Read Nzema Dwn 1 Bible Online

Dwn 1 - Nzema bible

Dwn 1

¹ Kenle ko Ɛdɛnkɛma zele Ametayi ara Dwona kɛ,

²“Dwona, kɔ suakpole Nenɛvɛ mɔɔ ɛlie duma kpole la azo na kɔbɔ nolo, bɔ bɛ ɛrele zo kɛ menwu bɛ amumuyɛ mɔɔ bɛyɛ la amuala.”

³Noko Dwona dwazole la ɔyɛle ye adwenle kɛ ɔnriandi Nyamenle yeahɔ Sepeen. Yemɔti ɔhɔle Dwɔpa na ɔnyianle meli bie mɔɔ ɛlɛkɔ Sepeen la. Ɔduale ye ɛlɛne kakɛ ne na ɔhɔvole meli ne anu kɛ ɔ nee menli mɔɔ wɔ meli ne anu la kɔ Sepeen, yeaye ɔ nwo wɔ Ɛdɛnkɛma anye zo.

⁴Na Ɛdɛnkɛma manle anwoma kpole bie dwazole nyevile ne anye. Ahumu ne dule kpole kpalɛ mɔɔ ɛnee asɛɛ azudulɛ ne ɛbubu meli ne ɛwie a.

⁵Menli mɔɔ ka meli ne la ahonle dule kpalɛ na awie biala bɔle ɔ bo kɛ ɔtea yeavɛlɛ ye nyamenle ne kɛ ɔlie ye. Bɛvuandinle meli ne anu ninyɛne ne mɔ bɛguale azule nu, amaa meli ne ayɛ felafela. Mekɛ mɔɔ ɛhye mɔ ɛlɛkɔ zolɛ la, ɛnee Dwona ɛwolo ɛhɔ meli ne abo lɔ na yelafe.

⁶Yemɔti kpanyinli ne mɔɔ nea meli ne azo la hɔdunwuele ye na ɔzele ye kɛ, “Duzu ati a wɔmɔ wɔlafe a? Dwazo na fɛlɛ wɔ nyamenle ne mɔɔ ɛsonle ye la. Wɔannea a ɔkɛyɛ kɛ wɔmɔ wɔ nyamenle ɛdeɛ ne se anwunvɔne. Fɛlɛ ye maa ɔlie yɛ na yɛwie wu!”

⁷Na bɛhanle bɛhilele bɛ nwo ngoko ngoko kɛ, “Bɛrɛla bɛmaa yɛgua nzeleba yɛkpondɛ sonla holɛ ko ne mɔɔ ɔlua ɔ ti munzule kpole ɛhye ɛdo yɛ la.” Bɛguale nzeleba ne la, ɔbɔle Dwona.

⁸Na bɛbizale Dwona kɛ, “Yemɔti, wɔmɔ ɛ ti yɛɛ munzule kpole ɛhye ɛdo yɛ a? Ka maa yɛdie! Duzu gyima a ɛyɛ a? Ɛvi nienwu? Ɛvi maanle boni anu? Menli boni a ɛvi bɛ nuhua a?”

⁹Dwona buale kɛ, “Mele Hibulunli. Mesonle Ɛdɛnkɛma, Nyamenle ne mɔɔ wɔ anwuma la. Yemɔ a ɔbɔle nyevile nee azɛlɛ a.”

¹⁰Na Dwona vale zɔle zolɛ kɛ ɔlɛnriandi Ɛdɛnkɛma. Ɛzulolɛ kpole hanle bɛ na bɛzele ye kɛ, “Duzu debie a wɔyɛ la?”

¹¹Mekɛ ne anu ɛnee akee ahumu ne ɛlɛtu kpole kpalɛ. Na bɛbizale Dwona kɛ, “Duzu debie a yɛva yɛyɛ wɔ na ahumu ye agua amaa yɛ a?”

¹²Dwona zele bɛ kɛ, “Bɛmaa me zo, bɛvuandi me bɛdo nyevile nu na nyevile ne bagua amaa bɛ, ɔluakɛ meze kɛ medame me ti yɛɛ ahumu kpole ɛhye ɛdwazo a.”

¹³Na menli ne bɔle mɔdenle kɛ bɛka meli ne bɛahɔ aze, noko yeanyɛ boɛ, ɔluakɛ ɛnee akee ahumu ne anu ɛza na ɔtia bɛ.

¹⁴Zɔhane ati bɛvɛlɛle Ɛdɛnkɛma bɛzele kɛ, “O Ɛdɛnkɛma, yɛsɛlɛ wɔ kpalɛ kpalɛ, mmamaa yɛwu kɛ nrenya ɛhye kɛwu a, yɛɛ mmamaa ye mogya gua yɛ ti zo. Ɔluakɛ, wɔmɔ, O Ɛdɛnkɛma, yɛɛ wɔhyehyɛ wɔyɛ mɔɔ ɛdawɔ ɛkulo la a.”

¹⁵Na bɛmanle Dwona zo bɛvuandinle ye bɛdole nyevile ne anu, na ɛkɛ ne ala nyevile ne guale diinyi.

¹⁶Menli ne mɔ zulole Ɛdɛnkɛma kpole na bɛbɔle azu bɛmanle ye. Na bɛhanle ndane kɛ bɛkɛzonle Ɛdɛnkɛma.

¹⁷ Na Ɛdɛnkɛma manle fɛlɛ kpole bie ramenle Dwona. Dwona lile kenle kɔkɔlɛ nsa wɔ fɛlɛ ne akunlu.