Read Nzema Ɛdi 21 Bible Online

Ɛdi 21 - Nzema bible

Ɛdi 21

¹ Mɔɔ Arelade belemgbunli ne mɔɔ de Keena nyiakɛ afoa nu la dele kɛ Yizilayɛma lua Atalem adenle zo ɛlɛba la, ɔhɔtetale bɛ na ɔhyele bie mɔ nuokɛ.

²Na Yizilayɛma vuale hilele Ɛdɛnkɛma kɛ, “Saa ɛmaa yɛdi menli ɛhye mɔ anwo zo konim a, yɛkɛdu bɛ nee bɛ azuamgbole ne mɔ yɛkɛmaa wɔ na yɛkɛzɛkye bɛ bɔkɔɔ.”

³Ɛdɛnkɛma diele Yizilayɛma ane na ɔboale bɛ ɔmanle bɛlile Keenama anwo zo konim. Yizilayɛma hunle bɛ kɔsɔɔti na bɛbɔle bɛ azuamgbole ne mɔ, yemɔti bɛvɛlɛle ɛleka zɔhane Hɔɔma.[4]

⁴ Yizilayɛma vile Hɔɔ Boka na bɛvale Akaba Ebolo adenle zo, amaa bɛabu bɛahoane Yidɔm maanzinli ne. Na mɔɔ bɛlua adenle zo bɛlɛkɔ la, menli ne annyia abotane

⁵ na bɛdendɛle bɛtiale Nyamenle nee Mosisi kɛ, “Duzu ati yɛɛ bɛva yɛ bɛvi Yigyibiti bɛmaa yɛarawu fienemgbole ye anu a? Ɔluakɛ aleɛ ɛnle ɛke yɛɛ nzule bɔbɔ, bie ɛnle ɛke. Aleɛ funli ɛhye, yɛnrɛhola bieko di.”

⁶Akee Ɛdɛnkɛma manle nwɔlɛ anwo ɛzulolɛ bie rakekale Yizilayɛma ne hunle bie mɔ.

⁷Na menli ne rale Mosisi anwo ɛkɛ, na bɛhanle kɛ, “Yɛyɛ ɛtane, ɔluakɛ yɛdendɛ yɛtia Ɛdɛnkɛma nee ɛdawɔ. Sɛlɛ Ɛdɛnkɛma maa ɔmaa nwɔlɛ ɛhye mɔ ɛhɔ.” Yemɔti Mosisi zɛlɛle manle menli ne.

⁸Na Ɛdɛnkɛma zele Mosisi kɛ, “Fa kɔbele yɛ ɛwɔlɛ na kenda ye baka zo, amaa awie biala mɔɔ nwɔlɛ ne mɔ bie kɛha ye la, kɛ ɔto ɔ nye yeanlea kɔbele ɛwɔlɛ ne la ɛnee yede kpɔkɛ.”

⁹Yemɔti Mosisi yɛle kɔbele ɛwɔlɛ na ɔhendanle ye baka zo. Awie biala mɔɔ ɛwɔlɛ hale ye na ɔdole ɔ nye ɔnleanle ye la dele kpɔkɛ.

¹⁰Yizilayɛma zɔle bɛ adendulɛ ne azo na bɛrazokoɛle Obo.

¹¹Bɛvi ɛkɛ ne la, bɛrazokoɛle Abalem, wɔ fienemgbole ne mɔɔ wɔ Mowabe maanzinli ne aduduleɛ afoa nu la anu.

¹²Akee bɛvile ɛkɛ bɛhɔyɛle azokoɛleɛ wɔ Zɛlɛde Bɔnza ne anu.

¹³Eza bɛvi ɛkɛ ne bɛdule bɛ bo bɛrazokoɛle Azule Anɔn ne sɔlɔ afoa nu fienemgbole ne mɔɔ di kɔ Amɔle maanzinli nu la anu. (Azule Anɔn le ɛweɛne mɔɔ la Mowabema nee Amɔlema avinli a.)

¹⁴Ɛhye ati a Ɛdɛnkɛma Konle ne mɔ Buluku ne ka kɛ, “… Weehɛbe mɔɔ wɔ Sufa, nee Azule Anɔn mbɔnza ne mɔ,

¹⁵nee mbɔnza ne mɔ ndololeɛ nu mɔɔ tɛlɛ dwu Aale sua zo mɔɔ kɔdwu Mowabe ɛweɛne zo,” la.

¹⁶Bɛvi ɛkɛ ne la, bɛhɔle Biiyɛ, yemɔ a le bula ne mɔɔ ɛkɛ ne a Ɛdɛnkɛma zele Mosisi kɛ, “Boɔboa menli ne anloa na menwɔmaa bɛ nzule la.”

¹⁷Na akee Yizilayɛma dole edwɛne ɛhye: “Bula, maa nzule ɛrɛla; Bɛdo edwɛne bɛmaa ye!

¹⁸Bula mɔɔ arelemgbunli Nee menli ne mgbanyima Vale dehelɛ tumi dadeɛ Nee bɛ agbɔma bɔle la.” Bɛvile fienemgbole ne anu bɛhɔle Mateena,

¹⁹bɛvi Mateena bɛhɔle Nahaleɛle, yɛɛ bɛvi Nahaleɛle bɛhɔle Beemo.

²⁰Akee bɛvi Beemo la, bɛhɔle bɔnza ne mɔɔ wɔ Mowabe maanzinli ne mɔɔ wɔ Pesega Boka ne mɔɔ wɔ ɛsɛlɛ ne anloa la anu.

²¹Akee Yizilayɛma zoanle menli wɔ Amɔle Belemgbunli Saehɔn ɛkɛ manle bɛhɔzele ye kɛ,

²²“Maa yɛ adenle maa yɛraze wɔ azɛlɛ ne azo yɛhɔ. Yɛdua ademgbole ne ala anu. Yɛnrɛmakyi ɛya anzɛɛ vanye egyinli biala anu, yɛnrɛnlo bula nu nzule biala. Yɛnrɛmakyi bɛne anzɛɛ fema zo toonwo yɛkɛpɛ nu wɔ maanzinli ne anu.”

²³Na Saehɔn ammaa Yizilayɛma adenle yeammaa bɛanlua ye maanzinli ne anu. Ɔboɔboale ye ɛlɔnema ne anloa ɔhɔle Gyeehaze fienemgbole ne anu na ɔvale konle ɔdoale Yizilayɛma.

²⁴Na Yizilayɛma ne hunle ye na bɛvale ye maanle ne, ɔvi Azule Anɔn ne anloa ɔhɔdwule Azule Gyabɔko ne anloa, toonwo bɛdwule Amɔlema ɛweɛne zo wɔ Gyeezɛ, ɔboalekɛ Amɔlema azɛlɛ ne anloa pɛ Gyeezɛ.

²⁵Yemɔti Yizilayɛma vale Amɔlema azuamgbole ne mɔ kɔsɔɔti na bɛdɛnlanle zolɛ, Hɛhyebɔn nee azua mɔɔ zuozua ye la kɔsɔɔti boka nwolɛ.

²⁶Hɛhyebɔn le Amɔle Belemgbunli Saehɔn mɔɔ honle vale Mowabe belemgbunli dɛba ne na ɔvale ye azɛlɛ ne kɔsɔɔti toonwo ɔhɔdwule Azule Anɔn ne anloa la suakpole.

²⁷Ɛhye ati a edwɛkɛdwɛndolɛma edwɛne se kɛ, “Bɛla Hɛhyebɔn, bɛkyekye ye bieko. Maa bɛkyekye Saehɔn suakpole.

²⁸Kenle ko bie, Hɛhyebɔn suakpole ye azo, Saehɔn ɛlɔnema ne dule kɛ senle Hɔzɛkyele suakpole Aale mɔɔ wɔ Mowabe, Na ɔzɛkyele Anɔn sɔlɔ awoka ne mɔ.

²⁹Munzule ɛha wɔ, O Mowabe! Bɛmɛ mɔɔ bɛsonle Kimɔhye! Bɛ awieleɛ ɛwie bɛ! Yemaa ɔ mra mrenya ɛyɛ nriandivoma, Na ɔ mra mraalɛ ɛdɔ donvula Wɔ Amɔle Belemgbunli Saehɔn asa anu.

³⁰Yemɔti bɛ bo zo amra abo dule Hɛhyebɔn, Toonwo ɔhɔdwule Daebɔn, Ɔvi Nahyem ɔkɔdwu Nofa mɔɔ zua Midɛba.”

³¹Yemɔti Yizilayɛma dɛnlanle Amɔlema maanle ne anu.

³²Na Mosisi zoanle menli kɛ bɛhɔkpondɛ adenle mɔɔ bɛpe nu bɛateta suakpole Gyeezɛ la. Yizilayɛma vale suakpole ne nee azua mɔɔ zuozua ye la, na bɛvoanle Amɔlema mɔɔ de ɛkɛ la.

³³Akee Yizilayɛma ziale hɔvale Beehyan adenle zo, na Beehyan Belemgbunli Ɔɔgo nee ye ɛlɔnema ne vindele ratetale bɛ wɔ Ɛdelɛyae.

³⁴Ɛdɛnkɛma zele Mosisi kɛ, “Mmasulo ye. Memaa wɔali ye nee ye menli ne kɔsɔɔti anwo zo konim na wɔava azɛlɛ ne. Yɛ ye kɛ ɛyɛle Amɔle Belemgbunli Saehɔn mɔɔ ziele Hɛhyebɔn la.”

³⁵Yemɔti Yizilayɛma hunle Ɔɔgo, ɔ mra mrenya yɛɛ ye menli ne mɔ kɔsɔɔti, ko bɔbɔ anga, na bɛvale ye azɛlɛ ne bɛdɛnlanle zolɛ.