Read Nzema Dww 2 Bible Online

Dww 2 - Nzema bible

Dww 2

¹Bɛwu aweɛne tendenle ne anu wɔ Zayɔn; bɛbɔ bubu wɔ me boka nwuanzanwuanza ne azo![1] Bɛmaa menli mɔɔ wɔ azɛlɛ ne azo la kɔsɔɔti anwo ɛwozo bɛ, ɔluakɛ Ɛdɛnkɛma kenle ne ɛlɛba, yedwu bɔbɔ asɛɛ.

²Ɔbayɛ awozinli nee alɔbɔlɛ kenle, amungu nee awozinli kabii kenle. Abɛbɛ ɛlɔne ɛyɛ kɛ menli anwo ɛzulolɛ, ɛheda awoka ne mɔ azo kɛ awozinli. Ɛhye, ɔvi tete, bie ɛtɛsile ɛlɛ, yɛɛ bieko ɛnrɛzi ɛlɛ wɔ awolɛndoazo kɔsɔɔti mɔɔ bara la anu.

³Senle sɛkye ninyɛne mɔɔ wɔ bɛ nyunlu, yɛɛ sendɔlɔra yela ninyɛne mɔɔ wɔ bɛ nzi la. Azɛlɛ ne le kɛ Yidɛn Tola wɔ bɛ nyunlu, bɛpɛ nu a bɛ nzi yɛ ɛsɛlɛ mɔɔ ɛdɔ mgbane a, yɛɛ debie biala ɛnvi bɛ sa.

⁴ Ɛnwu bɛ a bɛle kɛ mgbɔnwɔ, yɛɛ bɛnriandi kɛ konle mgbɔnwɔ.

⁵Saa bɛlɛwuluwulu awoka ne mɔ azo a, bɛ nwo alɛra le kɛ konle ehwili; bɛ nwo tetɛ kɛ senle la ndile welera nu. Bɛsolo bɛ kɛ ɛlɔne kpole bie mɔɔ ɛlɛkɔ konle la.

⁶Saa bɛye bɛ ti a, bɛ nwo ɛzulolɛ tɔ awie biala anwo zo; awie biala anyunlu to.

⁷Bɛteta kɛ ɛlɔnema; bɛfo bane kɛ ɛlɔnema. Bɛ muala bɛkɔ bɛ nyunlu fɔɔnwo. Bɛndɔ bɛngɔ fema zo yɛɛ bɛndɔ bɛngɔ bɛne zo.

⁸Bɛnzuhuzuhu bɛ nwo, biala dua ye adenle ɛdeɛ ne anu. Bɛbɔ bɛfa adendualɛ biala anu, yɛɛ debie biala ɛngola ɛnzi bɛ aze.

⁹Bɛtu twi bɛkɔ suakpole ne azo; bɛduolua bane ne mɔ anwo; bɛfo bɛkɔ azua ne mɔ anu, bɛdua nvɛnzɛlɛ ne mɔ anu kɛ nwule.

¹⁰Saa bɛlɛba a azɛlɛ kpusu, anwumaneamra anwo wozo bɛ. Sɛnzɛne ne nee siane ne du, na nwɔlɔra gyakyi ɛdalɛ.

¹¹Ɛdɛnkɛma tendɛ ɛsesebɛ zo kile ye ɛlɔne ne. Ɔluakɛ ye ɛlɔne ne le kpole; mɔɔ di ye mɛla zo la anwo yɛ ɛzulolɛ. Ɔluakɛ Ɛdɛnkɛma kenle ne le kpole, ɔyɛ ɛzulolɛ. Nwane a kɛhola gyinla a?

¹²Ɛdɛnkɛma se, “Kɛkala bɔbɔ, awie biala ɛva ɛhɔnehyelɛ, ɛzunlɛ nee nyanelilɛ, yɛɛ ye ahonle kɔsɔɔti ɛzia ɛrɛla me nwo ɛke.

¹³Bɛtete bɛ ahonle nu na tɛ bɛ adɛladeɛ nu ɔ.” Bɛzia bɛhɔ Ɛdɛnkɛma bɛ Nyamenle ne ɛkɛ, ɔluakɛ ɔle dovolɛ nee anwunvɔnezelɛnli; ɔnva ɛya mgbane mgbane, ye ɛhulolɛ kpundii ne le kpole, yɛɛ dahuu ɔfa ɛtane ɔkyɛ.

¹⁴Wɔannea Ɛdɛnkɛma bahakyi ye adwenle, yeagyakyi bɛ nyilalɛ dɔɔnwo wɔ ɛhye anzi, amaa bɛava ma nee nza azubɔdeɛ bɛamaa Ɛdɛnkɛma bɛ Nyamenle ne.

¹⁵Bɛwu aweɛne tendenle ne anu wɔ Zayɔn; bɛmaa menli ne ɛhye ɛhɔne; bɛvɛlɛ Nyamenlezonlenlɛ ayia.

¹⁶Bɛboɔboa menli ne anloa. Bɛnlua menli mɔɔ ɛyia ɛlɛsonle la; bɛboɔboa mgbanyima ne mɔ anloa; bɛboɔboa ngakula ne mɔ anloa, bɛboɔboa nlɔma mɔɔ la nyɛfonlɛ nloa la anloa. Bɛmaa atɔfolɛ nrenya ne vi ye ekpumgbunli ne anu evinde, na atɔfolɛ raalɛ ne vi ye suakunlu ɛvinde.

¹⁷Bɛmaa sɛlɛvolɛma mɔɔ ɛlɛsonle Nyamenle wɔ Ɛdɛnkɛma Ɛzonlenlɛ Sua ne anuhɔlɛ ne nee azukponle ne avinli la ɛzu ɛzɛlɛ kɛ, “O Ɛdɛnkɛma, nwu wɔ menli ne anwunvɔne. Mmamaa maanle maanle ne mɔ kpo yɛ, bɛsi yɛ amgbu bɛka kɛ, ‘Bɛ Nyamenle ne wɔ nienwu?’ ”

¹⁸Akee Ɛdɛnkɛma hwenle ye azɛlɛ ne anwo nungule, na ɔnwunle ye menli ne anwunvɔne.

¹⁹Ɛdɛnkɛma buale ye menli ne kɛ, “Bɛnlea, melɛbɛlɛ bɛ ma, nwanye, nee nwole, na bɛ nwo badɔ bɛ; menrɛmaa maanle maanle ɛnrɛgolo bɛ nwo bieko.

²⁰Mebavoa abɛbɛ ɛlɔne ne mɔɔ vi sɔlɔ rale la, mebavoa bie mɔ meahɔgua ɛsɛlɛ ne azo lɔ. Mebavoa bɛ ɛlɔne ne mɔɔ lumua la meahɔgua Nyevile Wulera ne anu, na meavoa mɔɔ li bɛ nzi la meahɔgua Mɛdetɛlenia Nyevile ne anu. Bɛ avunli ne mɔ babɔ, ɔluakɛ ninyɛndane mɔɔ bɛyɛ la le kpole.

²¹“O azɛlɛ, mmasulo; di fɛlɛko na maa ɛ nye ɛlie, ɔluakɛ Ɛdɛnkɛma ɛyɛ ninyɛne mgbole!

²²Bɛmmasulo, bɛmɛ ɛbɔ nu nanemgbole, ɔluakɛ fienemgbole nu adidileka ne mɔ ɛbua; mbaka ne mɔ so ma, feege baka nee vanye ɛzo dɔɔnwo.

²³“Bɛli fɛlɛko, O Zayɔnoma, na bɛmaa bɛ nye ɛlie Ɛdɛnkɛma bɛ Nyamenle ne anwo, ɔluakɛ yemaa ezule ɛdɔ ndɛ ɛbua bɛ benle, yemaa ezule ɛdɔ, nzule ɛbu bɛ nwo zo, alumua nee amozi ezule ɛdɔ kɛ dɛba ne ala la.

²⁴Ma bayi ma ɛwozolɛ ɛleka ne mɔ, nwanye nee nwole bayi angola mgbole ne mɔ.

²⁵Ɛvolɛ dodo ma mɔɔ abɛbɛ ne mɔ lile la mebava ɔ muala meamaa bɛ. Abɛbɛ bɛnyebɛnye, sɛkyera nee mɔɔ pɛ ma ne mɔ la, ɛlɔne kpole ne, medame a menzoanle ɛlɔne ɛhye bɛ nwo zo a.

²⁶Bɛbanyia aleɛ dɔɔnwo bɛali, bɛ ko ayi, na bɛaye Ɛdɛnkɛma bɛ Nyamenle ne ayɛlɛ, yemɔ a yeyɛ ninyɛne mgbole yemaa bɛ a. Me menli ne anyunlu ɛnrɛgua aze bieko.

²⁷Na Yizilayɛma banwu kɛ mede bɛ avinli, na medame, Ɛdɛnkɛma a mele bɛ Nyamenle a, awie bieko ɛnle ɛkɛ. Na menli ne anyunlu ɛnrɛgua aze bieko.

²⁸ “Na ɔbara kɛ nzinlii, mebawola me Sunsum ne meagua awie biala anwo zo: bɛ mra mrenya nee bɛ mra mraalɛ baha me nrɛlaleɛ ne; bɛ mgbanyinli baha ɛlalɛ, na bɛ mgbavolɛ anwu ɛnyelɛzodeɛnwunlɛ.

²⁹Mekɛ ne anu mebawola me Sunsum ne meagua sonvolɛ mrenya nee mraalɛ anwo zo.

³⁰“Mebahile kenle ne anwo sɛkɛlɛneɛ wɔ anwomanyunlu nee azɛlɛ ye azo; bɛbaha mogya bɛagua, senle nee esike mungumungu bavinde.

³¹ Sɛnzɛne ne balu kisii, na siane ne ayɛ kɔkɔlɛ kɛ mogya kolaa na Ɛdɛnkɛma kenle kpole anu ɛzulolɛ ne ara.

³² Na ɔbara kɛ bɛdabɛ mɔɔ bɛkɛvɛlɛ Ɛdɛnkɛma la bɛbalie bɛ ngoane, ɔluakɛ wɔ Zayɔn Boka nee Gyɛlusalɛm, bie mɔ bavi ɛsalɛ, kɛmɔ Ɛdɛnkɛma ɛha la, na bɛdabɛ mɔɔ bɛbaha la anu yɛɛ bɛdabɛ mɔɔ Ɛdɛnkɛma bavɛlɛ bɛ la wɔ a.”