Read Nzema Hoz 12 Bible Online

Hoz 12 - Nzema bible

Hoz 12

¹“Debie biala mɔɔ Yifelaem yɛ, ɔvi nwonlomɔ mɔɔ kɔdwu nɔsolɛ la le mgbane na ɔsɛkye ninyɛne. Bɛbɔ adalɛ mɔnwo na bɛka konle. Bɛ nee Aselea yɛ ngyehyɛlɛ na bɛfa nwole bɛkɔ Yigyibiti.”

²Ɛdɛnkɛma lɛ edwɛkɛ tia Dwuda; ɔbadea Gyekɔbo abo zo amra ne mɔ wɔ bɛ nyɛleɛ ne mɔ anwo. Ɔbadua bɛ kakɛ wɔ mɔɔ bɛyɛ la anwo.

³ Bɛ nlenya Gyekɔbo nee ɔ diema Yisɔ pelele wɔ mekɛ mɔɔ bɛwɔ bɛ nli akunlu la; na Gyekɔbo zɔle ɔ diema ne agyakɛ wɔ bɛ awolɛ nu; mɔɔ Gyekɔbo nyinle la, ɔ nee Nyamenle pelele.

⁴ Ɔ nee Nyamenle soanvolɛ ne pelele na ɔlile konim. Ɔzunle na ɔbizale ye nyilalɛ. Ɔyiale Nyamenle wɔ Bɛtɛle na ɛkɛ ne, Nyamenle nee ye dendɛle.

⁵Ɛhye a le Tumivolɛ Ɛdɛnkɛma Nyamenle ne, ye duma a le Ɛdɛnkɛma.

⁶Yemɔti, Gyekɔbo abo zo amra, bɛ Nyamenle ne moalɛ ti, bɛzia bɛrɛla na bɛzɔ ɛhulolɛ nee pɛlepɛlelilɛ nu kpundii na bɛhendɛ bɛ Nyamenle ne dahuu.

⁷Ɛdɛnkɛma se, “Gualilɛnli mɔɔ lɛ tone ɛtane ɔ sa nu la kulo kɛ ɔdi ye ɛdɔvolɛma nzisi.

⁸Yifelaemma ɛha kɛ: Aa, yɛnyia yɛ nwo; yɛdu ahu! Noko bɛ anyiabɛnwo ne ɛnrɛhola ɛtane ne mɔ mɔɔ bɛyɛ la anwo kakɛ tua ɛlɛ.

⁹ Medame a mele Ɛdɛnkɛma bɛ Nyamenle ne mɔɔ menyele bɛ menvile Yigyibiti la, mebamaa bɛadɛnlɛdɛnla ndanlɛ azua nu bieko, kɛmɔ ɛvoyialilɛ ne dwu zo a bɛyɛ la.

¹⁰“Mendendɛle mengilele me kpɔmanvolɛma ne mɔ, na memanle bɛnwunle ɛnyelɛzodeɛnwunlɛ dɔɔnwo, na menluale me kpɔmanvolɛma ne anwo zo membule bɛ ɛrɛlɛ.

¹¹Saa ninyɛndane bie tɛbɔ Geleade a, zolɛ ɛnrɛra nvasoɛ biala. Saa bɛfa nlankɛ nyinli bɛbɔ azu wɔ Gelegale a, azukponle ne mɔ mɔɔ wɔ ɛkɛ la bayɛ awolɛ edukue wɔ ɛya nu kofie ne mɔ avinli.”

¹² Yɛ nlenya Gyekɔbo nriandile hɔle Mɛsɔpɔteemea, na ɔyɛle gyima, na raalɛ ti ɔnleanle mboane ɔvale ɔgyale raalɛ.

¹³ Ɛdɛnkɛma zoanle Nyamenle kpɔmanvolɛ manle ɔhɔyele Yizilayɛma ɔvile Yigyibiti na ɔnleanle bɛ gyɛlɛɛnye.

¹⁴Yifelaemma ɛmaa Ɛdɛnkɛma ɛva ɛya kpole kpalɛ, yemɔti Ɛdɛnkɛma bamaa bɛ munzule ɛbɛla ne abɔ bɛ ti. Ɛdɛnkɛma bamaa anyiemgba mɔɔ bɛbɔ ye la abu azia bɛ.