibiti bɛbava anwowozolɛ bɛara ndɛndɛ kɛ nloma la, yɛɛ bɛvi Aselea bɛbara kɛ abubule. Mebava bɛ meazia meahɔ bɛ azua nu. Medame, Ɛdɛnkɛma a mese a.”

¹²Ɛdɛnkɛma se, “Yifelaem ɛva adalɛ ngome ɛbɔ ɛyia me, yɛɛ Yizilayɛma noko le mɛlɛbɛla. Na Dwuda ɛdeɛ, Nyamenle ze ye, yɛɛ ɔdi nɔhalɛ ɔmaa Nwuanzanwuanza Ko ne.