Read Nzema Dwn 3 Bible Online

Dwn 3 - Nzema bible

Dwn 3

¹Eza Ɛdɛnkɛma edwɛkɛ ne dwule Dwona anwo zo bieko

²na ɔzele ye kɛ, “Dwona, dwazo kɔ Nenɛvɛ, suakpole ne mɔɔ ɛlie duma kpole la azo, na kɔbɔ me edwɛkɛ ne mɔɔ meva mewula ɛ nloa la nolo.”

³Na Dwona hɔle Nenɛvɛ, kɛmɔ Ɛdɛnkɛma hanle hilele ye la. Nenɛvɛ le suakpole kpalɛ mɔɔ sonla fa kenle nsa a fi ɔ ti kɔ ɔ bo a.

⁴ Na Dwona bɔle ɔ bo kɛ ɔkɔ sua bɔdenle ne azo. Ɔdiale kenle ko ala na ɔbɔle nolo kɛ, “Yeha kenle abulanla na bɛazɛkye Nenɛvɛ!”

⁵Menli mɔɔ wɔ Nenɛvɛ la liele Nyamenle lile. Bɛ muala bɛliele bɛdole nuhua kɛ bɛkeda ɛrele, bɛahye ɛhɔne, mgbolema nee ahoahweabane, bɛ muala bɛhyele ɛhɔne bɛvale bɛhilele kɛ bɛnlu bɛ nwo.

⁶Nenɛvɛ belemgbunli ne dele edwɛkɛ ne la, ɔvi ye belemgbunli ebia ne azo ɔdwazole, ɔkpale ye belemgbunli tɛladeɛ ne ɔguale, ɔvale ɛrele ɔhedale, na ɔvale nzonle ɔbɔle ɔ nwo.

⁷Akee ɔmanle bɛbɔle nolo wɔ suakpole ne azo kɛ, “Kɛ Nenɛvɛ belemgbunli nee ye mgbanyima se la ɛne: awie biala mɔɔ wɔ suakpole ye azo la mmadi debie yɛɛ ɔmmano nzule. Akee bɛmmamaa nlankɛ yɛɛ mboane anzɛɛ nyɛmoa biala fa bɛ nloa ka debie biala.

⁸Awie biala ɛva ɛrele ɛheda, ɔva bie ɔhedɛheda ye nyɛmoa, na akee awie biala ɛyeye ye ahonle nu ɛzɛlɛ Nyamenle. Awie biala ɛgyakyi amumuyɛ nee ɛtane ɛyɛlɛ.

⁹Awie ɛnze; bie a ɛnee Nyamenle ɛnwu yɛ anwunvɔne, yehakyi ye adwenle na yegyakyi ye ɛya kpole ne, amaa yɛanwu.”

¹⁰Nyamenle nwunle mɔɔ bɛyɛle la. Ɔnwunle kɛ bɛnlu bɛ nwo na bɛgyakyi bɛ nyɛleɛ ɛtane ne nee bɛ amumuyɛ ne mɔ ɛyɛlɛ. Yemɔti ɔhakyile ye adwenle, na yeammaa munzule kpole ne mɔɔ anrɛɛ ɔmaa yeara bɛ nwo zo la amba.