Read Nzema Ɛdi 17 Bible Online

Ɛdi 17 - Nzema bible

Ɛdi 17

¹Ɛdɛnkɛma zele Mosisi kɛ,

²“Ka kile Yizilayɛma ne kɛ bɛmaa wɔ mbaka bulu nee nwiɔ, abusua ekpunli biala abusua kpanyinli ne ɛdeɛ ko. Kɛlɛ awie biala duma wɔ ye baka ɛdeɛ ne anwo

³na kɛlɛ Aalɔn duma wɔ baka ne mɔɔ gyi Livae agyakɛ anu la anwo. Abusua kpanyinli biala baka ko.

⁴Fa kɔ Ɛdɛnkɛma Ndanlɛ Sua ne anu kɔgua bɛ wɔ Ngyekyeleɛ Ɛlɛka ne anyunlu, ɛleka mɔɔ me nee wɔ yia la.

⁵Na sonla ne mɔɔ menlea nu meye ye la baka ɛdeɛ ne bafifi. Ɔlua adenle ɛhye azo, mebadua Yizilayɛma mɔɔ tendɛ tia wɔ dahuu la.”

⁶Yemɔti Mosisi hanle edwɛkɛ ne hilele Yizilayɛma ne, na bɛ mgbanyima ne mɔ vale bɛ mbaka ne mɔ manle Mosisi, abusua kpanyinli biala ɛdeɛ ko, bɛ muala bɛle bulu nee nwiɔ. Aalɔn baka ɛdeɛ ne boka nwolɛ.

⁷Akee Mosisi vale mbaka ne mɔ hɔguale Ɛdɛnkɛma Ngyekyeleɛ Ɛlɛka ne anyunlu wɔ Ndanlɛ Sua ne anu.

⁸ Aleɛ hyenle na Mosisi hɔle Ndanlɛ Sua ne anu la, ɔnwunle kɛ Aalɔn baka ɛdeɛ ne mɔɔ gyi ɛkɛ maa Livae abusua ekpunli ne la ɛfifi. Baka ne ɛfefɛ nya, ɛbɔ ndotolo na yezo alemɔn ma, bɔbɔ bɛbolo.

⁹Mosisi vale mbaka ne mɔ kɔsɔɔti vindele na ɔvale ɔhilele Yizilayɛma ne. Bɛdabɛ bɛnwunle mɔɔ ɛzi la, na abusua kpanyinli biala yele ye baka ɛdeɛ ne.

¹⁰Ɛdɛnkɛma zele Mosisi kɛ, “Fa Aalɔn baka ɛdeɛ ne sia kɔdo Ngyekyeleɛ Ɛlɛka ne anyunlu. Bɛva bɛzie bɛmaa ɔyɛ kɔkɔbɔlɛ ɔmaa Yizilayɛma mɔɔ te atua la kɛ, saa bɛangyakyi bɛ ɛdendɛlɛ mɔɔ bɛtendɛ bɛtia me la a, bɛbawu.”

¹¹Na Mosisi yɛle mɔɔ Ɛdɛnkɛma zele ye kɛ ɔyɛ la.

¹²Yizilayɛma ne hanle hilele Mosisi kɛ, “Kɛkala ɛdeɛ, yɛ awieleɛ ne ala ɛne!

¹³Awie biala mɔɔ kɛbikye Ɛdɛnkɛma Ndanlɛ Sua ne bɔbɔ la bawu. Asoo ɔwɔ kɛ yɛ muala yɛ bo zo minli ɔ?”