Read Nzema Hoz 4 Bible Online

Hoz 4 - Nzema bible

Hoz 4

¹O Yizilayɛma, bɛdie Ɛdɛnkɛma edwɛkɛ ne, ɔluakɛ Ɛdɛnkɛma lɛ edwɛkɛ tia bɛdabɛ mɔɔ bɛde azɛlɛ ne azo la. Ɔse, “Bɛnli nɔhalɛ anzɛɛ bɛnyɛ atiakunlukɛnlɛma yɛɛ bɛnlɛ Nyamenle anwo adwenle biala wɔ azɛlɛ ne azo.

²Bɛka ndane, bɛbɔ adalɛ, bɛku menli, bɛwua, yɛɛ bɛto awuvolɛvalɛ mɛla ne. Bɛdɛla anhwe yɛɛ menli ala a bɛku a.

³Yemɔti azɛlɛ ne bayɛ resee yɛɛ debie biala mɔɔ wɔ zolɛ la bawu. Ɛbɔ nu nane kɔsɔɔti, anwomanyunlu nloma kɔsɔɔti, nyevile nu fɛlɛ bɔbɔ, bɛ muala bɛbawu.”

⁴Ɛdɛnkɛma se, “Awie biala mmasu ɛhye anwo kpolera, yɛɛ awie biala mmato menli ne ɛzonle; ɔluakɛ bɛmɛ sɛlɛvolɛma bɔbɔ yɛɛ me nee bɛ lɛ edwɛkɛ a.

⁵Bɛbadu koti alehyenlɛ nu, yɛɛ Nyamenle kpɔmanvolɛma ne noko nee bɛ badu koti aledwolɛ nu, na mebazɛkye bɛ nli ne.

⁶Me menli ne ɛnlɛ adwenle la ati bɛzɛkye bɛ; kɛmɔ bɛkpo adwenlenubukelɛ la ati, medame noko mekpo bɛ kɛ bɛnle me sɛlɛvolɛma bieko, yɛɛ kɛmɔ bɛ rɛle ɛvi bɛ Nyamenle ne mɛla ne la, medame noko me rɛle bavi bɛ mra.

⁷“Mekɛ mɔɔ bɛ nwo ɛlɛso la, mekɛ mɔɔ ɛnee bɛlɛyɛ ɛtane dɔɔnwo bɛatia me la ɛne, yemɔti mebamaa bɛ enililɛ ahakyi anyiemgba.

⁸Bɛdidi me menli ne ɛtane nwo, bɛyɛ adidikpoku wɔ me menli ne ɛtaneyɛlɛ nwo.

⁹Mɔɔ mebava meayɛ me menli ne la, zɔhane ala a mebava meayɛ sɛlɛvolɛma ne mɔ a. Mebadea bɛ na meadua bɛ kakɛ wɔ bɛ nyɛleɛ ne mɔ anwo.

¹⁰Bɛbali, na bɛ ko ɛnrɛyi. Bɛbali awozonle ɛzonlenlɛ nu tuutuu kɛ bɛkɛwo mralɛ dɔɔnwo na bɛnrɛwo mralɛ, ɔboalekɛ bɛhakyi bɛ nzi bɛzi medame Ɛdɛnkɛma, na bɛdoɔdoa nyamenle gyɛne gyɛne.”

¹¹Ɛdɛnkɛma se, “Nwanye, dɛba o, fofolɛ o, sɛkye me menli ne ndelebɛbo!

¹²Bɛkɔ baka dosinli nwo abisa yɛɛ bɛdabɛ bɛ kpɔma bɔbɔ bɔ bɛ munzule. Ɔluakɛ tuutuulilɛ sunsum ɛva bɛ ɛminli, ɛmaa bɛgyakyi bɛ Nyamenle ne ɛzonlenlɛ na bɛlɛdi awozonlezonlenlɛ nu tuutuu. Bɛbɔ azu wɔ awoka mgbole zo na bɛfa bɛ azubɔdeɛ bɛkɔ awoka ngyikyi ne mɔ azo, yɛɛ

¹³mbaka ndendenle ɛsesebɛ bubuzuu bo, ɔboalekɛ bɛ alubo ne mɔ anu yɛ anyelielɛ. “Yemɔti bɛ mra mraalɛ bɔ awozonlezonlenlɛ nu tuutuu ɛbɛla na bɛ mra mrenya aye mɔ to awuvolɛvalɛ mɛla ne.

¹⁴Noko saa bɛ mra mraalɛ ne mɔ bɔ awozonlezonlenlɛ nu tuutuu ɛbɛla na bɛ mra mrenya ne mɔ aye mɔ to awuvolɛvalɛ mɛla ne a, menrɛdea bɛ, ɔluakɛ mrenya ne mɔ bɛdabɛ bɛfa ahane bɛkɔfa tuutuuma yɛɛ bɛ nee awozonle ɛzonlenlɛ nu tuutuuma bɔ nu bɔ azu. Bɛle menli mɔɔ ɛnlɛ ndelebɛbo a, na bɛbazɛkye bɛ noko.

¹⁵“Saa bɛmɛ Yizilayɛma, bɛbɔ tuutuu ɛbɛla a, Dwudama ɛnli nwolɛ fɔlɛ. Bɛmmakɔ Gelegale anzɛɛ Bɛteevɛn kɛ bɛkazonle, yɛɛ bɛmmafa ‘Tease Ɛdɛnkɛma’ duma bɛka ndane.

¹⁶Yizilayɛma anzo yɛ se kɛ mgbɔnwɔndua. Kɛ ɔkɛyɛ na meamaa bɛ aleɛ kɛ mboane mralɛ mɔɔ wɔ adidileka mɔɔ le tɛtɛlɛ la ɛ?

¹⁷Awozonlezonlenlɛ ɛgya Yizilayɛma;[6] bɛgyakyi bɛ.

¹⁸Nzabovoma akpolane mɔɔ anye die tuutuulilɛ nwo a. Bɛkulo anyiemgba bɛtɛla anyunlunyia.

¹⁹Anwonyia ɛpia bɛ ɛhɔ, na bɛ awozonle azubɔlɛ ne mɔ ati, anyiemgba baha bɛ.