Read Nzema Hoz 5 Bible Online

Hoz 5 - Nzema bible

Hoz 5

¹“Bɛdie edwɛkɛ ɛhye, bɛmɛ sɛlɛvolɛma! Bɛyɛ ɛnzonlɛ, bɛmɛ Yizilayɛma! Bɛdie, bɛmɛ arelemgbunli! Ɔluakɛ ndɛnebualɛ ne gyi bɛ nwo zo. Ɔluakɛ bɛyɛ bɛ nwo kɛ ngane wɔ Mezepa, bɛyɛ kɛ avonle mɔɔ bɛdo wɔ Teebɔ Boka ne azo la,

²bɛpɛ kuma kuloonwu wɔ suakpole Akasea[7] azo, yɛɛ menli ala a bɛku a; mebadea bɛ kɔsɔɔti.

³Meze Yifelaem, yɛɛ Yizilayɛ ɛnvea me nye zo. Na kɛkala, wɔmɔ Yifelaem, wɔbɔ tuutuu ɛbɛla, evinli ɛha Yizilayɛ.”

⁴Bɛ nyɛleɛ ɛtane ne mɔ ɛmmaa bɛngola bɛnzia bɛngɔ bɛ Nyamenle ne ɛkɛ. Ɔluakɛ tuutuulilɛ sunsum ne wɔ bɛ nu, yɛɛ bɛnze Ɛdɛnkɛma.

⁵Yizilayɛma mgbanyizonle ne di daselɛ tia bɛ. Bɛ ɛtane ne mɔ bamaa Yifelaem nee Yizilayɛ adu koti. Dwudama noko nee bɛ a badu koti ne a.

⁶Bɛbava bɛ mboane nee bɛ nlankɛ bɛabɔ azu bɛakpondɛ Ɛdɛnkɛma, na bɛnrɛnwu ye, ɔluakɛ yehwe ɔ nwo yevi bɛ nwo.

⁷Bɛanli nɔhalɛ bɛammaa Ɛdɛnkɛma, ɔluakɛ bɛwo nyɛvolɛ mralɛ. Yemɔti siane fofolɛ ɛvoyialilɛ ne bazɛkye bɛ nee bɛ azɛlɛ ne kɔsɔɔti.

⁸Bɛwu konle aweɛne ndendenle ne mɔ anu wɔ Gebɛya! Bɛbɔ nolo ne wɔ Releema! Bɛbɔ bubu wɔ Bɛteevɛn.[8] Bɛli bɛ nzi, Bɛngyaman asa azo!

⁹Kenle ne ɛlɛba, na bɛbazɛkye Yifelaem maanle ne. Yizilayɛma, nɔhalɛ nu, ɛhye bazi!

¹⁰Ɛdɛnkɛma se, “Dwuda arelemgbunli ɛyɛ bɛ nwo menli mɔɔ di azɛlɛ zo ɛweɛne tukpɔnla a. Yemɔti mebawola me ɛya ne meagua bɛ nwo zo kɛ nzule la.

¹¹Yifelaem ɛlɛnwu amaneɛ wɔ ndeanlɛ nu, ɔboalekɛ yebɔ kpɔkɛ kɛ debie mgbane ala yɛɛ ɔdi ɔ nzi a.

¹²Yemɔti mebayɛ me nwo ɛlɛtɛba meazɛkye Yizilayɛ na meayɛ kɛ nrɛnlana meamaa Dwudama ayɛ mgbane.

¹³“Mɔɔ Yifelaem nwunle kɛ anwonyane ɛbɔ ye na Dwuda noko nwunle kɛ ɔdaye mumua ne yedudu nganlɛ la, Yifelaem hɔle Aselea maanle maanle belemgbunli ne ɛkɛ kɛ ɔkabiza ye moalɛ, noko Aselea angola anyɛ bɛ nee bɛ nganlɛ ne mɔ ayile.

¹⁴Mebateta Yifelaem kɛ awenade na meateta Dwuda kɛ awenade ralɛ. Medame mumua ne mebatete bɛ nzokanzoka na meagyakyi bɛ meahɔ. Saa me nee bɛ ɛlɛkɔ a, awie biala ɛnrɛhola bɛ die.

¹⁵“Mebahwe me nwo meavi menli ne anwo kɔkpula mekɛ mɔɔ bɛkɛnwu bɛ ɛtane mɔɔ bɛyɛ, na wɔ bɛ amaneɛnwunlɛ ne anu, bɛkɛkpondɛ me bo zo la.”