Read Nzema Emɔ 8 Bible Online

Emɔ 8 - Nzema bible

Emɔ 8

¹Eza Tumivolɛ Ɛdɛnkɛma yele ɛhye hilele me. Menwunle kɛndɛne mɔɔ mbakama wɔ nu la.

²Ɛdɛnkɛma bizale me kɛ, “Emɔso, duzu a ɛnwu ye la?” Membuale ye kɛ, “Menwu mbakama kɛndɛne ko.” Ɛdɛnkɛma zele me kɛ, “Me menli Yizilayɛma awieleɛ kenle ne ɛdwu. Menrɛhakyi me adwenle, ɛdeanlɛ ne ala a metea bɛ a.

³Kenle zɔhane edwɛne mɔɔ bɛto wɔ suakunlu ɛkɛ ne la amuala bahakyi awolɛyelɛ. Ɛleka biala bayɛ avunli ngome, bɛbayɛ koonwu bɛavuandi bɛ bɛagua.”

⁴Bɛdie, bɛmɛ mɔɔ bɛmbu menli mɔɔ ɛhyia, na bɛmaa ehyianvolɛma mɔɔ wɔ maanle ye anu la anwo ɛwie bɛ kyele,

⁵na bɛka kɛ, “Kenlenzu a siane fofolɛ ɛvoyialilɛ ne kɛwie na yɛanyia adenle yɛadɔne yɛ abɛlɛ a? Kenlenzu yɛɛ Ɛnwomenlelielɛ Kenle ne kɛze na yɛanyia adenle yɛadɔne yɛ hwiiti, yɛanyia adenle yɛazi yɛ ‘yifa’ ɛzuzudeɛ ne abo na yɛawodo yɛ ‘hyikɛle’ ɛzuzudeɛ ne anu, na yɛawua mɔɔ yɛfa tone yɛazuzu la anu,

⁶amaa yɛava dwɛtɛ fufule yɛadɔ ehyianvolɛma, yɛava mgbɔlaboa yɛadɔ menli mɔɔ anwo ɛhyele bɛ, na yɛadɔne yɛ hwiiti mɔɔ ɛnle kpalɛ la a?”

⁷Ɛdɛnkɛma, Yizilayɛ Nyamenle ne ɛha ndane kɛ, “Me rɛle ɛnrɛvi bɛ nyɛleɛ ne mɔ.

⁸Yemɔti azɛlɛ ne bakpusu, na awie biala mɔɔ wɔ maanle ne anu la banwu nyane. Maanle ne anu bapi na yeabɔ kɛ Yigyibiti Azule Naele ne di yitwe la.

⁹Kenle zɔhane mebamaa sɛnzɛne ne adɔ ewiazo ketekete, na aleɛ adwo na awozinli ava ewia henlema ne. Medame, Tumivolɛ Ɛdɛnkɛma a mese a.

¹⁰Mebamaa bɛ ɛvoyialilɛ ne mɔ ahakyi ɛzɛneyɛlɛ na meamaa bɛ edwɛne fɛlɛko ne mɔ ahakyi awolɛyelɛ. Mebamaa bɛakpa bɛ ti, bɛaheda ɛrele, na bɛayɛ kɛ awovolɛ mɔɔ ɛlɛsu bɛ ra nrenya kokye mɔɔ ɛwu la. Kenle zɔhane bayɛ ɛnwonle ɛnwonle toonwo ahɔ ye awieleɛ.

¹¹“Bɛnlea, mekɛ ne ɛlɛba mɔɔ mebamaa ɛhɔne azi azɛlɛ ne azo a. Tɛ aleɛ ɛhɔne anzɛɛ nzule ɛhɔne ɔ. Ɛdɛnkɛma edwɛkɛ ne anwo ɛhɔne nee nzuhɔne a bahu bɛ a. Medame, Awulae Nyamenle a mese a.

¹²Menli bakpɔsa ɛnwea ɛnwea, bɛvi sɔlɔ bɛahɔ nyiakɛ na bɛvi aduduleɛ bɛahɔ adɔleɛ. Bɛbanriandi bɛahɔ bɛara ɛleka biala kɛ bɛkakpondɛ Ɛdɛnkɛma edwɛkɛ ne, na bɛnrɛnyia ye.

¹³Kenle zɔhane nzuhɔne bamaa mgbavolɛ yɛɛ mbɛlɛra mɔɔ anwo yɛ fɛ na bɛnze nrenya fee la anye zo abulu bɛ.

¹⁴Bɛdabɛ mɔɔ bɛfa Samɛlea awozonle ananze ne mɔ bɛka ndane kɛ, ‘Meka Dan bozonle ne’, anzɛɛ ‘Meka Biyɛhyiba bozonle ne’ la amuala bagua aze, yɛɛ bɛnrɛdwazo bieko.”