Read Nzema Hoz 9 Bible Online

Hoz 9 - Nzema bible

Hoz 9

¹Yizilayɛma, bɛgyakyi fɛlɛkolilɛ! Bɛmmadi wulupe kɛ maanle maanle ne mɔ la, ɔluakɛ bɛmɛ Yizilayɛma, bɛbɔ tuutuu ɛbɛla, na bɛkpo bɛ Nyamenle. Bɛhulo kɛ bɛkɛbɔ bɛ ɛkpa kɛ tuutuuma la wɔ ma ɛwozolɛ ɛleka ne mɔ.

²Aleɛ nee nza mɔɔ bɛbanyia bɛ wɔ ma ɛwozolɛ ɛleka nee nwanyezielɛ ɛleka ne mɔ la ɛnrɛzɔ bɛ yɛɛ bɛnrɛnyia nwanye fofolɛ.

³Yizilayɛma ɛnrɛdɛnla Ɛdɛnkɛma azɛlɛ ne azo; Yifelaemma bazia ahɔ Yigyibiti na bɛali aleɛ mɔɔ nwolɛ ɛnde la wɔ Aselea.

⁴Wɔ maanle zɔhane mɔ anu, bɛnrɛgua nwanye aze bɛnrɛye ɛdɛne bɛnrɛmaa Ɛdɛnkɛma, yɛɛ bɛ azubɔlɛ ne mɔ ɛnrɛzɔ ɔ nye. Bɛ aleɛ bayɛ kɛ ɛzɛne aleɛ; awie biala mɔɔ kɛli bie la, evinli baha ye, ɔluakɛ bɛbali bɛava bɛakpɔda bɛ ko ala; bɛnrɛva bie bɛnrɛyɛ azubɔdeɛ bɛnrɛhɔ Ɛdɛnkɛma Ɛzonlenlɛ Sua ne anu.

⁵Na saa mekɛ ne dwu, mɔɔ ɔwɔ kɛ bɛdi ɛvoyia ne mɔ bɛwula Ɛdɛnkɛma anyunlunyia a, duzu a bɛkɛyɛ a?

⁶Ɔluakɛ bɛnlea, anwubɛnyunlu ɛmaa bɛ nee bɛ ɛlɛkɔ Aselea, Yigyibitima baboɔboa bɛ nloa; bɛbaboɔboa bɛ nloa bɛahɔgua bɛ Mɛmefese na ɛkɛ ne a bɛbawu bɛagua a. Ndile nee mbowule bafifi ava bɛ dwɛtɛ fufule gyazielɛ ɛleka nee bɛ ndanlɛ azua ne mɔ.

⁷ Ndeanlɛ mekɛ ne ɛdwu, nzenralɛ mekɛ ne ɛdwu. Yizilayɛma banwu ye! Bɛlɛka kɛ, “Nyamenle kpɔmanvolɛ ne le koasea. Sonla ne mɔɔ sunsum ɛva ye la ɛzɛ.” Ɔboalekɛ bɛkpɔ me kpole kpalɛ, yɛɛ bɛ ɛtane ne le kpole kpalɛ.

⁸Nyamenle kpɔmanvolɛ ne le Yifelaemma, me Nyamenle ne menli ne sinzavolɛ. Noko ɛleka biala mɔɔ ɔfa la, bɛsua ye ɛhane kɛ anloma la, yɛɛ ɛkpɔlɛ ɛyi ye Nyamenle ne sua ne tɔ.

⁹ Bɛyɛ ɛtane wɔ debie biala mɔɔ bɛyɛ la anu, kɛmɔ bɛyɛle wɔ mekɛ mɔɔ bɛwɔ Gebɛya[9] la. Nyamenle bahakye bɛ ɛtane ne mɔ na yeadea bɛ wɔ nwolɛ.

¹⁰ Ɛdɛnkɛma se, “Mɔɔ mekanwu Yizilayɛ la, ɛnee ɔle kɛ vanye ma mɔɔ ɛfifi fienemgbole nu la. Mɔɔ mekanwu bɛ nlenya mɔ la, ɛnee bɛle kɛ feege mɔɔ ɛlɛdumua azo la ma mɔɔ ɛbolo la. Na mɔɔ bɛrale Piyɔ Boka la, bɛdule bɛ nwo bɛmanle bozonle Beeyale ne, na mengyile bɛ bɔkɔɔ kɛ bɛ bozonle ne mɔɔ bɛhulole ye la.

¹¹Yifelaem anyunlunyia badu ahɔ kɛ anloma, bɛnrɛwo mralɛ, mraalɛ ɛnrɛnrenzɛ, yɛɛ bɛnrɛva ɛkolɛ.

¹²Saa bɛwo mralɛ bɔbɔ a, mebahu bɛ kɔsɔɔti; menrɛgyakyi ko bɔbɔ. Saa mefi bɛ avinli meye me nwo a, munzule baha bɛ!”

¹³Ɛdɛnkɛma, menwu kɛ bɛhyehyɛ kɛ ɔwɔ kɛ bɛku Yifelaem amra mrenya ne mɔ. Ɔwɔ kɛ Yifelaem fa ɔ mra mrenya ne mɔ kɔ maa bɛku bɛ.

¹⁴O Ɛdɛnkɛma, duzu a ɛfa wɔayɛ menli ɛhye mɔ a? Maa bɛ mraalɛ ko ɛkpɔnekpɔne na maa bɛ nyɛfo ne mɔ ɛbɔndɔbɔndɔ.

¹⁵Ɛdɛnkɛma se, “Bɛ ɛtane ne mɔ kɔsɔɔti bɔle ɔ bo wɔ Gelegale. Ɛkɛ ne yɛɛ membɔle ɔ bo kɛ mekyi bɛ a. Ɔlua bɛ amumuyɛ nyɛleɛ ne mɔ ati, mebadu bɛ me sua nu ɛkɛ. Menrɛhulo bɛ bieko ɛlɛ; bɛ arelemgbunli ne mɔ kɔsɔɔti ɛde me nwo atua.

¹⁶Yifelaemma ɛyɛ kɛ baka mɔɔ ye ndinli ɛwu na ewule ɛha ye la, bɛnrɛzo ma. Saa bɛwo bɔbɔ a, mebahu bɛ mra ne mɔ mɔɔ la bɛ ahonle nwo la.”

¹⁷Me Nyamenle ne bakpo ye menli ne, ɔboalekɛ bɛandie ɔ ne. Bɛbali ahyimango wɔ maanle maanle ne mɔ anu.