Read Nzema Ɛdi 33 Bible Online

Ɛdi 33 - Nzema bible

Ɛdi 33

¹Azokoɛleɛ dodo mɔɔ Yizilayɛma mɔɔ ɛnee Mosisi nee Aalɔn li bɛ ti la yɛle, wɔ mekɛ mɔɔ bɛvi Yigyibiti bɛdule bɛ bo la ɛne:

²Ɛdɛnkɛma manle Mosisi hɛlɛle ɛleka biala mɔɔ bɛkɛyɛ azokoɛleɛ la duma.

³Yizilayɛma dule bɛ bo wɔ Yigyibiti wɔ ɛvolɛ ne anu siane ne mɔɔ lumua la anu, ye kenle bulu nee nnu ne azo. Bɛlile Akpabɛnwo ne la, ye alehyenlɛ nu yɛɛ Yizilayɛma dule bɛ bo wɔ Relamɛsize konimlilɛ nu wɔ Yigyibitima anye zo,

⁴wɔ mekɛ mɔɔ ɛnee Yigyibitima anye ɛbolo bɛlɛsie bɛ belamunli mralɛ mrenya mɔɔ Ɛdɛnkɛma ɛhu bɛ la avunli ne mɔ la. Ɛdɛnkɛma yɛle ɛhye hilele kɛ ɔlɛ tumi ɔtɛla Yigyibiti awozonle kɔsɔɔti.

⁵Yemɔti Yizilayɛma dule bɛ bo wɔ Relamɛsize na bɛrayɛle azokoɛleɛ wɔ Sɛko.

⁶Bɛvi Sɛko la, bɛrayɛle azokoɛleɛ bieko wɔ Yitam, wɔ fienemgbole ne anloa.

⁷Bɛvi Yitam bɛziale bɛ nzi bɛhɔle Pae Hahaelo, wɔ Beeyale Zifɔn aduduleɛ afoa nu, na bɛyɛle azokoɛleɛ wɔ mɔɔ ɔka ekyii bɛdwu Megedɔ la.

⁸Bɛvile Pae Hahaelo na bɛpɛle Nyevile Kɔkɔlɛ ne, bɛdiale kenle nsa adenle bɛhɔle Hyɔɔ fienemgbole ne anu, na bɛyɛle azokoɛleɛ wɔ Mɛɛla.

⁹Bɛvi ɛkɛ ne la, bɛhɔle Yilem na bɛyɛle azokoɛleɛ wɔ ɛkɛ, ɔboalekɛ ɛnee nzule mɔɔ vi azɛlɛ bo la bulu nee nwiɔ, yɛɛ mrɛlɛ abulasuu wɔ ɛkɛ.

¹⁰Bɛvile Yilem na bɛhɔyɛle azokoɛleɛ wɔ Suwɛze, wɔ Ndɔ Nyevile ne anloa.

¹¹Bɛvi ɛkɛ ne la, bɛhɔzokoɛle Sen fienemgbole nu.

¹²Bɛvile Sen fienemgbole nu bɛhɔyɛle azokoɛleɛ wɔ Dɔfeka.

¹³Bɛvi Dɔfeka la, bɛhɔyɛle azokoɛleɛ wɔ Ɛlɛhye,

¹⁴yɛɛ bɛvi Ɛlɛhye la, bɛhɔyɛle azokoɛleɛ wɔ Relɛfedem, ɛke ɛnee bɛnnyia nzule fee mɔɔ bɛno a.

¹⁵Bɛvi Relɛfedem mɔɔ bɛkadwu Hɔɔ Boka la, bɛyɛle azokoɛleɛ wɔ ɛleka ɛhye mɔ: Saenae Fienemgbole nu, Kebulo Hateeyava[5], Hazilo, Reletema, Relemɔn Pɛlɛze, Lebena, Relesa, Kihɛleeta, Hyifɛ Boka, Haleeda, Makilo, Teehate, Tɛla, Meteka, Hahyemona, Mosɛlo, Bɛni Gyeeyakan, Hɔɔ Hagedegade, Dwɔtobata, Abulona, Ɛzeɔngibɛ, Zen fienemgbole nu anzɛɛ Keedɛhye, yɛɛ Hɔɔ Boka, mɔɔ wɔ Yidɔm azɛlɛ ne ɛweɛne zo la.

³⁸Na Ɛdɛnkɛma manle Sɛlɛvolɛ Aalɔn hɔle Hɔɔ Boka ne azo. Ɛnee yeli ɛvolɛ ɛya ko abulanwiɔ nee nsa, na ɛkɛ ne yɛɛ ɔwule a. Mɔɔ Yizilayɛma dule bɛ bo wɔ Yigyibiti la, ye ɛvolɛ abulanla ne anu, siane ne mɔɔ tɔ zolɛ nna, ye kenle ne mɔɔ lumua la yɛɛ ɔwule a.

⁴⁰ Keenanli Belemgbunli Ɛlade mɔɔ de maanle ne nyiakɛ la dele kɛ Yizilayɛma ɛlɛba.

⁴¹Mɔɔ Yizilayɛma vi Hɔɔ Boka la, bɛyɛle azokoɛleɛ wɔ ɛleka ɛhye mɔ: Zalemona, Punɔn, Obo, Abalem, mɔɔ wɔ Mowabe maanzinli nu, Daebɔn Gaade, Alemɔn Debelateeyem, Abalem Boka, mɔɔ zua Nibo Boka, yɛɛ Mowabe ɛsɛlɛ ne mɔ anu. Bɛdɛnlanle Azule Dwɔdan ne anloa wɔ Gyɛleko yɛɛ Bɛte Gyɛhyemo toonwo kɔdwu Akasea Bɔnza.

⁵⁰Wɔ Mowabe ɛsɛlɛ ne mɔɔ wɔ Dwɔdan ne anloa, mɔɔ zua Gyɛleko la, Ɛdɛnkɛma zele Mosisi kɛ,

⁵¹“Ka kile Yizilayɛma kɛ saa bɛpɛ Azule Dwɔdan ne bɛkɔdwu Keena azɛlɛ zo a,

⁵²bɛvoa menli mɔɔ de azɛlɛ ne azo la. Bɛzɛkye bɛ awolɛ nee mbulalɛ mmonle ne mɔ nee ɛleka mɔɔ bɛsɔ bɛ la kɔsɔɔti.

⁵³Bɛva azɛlɛ ne bɛdɛnla zolɛ, ɔboalekɛ melɛfa meamaa bɛ.

⁵⁴ Bɛgua nzeleba bɛhyɛ azɛlɛ ne bɛmaa mbusua ekpunli ekpunli ne nee mbusua ekpulike ekpulike ne mɔ. Bɛmaa abusua ekpulike mɔɔ anwo zonle la azɛlɛ kpole, yɛɛ ekpulike mɔɔ le ekyi la azɛlɛ ekyi.

⁵⁵Saa bɛandu menli mɔɔ de azɛlɛ ne azo la a, ekyi bɔbɔ mɔɔ kɛha la bawowɔ bɛ nye mbaka na bɛayɛ kɛ mbowule mɔɔ ɛlɛwowɔ bɛ nvenle la, na bɛagyegye bɛ wɔ azɛlɛ ne mɔɔ bɛde zolɛ la azo.

⁵⁶“Na anrɛɛ mɔɔ mevua kɛ mebava meayɛ menli zɔhane la, mebava meayɛ bɛmɛ.”