Read Nzema Hoz 7 Bible Online

Hoz 7 - Nzema bible

Hoz 7

¹“Mekɛ biala mɔɔ menwɔze kɛ meyɛ me menli Yizilayɛma ayile na meamaa bɛakpazi bieko la, debie mɔɔ menwu ye la ala a le Yifelaem amumuyɛ ɛbɛla ne nee Samɛlea munzule nyɛleɛ ne mɔ. Bɛdi bɛ nwo ndunlumi; bɛbubu nlenkɛ bɛwua; bɛkpokpo menli wɔ guabile ne mɔ azo.

²Bɛ ti moaba ɛnga ɛngile bɛ kɛ mebabu bɛ ɛtane ɛhye mɔ kɔsɔɔti anwo mgbonda. Bɛ nyɛleɛ ɛtane ne mɔ ɛli bɛ bɔyia, ɔ muala gua me nyunlu.”

³Ɛdɛnkɛma se, “Menli fa bɛ maamɔlɛ adwenle ne bɛlɛbɛla belemgbunli nee ye mgbanyima ne mɔ.

⁴Bɛ muala bɛle awuvolɛvalɛma; bɛle kɛ fonlomo mɔɔ ɛwie dɔ mɔɔ sonla ne mɔɔ to kpanwo ne la ɛnga nuhua bieko toonwo kɔkpula mekɛ mɔɔ ɔkɛwie ye kpanwo ne bɔ na ɔkɛwie tu la.

⁵Mekɛ mɔɔ belemgbunli ne di ye ɛvoyia ne la, ɔ nee ye mgbanyima ne mɔ nlonle nza na bɛyɛle tindaanwu na ɔbokale bɛ bɛzile amgbu.

⁶Bɛ ninyɛndane nwo adwenlevalɛ maa bɛ adwenle nu dɔ kɛ fonlomo; aledwolɛ nu amuala bɛ ɛya ne wu gbodogbodo kɛ ɔgyi senle zo, alehyenlɛ nu ɔsɔ kɛ sendɔlɔra.

⁷“Bɛ muala bɛlɔle kɛ fonlomo na bɛhunle bɛ arelemgbunli ne mɔ. Bɛ arelemgbunli ne mɔ amuala ɛwie wu yɛɛ bɛ biala anzɛlɛ ambiza me moalɛ.”

⁸Ɛdɛnkɛma se, “Yifelaem le kɛ kpanwo mɔɔ ɛtɛwiele be la. Bɛfa bɛ nye bɛto maanle maanle mɔɔ zuozua bɛ la anwo zo.

⁹Bɛngola bɛnnwu ye kɛ nyɛvolɛ yɛɛ ɛmaa bɛ anwosesebɛ ɛwie a. Bɛbɔ egyɛne, na bɛnnwu ye.

¹⁰Yizilayɛma mgbanyizonle ne di daselɛ tia bɛ. Noko ɛhye mɔ kɔsɔɔti anzi, bɛnzia bɛndoa medame Ɛdɛnkɛma bɛ Nyamenle ne, yɛɛ bɛmkpondɛ me bo zo.

¹¹Yifelaem di tɛnlatu kɛ abubule mɔɔ ɛnlɛ adwenle la. Bɛkɔ Yigyibiti bɛkɔbiza moalɛ, na bɛanriandi bɛahɔ Aselea bɛahɔbiza moalɛ.

¹²Na mɔɔ bɛlɛkɔ la, mebagua bɛ asawu meahye bɛ kɛ anwomanyunlu nloma la. Mebadea bɛ wɔ bɛ amumuyɛ ɛbɛla ne mɔ anwo.

¹³“Munzule ɛha bɛ, ɔluakɛ bɛde bɛ nwo bɛvi me nwo! Mebazɛkye bɛ, ɔluakɛ bɛde me nwo atua. Mekulo kɛ medie bɛ, noko bɛbɔ me nwo adalɛ.

¹⁴Bɛ nzɛlɛlɛ ne mɔ ɛnvi bɛ ahonle nu, bɛda bɛ ɛkpa ne mɔ azo a bɛye awolɛ a. Abɛlɛ nee nza ti bɛbodɛboda bɛ nwo, bɛkpo me.

¹⁵Medame a mentetele bɛ mengilele bɛ anwosesebɛ a, noko bɛfa me nwo maamɔvo adwenle.

¹⁶Bɛgyakyi me na bɛtoa bozonle Beeyale ne. Bɛle kɛ ɛda kyealera. Bɛ arelemgbunli ne mɔ bawu dadeɛ nloa wɔ bɛ mgbanyizonle ɛdendɛlɛ ti. Yigyibitima bazi bɛ ti zo agole.”