Read Nzema Dww 3 Bible Online

Dww 3 - Nzema bible

Dww 3

¹Ɛdɛnkɛma se, “Mekɛ zɔhane mɔɔ mebava Dwuda nee Gyɛlusalɛm anwonyia ne meamaa bɛ la,

²mebaboɔboa maanle maanle kɔsɔɔti anloa na me nee bɛ ahɔ Ndɛnebualɛ Bɔnza ne anu. Ɛkɛ ne yɛɛ mebabua bɛ ndɛne wɔ mɔɔ bɛva bɛyɛ me menli nee me agyadeɛ Yizilayɛma la ati. Bɛbɔ Yizilayɛma asande bɛgua maanle maanle zo, na bɛhyɛ me azɛlɛ ne bɛva.

³Bɛguale me menli ne ati nzeleba kɛ nwane mɔ a me menli nuokɛma ne kɛyɛ bɛ ɛdeɛ a. Bɛdɔnenle mralɛ mrenya bɛvale ezukoa ne bɛbɔle tuutuu ɛbɛla, na bɛdɔnenle mralɛ mraalɛ bɛvale ezukoa ne bɛnlonle nwanye.

⁴ “Taya, Saedɛn, nee Filisitia maanzinli ne mɔ, duzu a bɛkpondɛ kɛ bɛyɛ a? Bɛkulo kɛ bɛdi me nzenralɛ wɔ debie bie ati ɔ? Saa bɛyɛ zɔhane a, menwɔdua bɛ kakɛ ndɛndɛ wɔ bɛdabɛ bɛ nyɛleɛ nwo. Zɛf 2.4-7; Zɛk 9.1-7; Mat 11.21-22; Luk 10.13-14

⁵Bɛva me dwɛtɛ fufule nee me ezukoa nvutuke, na bɛzoa me anwonyia kɔsɔɔti bɛhɔ bɛ mmonle azua nu.

⁶Bɛva Dwudama nee Gyɛlusalɛmma bɛvi bɛ maanle nu bɛhɔ moa moa, bɛdɔne bɛ bɛmaa Gilikima.

⁷Na kɛkala meye bɛ meavi maanle mɔɔ bɛdɔnenle bɛ bɛhɔle nu la anu. Na mɔɔ bɛva bɛyɛ bɛ la, mebayɛ bɛ bie meadua.

⁸Mebadɔne bɛ mra mrenya nee bɛ mra mraalɛ meamaa Dwudama; bɛdabɛ noko bɛbadɔne bɛ bɛamaa Sabema mɔɔ wɔ moa moa lɔ la. Medame, Ɛdɛnkɛma a medendɛ a.

⁹“Bɛbɔ nolo ɛhye wɔ maanle maanle avinli: Bɛboɔboa bɛ nwo wɔ konle nu; Katakyiema, bɛkpusu bɛ nwo; bɛmaa ɛlɔnema ɛhwe ɛbikye.

¹⁰ Bɛbolo bɛ azɛlɛvudulɛ mbulalɛ ne mɔ ati bɛyɛ konle dadeɛ, na bɛbolo bɛ ɛdedadeɛ ndendenle ne mɔ bɛyɛ atwɛ. Bɛmaa sonla mɔɔ ɛwie tuto la ɛha ye kɛ, ‘Mele ɛlɔnenli.’

¹¹Bɛha bɛ nwo bɛrɛla, bɛmɛ maanle maanle mɔɔ ɛbɔ ɛyia, na bɛboɔboa bɛ nloa wɔ bɔnza ne anu.” O Ɛdɛnkɛma, maa wɔ ɛlɔnema ɛrateta bɛ.

¹²“Bɛmaa maanle maanle ne mɔ ɛboɔboa bɛ nwo, na bɛrɛla Ndɛnebualɛ Bɔnza ne anu. Ɛkɛ ne yɛɛ medame, Ɛdɛnkɛma, mebadɛnla meabua maanle maanle mɔɔ ɛbɔ ɛyia bɛ la ndɛne a.

¹³ Bɛkpogya ɛdedadeɛ ne zo, ɔluakɛ bɛyɔba ne ɛbolo. Bɛhɔ, bɛhwihwi nwanye ne, ɔluakɛ nwanye melahyinli ne ɛyi. Angola ne mɔ ɛyiyi ɛbulu zo, bɛ amumuyɛ le kpole.”

¹⁴Apenle apenle, apenle apenle wɔ Ndɛnebualɛ Bɔnza ne anu. Ɔluakɛ Ɛdɛnkɛma mekɛ ne ɛbikye, ɔbazi Ndɛnebualɛ Bɔnza ne anu.

¹⁵Sɛnzɛne ne nee siane ne balu ayɛ awozinli, yɛɛ nwɔlɔra bagyakyi ɛdalɛ.

¹⁶ Ɛdɛnkɛma kulu wɔ Zayɔn Boka; ɔ ne kpusu wɔ Gyɛlusalɛm, na anwuma nee azɛlɛ kpusu. Ɛdɛnkɛma le ye menli ne ɛvealeka, ɔle aranemgbole ɔmaa Yizilayɛma.

¹⁷“Yemɔti bɛbanwu kɛ medame a mele Ɛdɛnkɛma bɛ Nyamenle ne, mɔɔ mede Zayɔn, me boka nwuanzanwuanza ne azo la. Gyɛlusalɛm bayɛ nwuanzanwuanza, na nyɛvolɛ ɛnrɛze zolɛ bieko ɛlɛ.

¹⁸“Kenle zɔhane nwanye fɛlɛko vi awoka ne mɔ anu bazonyi, meleke baze awoka ngyikyi ne mɔ azo, nzule bayi Dwuda azule kɔsɔɔti; nzufeanvea vi Ɛdɛnkɛma Ɛzonlenlɛ Sua ne anu bazenze aze kɛ azule wɔ Akasea Bɔnza.

¹⁹“Yigyibiti bahakyi ɛsɛlɛ, na Yidɔm adɔ mgbane, ɔboalekɛ bɛvale konle bɛdoale Dwuda maanle ne na bɛhunle menli mɔɔ ɛnze nwolɛ bie la.

²⁰Na Dwuda bayɛ menli gbudugbudu dahuu, Gyɛlusalɛm bayɛ zɔhane yeahɔdwu awolɛndoazo kɔsɔɔti anwo zo.

²¹Mebali me menli ne mogya nwo nzenralɛ,[2] menrɛva menli mɔɔ di fɔlɛ la ɛtane menrɛhyɛ bɛ, ɔluakɛ medame Ɛdɛnkɛma mede Zayɔn Boka.”