Read Nzema Emɔ 9 Bible Online

Emɔ 9 - Nzema bible

Emɔ 9

¹Menwunle kɛ Ɛdɛnkɛma gyi azukponle ne anwo, na ɔzele me kɛ: “Si Ɛzonlenlɛ Sua ne mpila ndendenle ne mɔ ati ne mɔ ɛsesebɛ maa nwolodo ne mɔ ɛkpusu. Bubu bɛ maa bɛha bɛgua menli ne amuala ati zo. Mebava dadeɛ meahu menli mɔɔ kɛha la; ko bɔbɔ ɛnrɛhola nriandi; kokye bɔbɔ ɛnrɛvi ɛsalɛ.

²Saa bɛnriandi bɛkɔfea Ɛbolɔ a, mebahwe bɛ meara. Saa bɛfo bɛkɔ anwuma a, mebadwula bɛ aze.

³Saa bɛnriandi bɛkɔfea Kamɛle Boka ne azo a, mebakpondɛ bɛ meahye bɛ. Saa bɛnriandi bɛkɔfea nyevile ne abo lɔ a, mebamaa ɛwɔlɛ akeka bɛ.

⁴Saa bɛ kpɔvolɛma kye bɛ nuokɛ a, mebamaa bɛahu bɛ. Mezi pi kɛ mesɛkye bɛ, tɛ kɛ meboa bɛ ɔ.”

⁵Awulae, Tumivolɛ Nyamenle ne mɔɔ fa ɔ sa ka azɛlɛ ye a ɔkpusu, na menli kɔsɔɔti mɔɔ de zolɛ la di nyane, na maanle ne anu pi na ɔbɔ, kɛ Yigyibiti Azule Naele ne di yitwe la;

⁶yemɔ mɔɔ ɔsi ye azua wɔ anwuma, na ɔsi ye ninyɛnezielɛ ɛleka wɔ azɛlɛ ye azo; yemɔ mɔɔ ɔtwe nyevile nu nzule, na ɔmaa ɔtɔ ezule ɔgua azɛlɛ ye azo la, ye duma a le Ɛdɛnkɛma.

⁷Ɛdɛnkɛma se, “Yizilayɛma, kɛ mesi medwenle Sudanema anwo la, zɔhane ala yɛɛ medwenle bɛdabɛ noko bɛ nwo a. Menyele Filisitiama menvile Kiliti na menyele Seleama menvile Kɛɛ, kɛmɔ menyele bɛdabɛ noko menvile Yigyibiti azɛlɛ zo la.

⁸Medame, Awulae Nyamenle, melɛnea ɛtane belemgbunli maanle Yizilayɛ, na mebazɛkye ye, meaye ye meavi azɛlɛ ye azo. Noko menrɛzɛkye Gyekɔbo abo zo amra ne amuala.

⁹“Mebaha tumi edwɛkɛ ne na meahegye Yizilayɛma kɛ bɛkɛgye ma la. Mebahegye bɛ meavi maanle maanle avinli na meaye mɔɔ ɛnle kpalɛ la meavi nuhua.

¹⁰Bɛdabɛ ɛtanevolɛma mɔɔ bɛwɔ me menli ne avinli mɔɔ bɛka kɛ, ‘Nyamenle ɛnrɛmaa munzule biala ɛnrɛdo yɛ’ la badɔ dadeɛ nloa.”

¹¹ Ɛdɛnkɛma se, “Mekɛ ɛlɛba mɔɔ mebava Devidi belemgbunli maanle ne mɔɔ ɛtete kɛ sua mɔɔ ɛyɛ kpasakpasa la gyinlabelɛ ne meamaa ye bieko. Mebalie ye bane ne mɔ fofolɛ meazie bɛ bo zo ne mɔ, na meakyekye maanle ne fofolɛ meayɛ ye kɛ ye dɛba ne ala la.

¹²Yemɔti Yizilayɛma bava Yidɔm azɛlɛ ne mɔɔ ɛha, nee maanle maanle mɔɔ le me ɛdeɛ la kɔsɔɔti ayɛ bɛ ɛdeɛ.” Kɛ Ɛdɛnkɛma mɔɔ bamaa ɛhye azi la se la ɛne.

¹³“Bɛnlea, mekɛ ne ɛlɛba, ” Ɛdɛnkɛma a se a, “abɛlɛ bavievia mralɛ dɔɔnwo abo menli mɔɔ bu la anwo zo, yɛɛ vanye ma bazo abo nwanyeyɛlɛ zo. Nwanye fɛlɛko bazonyi avi awoka ne mɔ azo, na yeaze awoka ngyikyi ne mɔ azo.

¹⁴Mebamaa me menli Yizilayɛma eza akpazi, bɛbakyekye bɛ azuadu ne mɔ na bɛadɛnla zolɛ; bɛbayɛ vanye egyinli na bɛanlo nuhua nwanye ne; bɛbayɛ tola na bɛali nuhua ninyɛne.

¹⁵Mebava me menli ne meazie bɛ azɛlɛ ne azo, na bɛnrɛdu bɛ bieko ɛlɛ; bɛnrɛvi azɛlɛ ne mɔɔ meva memaa bɛ la azo.” Ɛdɛnkɛma bɛ Nyamenle ne a se a.