Read Nzema Hoz 6 Bible Online

Hoz 6 - Nzema bible

Hoz 6

¹Menli ne baha kɛ, “Bɛmaa yɛzia yɛdoa Ɛdɛnkɛma! Yemaa yɛnwu amaneɛ ɛdeɛ, noko ɔbayɛ yɛ ayile; yebodɛboda yɛ ɛdeɛ, noko ɔbayɛ yɛ nganlɛ ne mɔ ayile.

²Kenle nwiɔ ne azo ɔbamaa yɛabɔzɔbɔzɔ, na ye kenle nsa ne azo yeadwazo yɛ, na yɛadɛnla ngoane nu.

³Bɛmaa yɛbɔ mɔdenle yɛnwu Ɛdɛnkɛma. Nɔhalɛ, ye ɛralɛ ɛnli mgbanwo, kɛmɔ alehyenlɛ ɛnli mgbanwo la. Ɔbara kɛ nyenyensuo nyenye doɔloa azɛlɛ ye la.”

⁴Na Ɛdɛnkɛma se, “O Yifelaemma, kɛ menyɛ bɛ ɛ? O Dwudama, kɛ menyɛ bɛ ɛ? Me nwo ɛhulolɛ mɔɔ bɛlɛ la le kɛ nwonlomɔ amungu, ɔle kɛ nwonlomɔ ɛbɔlɛ, ɔngyɛ na yeawe.

⁵Yemɔti memaa me kpɔmanvolɛma ɛpɛ bɛ ɛgua. Meva me nloa edwɛkɛ mehu bɛ, yɛɛ me ndɛnebualɛ ne le wienyi;

⁶ ɔluakɛ mekpondɛ ɛhulolɛ kpundii, na tɛ nane azubɔlɛ ɔ. Mekulo kɛ bɛnwu Nyamenle bɛtɛla ɛyelalɛ azubɔdeɛ ne mɔ.

⁷“Bɛle kɛ Adam la, bɛtulule ngyekyeleɛ ne mɔɔ me nee bɛ kyekyele la, bɛanli nɔhalɛ bɛammaa me.

⁸Geleade le suakpole mɔɔ munzulema nee ahɔdiawu ɛyi ye tɔ na mogya ɛbu zolɛ a.

⁹Sɛlɛvolɛma ne mɔ le kɛ nwule ekpunli mɔɔ ɛhɔ nzia kakpondɛ sonla akpokpo ye la. Bɛku menli wɔ Hyikɛm adenle zo yɛɛ bɛbɔ munzule ɛbɛla ɛhye amumuyɛ nu.

¹⁰Menwu debie ɛzulolɛ bie wɔ Yizilayɛ: Yifelaem awozonlezonlenlɛ nu tuutuu ɛbɛla ne wɔ ɛkɛ; evinli ɛha Yizilayɛ.

¹¹“Na bɛmɛ Dwudama noko, mezie kenle mɔɔ mebava meadea bɛ wɔ mɔɔ bɛlɛyɛ la anwo a.