Read Nzema Ɛdi 25 Bible Online

Ɛdi 25 - Nzema bible

Ɛdi 25

¹Mɔɔ Yizilayɛma yɛle azokoɛleɛ wɔ Akasea Bɔnza la, Yizilayɛ mrenya bɔle ɔ bo kɛ bɛ nee Mowabe mraalɛ bɔ adwɔmane ɛbɛla.

²Mowabe mraalɛ ne mɔ dole ɛsalɛ vɛlɛle Yizilayɛ mrenya wɔ bɛ bozonle Beeyale ne azubɔlɛ ɛkponledolɛ bo. Yizilayɛma nee bɛ lile na bɛbɔle bɛ ti aze bɛmanle bɛ bozonle Beeyale ne.

³Yemɔti Yizilayɛma vale bɛ nwo wulale bozonle Beeyale mɔɔ wɔ Piyɔ la ɛzonlenlɛ nu. Na Ɛdɛnkɛma vale bɛ nwo ɛya

⁴na ɔzele Mosisi kɛ, “Fa Yizilayɛ mgbanyima ne mɔ kɔsɔɔti na kendɛhenda bɛ ewia ne anu maa bɛwu, amaa medame Ɛdɛnkɛma me ɛya kpole ne aye Yizilayɛma anwo zo.”

⁵Na Mosisi hanle hilele Yizilayɛ mgbanyima ne kɛ, “Awie biala ɛhu ye menli mɔɔ wɔ ye abusua ekpunli ne anu, mɔɔ ɛzonle Piyɔ bozonle Beeyale la.”

⁶Yizilayɛma ne mɔ ko vale Medea raalɛ rawolole ye ndanlɛ sua ne anu wɔ Mosisi nee menli ne kɔsɔɔti anye zo, wɔ mekɛ mɔɔ ɛnee bɛlɛsu wɔ Ɛdɛnkɛma Ndanlɛ Sua ne anyunlu la.

⁷Mɔɔ Sɛlɛvolɛ Aalɔn ara Ɛlieza ara Fenɛhaze nwunle nyɛleɛ mɔɔ Yizilayɛnli ne nee Medea raalɛ ne ɛlɛyɛ la, ɔvi menli ne avinli ɔdwazole. Ɔvale atwɛ

⁸ɔhɔle nrenya ne nee raalɛ ne anwo zo wɔ ndanlɛ sua ne anu, na ɔwowɔle bɛ ɔhunle bɛ. Ɛhye manle ewulenzane mɔɔ rale Yizilayɛma anwo zo la gyakyile,

⁹noko ɛnee ewulenzane ne ɛlumua ɛhu menli apenle ngoko abulanwiɔ nee nna.

¹⁰Na Ɛdɛnkɛma zele Mosisi kɛ,

¹¹“Ɔlua mɔɔ Sɛlɛvolɛ Aalɔn ara Ɛlieza ara Fenɛhaze ɛyɛ la ati, megyakyi Yizilayɛma anwo ɛya ne mɔɔ menvale la anu. Ɔliele me ti nungule ɔhwenle, yemɔti a meambɔ Yizilayɛma abo zo wɔ me ɛyavalɛ nu a.

¹²Zɔhane ati ka kile ye kɛ me nee ye ɛkyekye anzonudwolɛ ngyekyeleɛ;

¹³ɔdaye nee ɔ bo zo amra bayɛ sɛlɛvolɛma mɔɔ ɛmbɔ aze ɛlɛ a, ɔboalekɛ ɔhwenle ye Nyamenle ne ati nungule ɔvale ɔkpɔdale Yizilayɛma ati.”

¹⁴Bɛfɛlɛ Yizilayɛnli ne mɔɔ bɛhunle ye nee Medean raalɛ ne la Zemelae. Ɔ ze a le Seelu mɔɔ le Semɛyɔn abusua ekpunli ne anu abusua ekpulike ko abusua kpanyinli la.

¹⁵Bɛfɛlɛ Medean raalɛ ne noko Kɔzobae. Ɔ ze Zɛɛ le Medean mbusua ekpulike ne mɔ anu ko abusua kpanyinli.

¹⁶Na Ɛdɛnkɛma zele Mosisi kɛ,

¹⁷“Kɔteta Medeanema na ku bɛ,

¹⁸ɔboalekɛ bɛyɛle wɔ ɛtane kɛ bɛbɛlɛbɛlale wɔ wɔ Piyɔ, yɛɛ Kɔzobae, Medean belemgbunli ne ara raalɛ ne mɔɔ bɛhunle ye wɔ Piyɔ wɔ ewulenzane mekɛ ne anu la ati.”