Read Nzema Oba 1 Bible Online

Oba 1 - Nzema bible

Oba 1

¹ Nyamenle nrɛlaleɛ ne mɔɔ Obadaya vale dole gua la ɛne. Ɔfane edwɛkɛ mɔɔ Awulae Nyamenle ne hanle wɔ Yidɔm maanle ne anwo la anwo. Mal 1.2-5 Ɛdɛnkɛma ɛzoa sonla wɔ maanle maanle ne mɔ anu. na yɛde ye nrɛlaleɛ ne. Ɔse: “Bɛdwazo! Bɛmaa yɛ nee Yidɔmma ɛhɔho!”

²Ɛdɛnkɛma ɛze Yidɔmma kɛ, “Nea, mebabɛlɛ bɛ aze wɔ maanle maanle ne mɔ anyunlu, awie biala bakpo bɛ bɔkɔɔ.

³Bɛ adubɛnwo ne ɛbɛlɛbɛla bɛ. Bɛ mgbole ne mɔɔ bɛlua a bɛka kɛ, kɛmɔ bɛkyekye bɛ suakpole ne bodane zo, na bɛwɔ awoka zo la ati, ‘Awie ɛnrɛhola yɛ ɛhwee yɛ’ la,

⁴nea, saa bɛtu bɛkɔ anwuma kɛ kɔleɛ, na bɛyɛ bɛ sane wɔ nwɔlɔra ne mɔ azo bɔbɔ a, mebadwula bɛ aze.

⁵“Saa nwule ba bɛ nwo zo nɔɔzo a, bɛfa ninyɛne mɔɔ bɛkulo la. Saa menli tete vanye ma a, dahuu bɛgyakyi ekyi. Na bɛmɛ, bɛ kpɔvolɛma ɛkpokpo bɛ bɔkɔɔ.

⁶Bɛwie Yisɔ abo zo amra wua bɔkɔɔ, bɛve bɛ anwonyia ne amuala.

⁷Bɛ ɛlɔne nu agɔnwolɛma ɛbɛlɛbɛla bɛ, ɛdu bɛ ɛvi bɛdabɛ bɛ maanle nu. Menli mɔɔ anrɛɛ nee bɛ le ko la ɛdwazo ɛtia bɛ ɛli bɛ nwo zo konim. Bɛdabɛ bɛ gɔnwo mɔ kpalɛ kpalɛ ɛvua bɛ ti, na bɛnrɛde ɔ bo ɛlɛ.”

⁸Ɛdɛnkɛma se, “Kenle mɔɔ metea Yidɔmma la, mebazɛkye nrɛlɛbɛvolɛma mɔɔ wɔ Yidɔm la na meaminliminli ndelebɛbo bo zo wɔ Yisɔ Boka.

⁹Katakyiema mɔɔ wɔ Timan la ahonle badu, na bɛbahu awie biala mɔɔ wɔ Yidɔm la.

¹⁰“Mɔɔ bɛvale bɛyɛle bɛ mediema [1] Gyekɔbo abo zo amra la ati, bɛbagua bɛdabɛ bɛ nyunlu aze na bɛabɔ bɛ bo zo bɔkɔɔ.

¹¹Suzuamgba ala mɔɔ kenle ko ne bɛgyinlanle ɛkɛ ne bɛmanle nyɛvolɛ vole Gyɛlusalɛm sesale zolɛ anwonyia hɔle, na bɛguale nwolɛ nzeleba bɛhyɛle la, ɛnee bɛdabɛ bɛboka menli ne anwo ala ɛne.

¹²Saa bɛ mediema ɛnwu bɛ nyunlu a, ɛnee ɔnle kɛ bɛsi bɛ amgbu. Saa bɛlɛsɛkye Dwudama bɛbɔ bɛ bo zo a, ɔnle kɛ bɛgyinla ahane bɛsele bɛ, anzɛɛ bɛtu bɛ nloa anu wɔ bɛ amaneɛnwunlɛ nwo.

¹³Saa me menli ne ɛnwu bɛ nyunlu bɔbɔ a, anrɛɛ ɔnle kɛ bɛfa ɛlɔnema bɛfo suakpole ne azo, bɛsele bɛ na bɛgolo bɛ nwo, na bɛwua bɛ ninyɛne kɔsɔɔti.

¹⁴Anrɛɛ ɔnle kɛ bɛsia bɛ adenle nu, bɛtua menli mɔɔ nriandi la adenle. Anrɛɛ ɔnle kɛ bɛye bɛ bɛmaa na bɛmaa bɛnwu amaneɛ.

¹⁵“Mekɛ ne asɛɛ ɛdwu mɔɔ medame, Ɛdɛnkɛma, mebadea maanle omaanle ne mɔ a. Mɔɔ bɛdabɛ Yidɔmma bɛyɛle la, bɛbayɛ bɛ bie bɛadua, bɛ munzule babɔ bɛ ti.

¹⁶Bɛhilele me menli ne mɔ nyane wɔ me boka nwuanzanwuanza[2] ne azo Zɔhane ati bɛbahile maanle maanle kɔsɔɔti nyane ne bie; bɛbanwu amaneɛ kpalɛ na bɛ bo zo aminli.

¹⁷“Noko Zayɔn Boka azo menli ne bie mɔ bavi ɛsalɛ na ɛkɛ ne bayɛ ɛleka nwuanzanwuanza. Na Gyekɔbo abo zo amra bazia arava bɛ agyadeɛ.

¹⁸“Gyekɔbo abo zo amra badɔlɔ kɛ samɛnlakɛ, na Dwosefi abo zo amra azɔ kɛ senle tafinlima. Bɛbayela Yisɔ abo zo amra kɛ mbaka alosinli. Awie ko bɔbɔ ɛnrɛha Yisɔ sua nu. Medame Ɛdɛnkɛma a mese a.

¹⁹“Dwuda nyiakɛ amra barava Yisɔ Boka, na menli mɔɔ wɔ adɔleɛ la arava Filisitia maanle ne. Bɛbava Yifelaem nee Samɛlea azɛlɛ ne, na Bɛngyaman abo zo amra ava Geleade.

²⁰Yizilayɛma mɔɔ bɛhyele bɛ nuokɛ wɔ maanle ye sɔlɔ bɛhɔle nlɔnu la bazia arava azɛlɛ ye, ɔvi Fonehyea ahɔkpula Zalɛfate. Nlɔnuma mɔɔ vi Gyɛlusalɛm na bɛwɔ Sadese la baraho ava azua mɔɔ wɔ Dwuda nyiakɛ la.

²¹Katakyiema bahɔyia Zayɔn Boka, na bɛaho bɛava Yisɔ Boka. Na medame Ɛdɛnkɛma, mebali bɛ nwo zo belemgbunli.”