Read Nzema Ɛdi 13 Bible Online

Ɛdi 13 - Nzema bible

Ɛdi 13

¹Ɛdɛnkɛma zele Mosisi kɛ,

²“Ye Yizilayɛ mbusua ekpunli bulu nee nwiɔ ne anu ko biala abusua kpanyinli ko soa bɛ maa bɛhɔli busia bɛkpɔla Keena azɛlɛ ne mɔɔ mefa meamaa bɛ la.”

³Mosisi lile Ɛdɛnkɛma edwɛkɛ zo na ɔzoanle mbusua mgbanyinli ɛhye mɔ ɔmanle bɛvi Pɛlan fienemgbole ne anu bɛhɔle: [Abusua Ekpunli] — [Abusua Kpanyinli] Wulubɛn — Zakɛ ara nrenya Hyama Semɛyɔn — Hɔlae ara nrenya Hyeefate Dwuda — Gyɛfɛni ara nrenya Kalɛbe Yesakaa — Dwosefi ara nrenya Ayegale Yifelaem — Nɛn ara nrenya Hohyia Bɛngyaman — Rilefu ara nrenya Paletae Zɛbulɛn — Sodae ara nrenya Gadeɛle Manasɛ — Susae ara nrenya Gadae Dan — Gɛmalae ara nrenya Ameɛle Ahya — Maekeɛle ara nrenya Sitɛ Nafetalae — Vɔfosae ara nrenya Naabae Gaade — Makae ara nrenya Giyuyɛle

¹⁶Menli mɔɔ Mosisi zoanle bɛ kɛ bɛhɔkpɔla azɛlɛ ne la ɛne. Na ɔkpale Nɛn ara nrenya Hohyia duma ne na ɔdonle ye Dwɔhyua.

¹⁷Mɔɔ Mosisi soa bɛ la, ɔzele bɛ kɛ, “Bɛhɔ sɔlɔ afoa nu wɔ Keena azɛlɛ ne nyiakɛ, na bɛhɔ azua mɔɔ gua awoka ne mɔ azo la azo.

¹⁸Bɛhɔnlea kɛ maanle ne si de la, saa menli mɔɔ wɔ zolɛ la anwo yɛ se anzɛɛ bɛ nwo ɛnyɛ se, saa bɛ nwo zonle anzɛɛ bɛ nwo anzo;

¹⁹bɛnlea kɛ azɛlɛ ne le kpalɛ anzɛɛ ɔnle kpalɛ, yɛɛ saa menli ne dede azokoɛleɛ anzɛɛ azuamgbole mɔɔ bɛbɔ nwolɛ bane la azo;

²⁰bɛnlea saa azɛlɛ ne kye aleɛ anzɛɛ ɔngye aleɛ, yɛɛ eza saa mbaka wɔ zolɛ anzɛɛ mbaka ɛnle zolɛ a. Bɛzi ahonle na bɛva nehane ma ngakyile ne mɔ bie bɛrɛla.” (Mekɛ ne le mekɛ mɔɔ ɛnee bɔ zo mɔɔ vanye ma ɛbɔ ɔ bo kɛ bɛbolo a.)

²¹Yemɔti busiama ne bɔle ɔ bo wɔ Zen fienemgbole nu bɛhɔkpɔlale azɛlɛ ne toonwo bɛhɔdwule Rilihɔbo mɔɔ zua Heemate Ademgbolezo wɔ sɔlɔ afoa nu la.

²²Bɛhɔle azɛlɛ ne nyiakɛ na bɛhɔle Hibulɔn, ɛleka mɔɔ ɛnee menli kakanyinlima bie mɔɔ bɛfɛlɛ bɛ Anakema la abo zo amra, Ahaeman, Hyihyae, yɛɛ Talimae de la. (Bɛkyekyele Hibulɔn ɔlile ɛvolɛ nsuu kolaa na bɛakyekye Zowan mɔɔ wɔ Yigyibiti la.)

²³Bɛrale Ɛhyekɔlo Bɔnza, na ɛkɛ ne, bɛpɛle vanye baka ɛhane ko mɔɔ ma siakɛ ko pɛ a wɔ zolɛ la. Ye ɛnlomboɛ ti, menli nwiɔ a gyɛnvale na bɛahola ye soa a. Eza bɛ nee ma bie mɔɔ le kɛ akutue la, yɛɛ feege ma rale.

²⁴(Bɛvɛlɛle ɛkɛ ne Ɛhyekɔlo Bɔnza, ɔboalekɛ ɛkɛ ne a Yizilayɛma pɛle vanye ma siakɛ ne a.)

²⁵Busiama ne kpɔlale azɛlɛ ne toonwo kenle abulanla na bɛziale.

²⁶Bɛrale Mosisi, Aalɔn nee Yizilayɛma anwo ɛkɛ wɔ Keedɛhye mɔɔ wɔ Pɛlan fienemgbole nu la. Bɛhanle mɔɔ bɛnwunle ye la bɛhilele bɛ, na bɛvale azɛlɛ ne azo ma mɔɔ bɛ nee bɛ rale la bɛhilele bɛ.

²⁷Na bɛhanle bɛhilele Mosisi kɛ, “Yɛhɔle azɛlɛ ne mɔɔ ɛzoanle yɛ zo la azo. Azɛlɛ ne kye aleɛ yɛɛ ninyɛne kpalɛ wɔ zolɛ; ma mɔɔ wɔ zolɛ la bie mɔ ɛ; azɛlɛ ne kye aleɛ bɔkɔɔ.

²⁸Noko menli mɔɔ wɔ zolɛ la anwo yɛ se, yɛɛ bɛbɔ bɛ azuamgbole ne mɔ anwo bane kpalɛ. Mɔɔ yɛ ɛzulolɛ kpole kpalɛ la a le kɛ, yɛnwunle kakanyinlima bie mɔɔ le Anake abo zo amra la wɔ ɛkɛ.

²⁹Amalɛkema de azɛlɛ ne nyiakɛ afoa nu. Hɛtema, Gyibɛsema nee Amɔlema dede azua mɔɔ gua awoka ne mɔ azo la azo; yɛɛ Keenama dede Mɛdetɛlenia Nyevile ne nee Azule Dwɔdan ne anloa.”

³⁰Kalɛbe bɔle agoo manle menli mɔɔ wɔ Mosisi anwo ɛkɛ la yɛle ngungoonwu na ɔhanle kɛ, “Bɛmaa ɔyɛ ndɛ yɛhɔho yɛva azɛlɛ ne yɛdɛnla zo. Yɛ nwo yɛ se, yɛkola yɛdi bɛ nwo zo konim.”

³¹Na menli mɔɔ nee Kalɛbe hɔle la hanle kɛ, “Kyɛkyɛ o, yɛnlɛ anwosesebɛ mɔɔ yɛfa yɛkɔteta bɛ a; menli ne anwo yɛ se tɛla yɛ.”

³²Yemɔti bɛbɔle azɛlɛ ne mɔɔ bɛhɔkpɔlale la anwo nzekue bɛhilele Yizilayɛma. Bɛhanle kɛ, “Azɛlɛ ne ɛnle azɛlɛ kpaziwɔkɛ biala mɔɔ menli mɔɔ de zolɛ la nyia aleɛ di a. Awie biala mɔɔ yɛnwunle ye la le anyinlima.

³³ Eza yɛnwunle menli ndendenle mbelane bie mɔɔ le Anake abo zo amra mɔɔ vi Nɛfelem anu la wɔ ɛkɛ. Yɛgyi bɛ nyunlu a yɛle kɛ ngɛkɛba bie, yɛɛ bɛdabɛ noko bɛnea yɛ a ɛnee yɛle ngɛkɛba bie wɔ bɛ nye zo.”