Read Nzema Dww 1 Bible Online

Dww 1 - Nzema bible

Dww 1

¹Nrɛlaleɛ mɔɔ Ɛdɛnkɛma vale manle Pɛtuwɛle ara nrenya Dwowɛle la ɛne.

²Bɛdie, bɛmɛ mgbanyinli; bɛyɛ ɛnzonlɛ, bɛmɛ mɔɔ bɛwɔ azɛlɛ ne azo. Edwɛkɛ ɛhye, asoo bie ɛzi bɛ mekɛ zo, anzɛɛ bɛ ze mɔ mekɛ zo ɛlɛ?

³Bɛha bɛhile bɛ mra, na bɛ mra noko ɛha ɛhile bɛ mra, na bɛdabɛ noko bɛha bɛhile awolɛndoazo mɔɔ bara la.

⁴Mɔɔ abɛbɛ mɔɔ pɛ la pɛle na mɔɔ hale la, abɛbɛ tɔka ralile. Mɔɔ abɛbɛ tɔka ne gyakyile la, abɛbɛ bɛnyebɛnye ne mɔ ralile, yɛɛ mɔɔ abɛbɛ bɛnyebɛnye ne mɔ gyakyile la, abɛbɛ sɛkyevolɛma ralile.

⁵Bɛdwazo na bɛzu, bɛmɛ nzabovoma; nwanye ne fɛlɛko ti, bɛmɛ nwanyenovoma, bɛzu bɛye awolɛ, ɔluakɛ bɛye bɛvi bɛ nloa.

⁶ Ɔluakɛ abɛbɛ ɛlɔne ɛteta azɛlɛ ye; bɛ nwo yɛ se yɛɛ bɛ nwo zonle kpalɛ mɔɔ bɛtia bɛ a ɔnyɛ boɛ a; bɛ gye nlane le kɛ awenade gye, yɛɛ bɛ gye ndendenle le kɛ awenade belɛ gye.

⁷Bɛzɛkye yɛ vanye mbaka ne mɔ, na bɛli yɛ feege mbaka ne mɔ. Bɛli, bɛkeka mbaka ne anwo abonle ne mɔ bɛgua; bɛmaa ngane ne mɔ anwo ɛyɛ nwohyee.

⁸Bɛzu kɛ belamunli raalɛ mɔɔ ɛheda ɛrele ɛlɛsu nrenya mɔɔ gyale ye ye mbɛlɛra nu la.

⁹Ma azubɔdeɛ nee nza azubɔdeɛ ɛwie Ɛdɛnkɛma Ɛzonlenlɛ Sua ne anu. Sɛlɛvolɛma, Ɛdɛnkɛma sonvolɛma ne su di nyane, (ɔboalekɛ bɛnnyia azubɔdeɛ bɛmmaa Ɛdɛnkɛma).

¹⁰Ɛya avule ne mɔ ɛdɔ mgbane; ma ne mɔ ɛzɛkye, ɔboalekɛ azɛlɛ ne ɛhete; vanye ma ne mɔ ɛnwoso, yɛɛ ɔlivi mbaka ne mɔ ɛwu.

¹¹Bɛmɛ ɛyazonlɛma, bɛli nyane; bɛzu, bɛmɛ vanye egyinli zo neavolɛma, ɔboalekɛ hwiiti ne, baale ne, ɛya ne mɔ anu bɛyɔba ne mɔ ɛzɛkye.

¹²Vanye mbaka ne mɔ ɛwu, feege mbaka ne mɔ ɛdwɔlɔdwɔlɔ. Ma mɔɔ le kɛ akutue, mrɛlɛ nee ampolo, ɛbɔ nu mbaka kɔsɔɔti ɛwie wu. Menli anyelielɛ ɛwie.

¹³O sɛlɛvolɛma, bɛheda ɛrele na bɛzu, sonvolɛma mɔɔ sonle azukponle ne anwo, bɛzu. Bɛhɔ Ɛzonlenlɛ Sua ne anu, bɛheda ɛrele nɔe ne kɔsɔɔti, O me Nyamenle ne sonvolɛma! Ɔboalekɛ ma azubɔdeɛ nee nza azubɔdeɛ ɛwie bɛ Nyamenle ne Ɛzonlenlɛ Sua ne anu.

¹⁴Bɛmaa menli ne ɛhye ɛhɔne; bɛvɛlɛ Nyamenlezonlenlɛ ayia. Bɛboɔboa mgbanyima ne mɔ nee menli kɔsɔɔti mɔɔ wɔ azɛlɛ ne azo la anloa wɔ Ɛdɛnkɛma bɛ Nyamenle ne Ɛzonlenlɛ Sua ne anu na bɛzu bɛvɛlɛ Ɛdɛnkɛma.

¹⁵ Ɔbayɛ ɛzulolɛ kpole wɔ kenle ne! Ɔluakɛ Ɛdɛnkɛma kenle ne ɛbikye, ɔle kenle mɔɔ Tumivolɛ ne bava azɛkye ninyɛne a.

¹⁶Bɛlɛsɛkye yɛ aleɛ ne mɔ, noko yɛ nye gyi nwolɛ mgbane. Anyelielɛ ɛnle yɛ Nyamenle ne Ɛzonlenlɛ Sua ne anu ko.

¹⁷Ma ne mɔ nwoso kofie ne mɔ anu, ninyɛne ɛzielɛ ɛleka ne mɔ ɛdɔ mgbane; ma ɛzielɛleka ne mɔ ɛzɛkye, ɔboalekɛ aleɛ anyɛ kpalɛ.

¹⁸Nanemgbole ɛlɛkponle! Nlankɛ adwenle ɛha ɛbɔ nu, ɔboalekɛ bɛnlɛ adidileka; mboane bɔbɔ ɛlɛnwu amaneɛ.

¹⁹Mesu mefɛlɛ wɔ, O Ɛdɛnkɛma. Ɔluakɛ senle ɛyela fienemgbole nu adidileka ne mɔ, yɛɛ sendɔlɔra ɛyela kpɔkɛ nu mbaka kɔsɔɔti.

²⁰Nanemgbole bɔbɔ su fɛlɛ wɔ, ɔboalekɛ azudenle kɔsɔɔti ɛsesa, yɛɛ senle ɛyela fienemgbole nu adidileka ne mɔ.