Read Nzema Ɛdi 18 Bible Online

Ɛdi 18 - Nzema bible

Ɛdi 18

¹Akee Ɛdɛnkɛma zele Aalɔn kɛ, “Ɛdawɔ, ɛ mra mrenya nee Livaema a banwu amaneɛ wɔ nvonleɛ biala mɔɔ kɛra Ndanlɛ Sua ne anu gyimayɛlɛ nu la; na ɛdawɔ nee ɛ mra mrenya bɛ ngomekye yɛɛ bɛbanwu amaneɛ wɔ nvonleɛ biala mɔɔ kɛra sɛlɛvolɛma gyimalilɛ ne anu la a.

²Saa ɛ nee ɛ mra mrenya ɛlɛyɛ gyima wɔ Ndanlɛ Sua ne anu a, maa ɛ nwo amra mɔɔ le Livae abusua ekpunli ne ɛboa bɛ.

³Bɛbazonle wɔ na bɛayɛ bɛ gyima ne wɔ Ndanlɛ Sua ne anu, noko ɔnle kɛ bɛbikye ninyɛne nwuanzanwuanza ne mɔ mɔɔ wɔ Ɛleka Nwuanzanwuanza ne la, anzɛɛ azukponle ne anrɛɛ bɛkɛhu bɛ nee ɛdawɔ.

⁴Ɔwɔ kɛ bɛ nee wɔ yɛ gyima na bɛyɛ bɛ gyima mɔɔ bɛyɛ wɔ Ndanlɛ Sua ne anu la amuala. Ɔnle kɛ sonla gyɛne biala yɛ gyima ne bie.

⁵Ɔwɔ kɛ ɛdawɔ nee ɛ mra mrenya angomekye a yɛ gyima wɔ Ɛleka Nwuanzanwuanza ne nee azukponle ne anwo a, amaa meanva Yizilayɛma anwo ɛya bieko.

⁶Na nea, meye ɛ mediema Livaema mevi Yizilayɛma avinli kɛ bɛle wɔ ahyɛlɛdeɛ, bɛdu bɛ bɛmaa medame Ɛdɛnkɛma kɛ bɛyɛ gyima wɔ Ndanlɛ Sua ne anu.

⁷Na ɛdawɔ nee ɛ mra mrenya noko bayɛ bɛ sɛlɛvolɛ gyima ne mɔɔ fane azukponle ne nee Nwuanzanwuanza Nu Nwuanzaanwu ɛleka ne anwo la. Ɛhye mɔ le bɛ gyima, ɔboalekɛ meva sɛlɛvolɛlilɛ ne kɛ ahyɛlɛdeɛ la memaa bɛ. Awie gyɛne biala mɔɔ kɛbikye ninyɛne nwuanzanwuanza ne mɔ la, ɔwɔ kɛ bɛku ye.”

⁸Ɛdɛnkɛma zele Aalɔn kɛ, “Nea, meva azubɔdeɛ biala mɔɔ bɛva bɛrɛlɛ me, debie biala mɔɔ Yizilayɛma ɛdu ɛzie ɛkɛ ɛmaa me la memaa wɔ. Meva memaa wɔ nee ɛ bo zo amra kɛ ɔle bɛ ɛdeɛ dahuu.

⁹Azubɔdeɛ nwuanzanwuanza kpalɛ kpalɛ ne mɔ mɔɔ bɛanyela bɛ wɔ azukponle ne azo, bɛ azubɔdeɛ biala, bɛ ma azubɔdeɛ ne mɔ, mɔɔ bɛva bɛmaa me la le nwuanzanwuanza maa wɔ nee ɛ mra mrenya ne mɔ.

¹⁰Nwu ye kɛ bɛle nwuanzanwuanza, yemɔti ɔwɔ kɛ bɛdi ɛhye mɔ wɔ ɛleka mɔɔ le nwuanzanwuanza la, yɛɛ mrenya ala a ɔwɔ kɛ di bie a.

¹¹“Eza ahyɛlɛdeɛ ngakyile biala mɔɔ Yizilayɛma kɛva kɛmaa me, nee ehono azubɔdeɛ biala le bɛ ɛdeɛ. Meva memaa wɔ, ɛ mra mrenya nee ɛ mra mraalɛ wɔ mekɛ kɔsɔɔti mɔɔ bara la. Wɔ busuanli biala mɔɔ evinli ɛnle ɔ nwo la kola di bie.

¹²“Ɛvolɛ biala egyinli nu bɛyɔba mɔɔ Yizilayɛma kɛlumua kɛbu na bɛkɛva bɛkɛmaa me la, ɔlivi nwole kpalɛ, nwanye nee abɛlɛ, meva memaa wɔ.

¹³Nzoleɛ biala mɔɔ bɛkɛlumua bɛkɛde wɔ azɛlɛ ne azo na bɛkɛva bɛkɛrɛlɛ Ɛdɛnkɛma la le wɔ ɛdeɛ. Wɔ busuanli biala mɔɔ evinli ɛnle ɔ nwo la kola di bie.

¹⁴ “Debie biala mɔɔ wɔ Yizilayɛ azɛlɛ zo, mɔɔ bɛboɔboa bɛva bɛmaa me la le wɔ ɛdeɛ.

¹⁵“Debie biala, sonla anzɛɛ nane mɔɔ kɛlumua kɛbɔ ɛkolɛ na bɛkɛdu bɛkɛmaa Ɛdɛnkɛma la le wɔ ɛdeɛ; noko akee sonla belamunli ralɛ ɛdeɛ, maa bɛkpɔne ye. Nane biala mɔɔ anwo ɛnde la ara mɔɔ lumua la, maa bɛkpɔne ye.

¹⁶Kakula mɔɔ kɛli siane ko la, bɛkpɔne ye dwɛtɛ fufule nnu, kɛmɔ bɛ ezukoa awolɛ si to kɔ la.

¹⁷Na nlankɛ, mboane, yɛɛ mbɔnkye amra mɔɔ lumua la ɛdeɛ ɔnle kɛ bɛkpɔne bɛ; bɛva bɛ bɛbɔ azu, bɛle nwuanzanwuanza. Bɛdo bɛ mogya ne bɛgua azukponle ne anwo na bɛyela bɛ ɛnlome ne kɛ ɔle ɛyelalɛ azubɔdeɛ mɔɔ ye evuanlɛ sɔ Ɛdɛnkɛma anye a.

¹⁸Bɛ nane ne le bɛ ɛdeɛ, kɛmɔ bɛ kɛnrazo ne mɔɔ bɛkɛdo ye ehono nee bɛ ɛzɔlɛ fema ne le bɛ ɛdeɛ la.

¹⁹“Azubɔdeɛ nwuanzanwuanza biala mɔɔ sonle bolɛ, mɔɔ Yizilayɛma kɛva kɛmaa medame Ɛdɛnkɛma la, mefa memaa wɔ, ɛ mra mrenya nee ɛ mra mraalɛ kɛ ɔle bɛ ɛdeɛ dahuu. Ɛhye le ngyekyeleɛ mɔɔ me nee wɔ nee ɛ bo zo amra ɛkyekye mɔɔ bɛntulu ye ɛlɛ a.”

²⁰Ɛdɛnkɛma zele Aalɔn kɛ, “Ɛnrɛnyia agyadeɛ biala wɔ bɛ azɛlɛ ne azo, yɛɛ ɛnrɛnyia kyɛfoa biala wɔ bɛ avinli. Medame a mele wɔ kyɛfoa nee wɔ agyadeɛ wɔ Yizilayɛma avinli a.”

²¹ Ɛdɛnkɛma zele kɛ, “Meva debie biala ngyɛnu bulu ɛkpɔ ko ne mɔɔ Yizilayɛma kɛva kɛrɛlɛ me la memaa Livaema. Ɛhye le gyima mɔɔ bɛyɛ wɔ Ndanlɛ Sua ne anu la kakɛdualɛ.

²²Ɔvi ɛnɛ mɔɔ kɔ la, ɔnle kɛ Yizilayɛnli biala bikye Ndanlɛ Sua ne anwo na ɔyɛ ɛtane ɔtwe ewule ndeanlɛ ɔmaa ɔ nwo.

²³Livaema bayɛ Ndanlɛ Sua ne anwo gyima na bɛdabɛ bɛali bɛ ɛtane nwo ɛzonle. Ɛhye le mɛla mɔɔ bala ɛkɛ amaa bɛ bo zo amra dahuu a. Livaema ɛnrɛnyia agyadeɛ biala wɔ Yizilayɛma avinli.

²⁴Ɔluakɛ meva Yizilayɛma ninyɛne ngyɛnu bulu ɛkpɔ ngoko ne mɔ mɔɔ bɛfa bɛbɔ azu bɛmaa medame Ɛdɛnkɛma la memaa bɛ kɛ ɔle bɛ kyɛfoa. Ɛhye ati a menganle mengilele bɛ kɛ bɛnrɛnyia bɛ ti anwo agyadeɛ wɔ Yizilayɛma avinli la.”

²⁵Ɛdɛnkɛma zele Mosisi kɛ,

²⁶“Ka kile Livaema kɛ saa bɛ sa ka Yizilayɛma ngyɛnu bulu ɛkpɔ ngoko ne mɔ mɔɔ Ɛdɛnkɛma se ɔle bɛ ɛdeɛ la a, bɛdabɛ noko bɛhyɛ nu bulu bɛdu ɛkpɔ ko bɛyɛ azubɔdeɛ bɛmaa Ɛdɛnkɛma kɛ ahyɛlɛdeɛ mɔɔ sonle bolɛ la.

²⁷Azubɔdeɛ ɛhye bayɛ kɛ ma fofolɛ nee nwanye azubɔdeɛ mɔɔ ɛyazonlɛnli fa maa Ɛdɛnkɛma la.

²⁸Bɛdabɛ noko bɛbalua adenle ɛhye anu bɛava azubɔdeɛ ne mɔɔ Yizilayɛma fa maa bɛ la ngyɛnu bulu ɛkpɔ ngoko ne bɛamaa Ɛdɛnkɛma. Bɛva bɛ azubɔdeɛ ne mɔɔ le Ɛdɛnkɛma ɛdeɛ la bɛmaa Sɛlɛvolɛ Aalɔn.

²⁹Bɛva mɔɔ bɛkɛnyia ye la anu kpalɛ kpalɛ ne mɔɔ nwolɛ te na ɔle Ɛdɛnkɛma ɛdeɛ la bɛmaa me.

³⁰Saa bɛfa nuhua kpalɛ kpalɛ ne bɛmaa Ɛdɛnkɛma a, bɛva mɔɔ kɛha la bɛzie bɛmaa Livaema ne kɛ ɔle ma mɔɔ vi ma ɛwozolɛ ɛleka ne, nee nwanye mɔɔ vi nwanyeyɛlɛ ɛleka ne la.

³¹Bɛ nee bɛ mbusuafoɔ bɛli mɔɔ kɛha la wɔ ɛleka biala, ɔboalekɛ ɔle gyima mɔɔ bɛyɛ wɔ Ndanlɛ Sua ne anu la anwo kakɛdualɛ.

³²Sumunli kenle ala mɔɔ bɛlumua bɛva nuhua kpalɛ kpalɛ ne bɛmaa medame Ɛdɛnkɛma la, saa bɛdi a bɛnli fɔlɛ, yɛɛ bɛmmagua Yizilayɛma azubɔdeɛ nwuanzanwuanza ne mɔ anwo evinli, kɛ bɛkɛlumua bɛkɛli bie kolaa na bɛava nuhua kpalɛ kpalɛ ne bɛahɔmaa Ɛdɛnkɛma. Saa bɛyɛ ye zɔhane a, bɛkɛhu bɛ.”