Read Nzema Emɔ 4 Bible Online

Emɔ 4 - Nzema bible

Emɔ 4

¹Bɛdie edwɛkɛ ɛhye, bɛmɛ Beehyan nlankɛ mbelɛ mɔɔ wɔ Samɛlea boka zo, mɔɔ sisi ehyianvolɛma, mɔɔ fa atisesebɛ amaamuo bu menli mɔɔ ehyia na bɛka bɛkile bɛ hu mɔ kɛ bɛva bɛrɛla bɛmaa bɛnlo la.

²Ɛdɛnkɛma ɛha ye nwuanzanwuanzayɛlɛ ne kɛ, “Bɛnlea na mekɛ ne mɔɔ bɛbabobɔ bɛ koba bɛahwe bɛ bɛahɔ la ɛlɛba. Ko biala bayɛ kɛ fɛlɛ mɔɔ ɛva koba la.

³Na bɛbalua bane adokule nu bɛavinde, awie biala bahɔ ɔ nyunlu fɔɔnwo na bɛavuandi bɛ bɛagua Hɛmɔn.” Kɛ Ɛdɛnkɛma se la ɛne.

⁴Awulae Nyamenle se, “Yizilayɛma, bɛhɔ Bɛtɛle ɛleka nwuanzanwuanza ne na bɛhɔdo mɛla ne mɔ. Bɛhɔ Gelegale bɛhɔtietia mɛla ne azo! Bɛhɔ zolɛ bɛbɔ azu nwonlomɔ biala, na bɛva bɛ ngyɛnu bulu ɛkpɔ ko ne bɛrɛla kenle nsa nsa.

⁵Bɛva kpanwo mɔɔ mgbɔvonle wɔ nu la bɛbɔ moyɛlɛ azu, na bɛbɔ ahonle fufule nu azubɔdeɛ ne mɔ nolo, ɔluakɛ bɛmɛ Yizilayɛma, ɛhye a le nyɛleɛ mɔɔ bɛkulo kɛ bɛyɛ a.”

⁶Ɛdɛnkɛma se, “Medame a memanle ɛhɔne zile bɛ azuamgbole ne mɔ azo na aleɛ wiele bɛ azua nu a, noko bɛanzia bɛamba me ɛkɛ.

⁷Eza memanle ezule gyakyile ɛdɔlɛ wɔ mekɛ mɔɔ yeha siane nsa na ɛbuhenle ne adwu la. Memaa suakpole ko nyia ezule, na suakpole ko ɛnnyia bie. Memaa ɛya avule ko nyia ezule a, avule ko ɛnnyia bie, yɛɛ ɛya mɔɔ ezule andɔ nu la anu ninyɛne sɛkye.

⁸Yemɔti azuamgbole nwiɔ anzɛɛ nsa dule hɔle suakpole ko mɔɔ bɛ nye la kɛ bɛkɛnyia nzule bɛkɛnlua bɛ ahonle la azo, na bɛannyia nzule mɔɔ sa bɛ no la, noko bɛanzia bɛamba me ɛkɛ.

⁹“Memanle ewia katekate rayelale bɛ bɛyɔba ne mɔ. Memanle abɛbɛ ralile bɛ tola nee bɛ vanye avule ne mɔ anu ninyɛne, bɛ feege mbaka nee bɛ ɔlivi mbaka ne mɔ; noko bɛanzia bɛamba me ɛkɛ.

¹⁰“Memanle ewulenzane ne mɔɔ rale Yigyibiti la bie rale bɛ nwo zo. Mengunle bɛ mgbavolɛ wɔ konle nu na mengyele bɛ mgbɔnwɔ ne mɔ nuokɛ. Memanle bɛ avunli kpɔlɔlera ne mɔ nvoanle bɔnlebɔnlenle bɛ bonyi nu wɔ bɛ azokoɛleɛ ɛkɛ ne, noko bɛanzia bɛamba me nwo ɛkɛ.

¹¹ “Menzɛkyele bɛ bie mɔ, kɛmɔ menzɛkyele azuamgbole Sodɔm nee Gomɔla la. Bɛdabɛ mɔɔ bɛvile ɛsalɛ la le kɛ ɛyɛne mɔɔ bɛdu bɛvi senle nu la. Noko bɛanzia bɛamba me ɛkɛ.

¹²Yemɔti O Yizilayɛma, mɔɔ mebava meayɛ bɛ la ɛne. Kɛmɔ mebayɛ ɛhye la ati, bɛboɔboa bɛ nwo bɛrayia medame, bɛ Nyamenle ne!”

¹³Ɔluakɛ bɛnlea, Nyamenle ne mɔɔ bɔle awoka ne mɔ, na ɔbɔle anwoma, ɔda ye adwenle ali ɔkile sonla; ɔkakyi alehyenlɛ ɔmaa ɔyɛ aledwolɛ, na ɔtietia azɛlɛ ye azo awoka zo la, ye duma ɛne, bɛfɛlɛ ye “Ɛdɛnkɛma, Tumivolɛ Nyamenle!”