Read Nzema Ɛdi 34 Bible Online

Ɛdi 34 - Nzema bible

Ɛdi 34

¹Ɛdɛnkɛma zele Mosisi kɛ,

²“Ka kile Yizilayɛma kɛ: Saa bɛdwu Keena azɛlɛ ne azo, azɛlɛ ne mɔɔ melɛfa meamaa bɛ la azo a, bɛgyigya ɛweɛne ne mɔ zɛhae:

³Nyiakɛ ɛweɛne ne bɔ ye Zen fienemgbole nu, ɔlua Yidɔm afoa nu. Ɔbɔ ɔ bo wɔ aduduleɛ afoa nu wɔ Nyevile Wulera ne nyiakɛ.

⁴Na ɛweɛne ne abele ɔ nwo wɔ Akelabem Ademgbolezo nyiakɛ, yeapɛ nu wɔ Zen na yeahɔdwu Keedɛhye Baanɛya nyiakɛ. Akee ɔtenrɛ ɔ nwo ɔkɔ Heeza Adaa na ɔkɔ Azemɔn.

⁵Ɔdwu ɛkɛ a ɔkakyi ɔ nwo ɔkɔ bɔnza ne mɔɔ wɔ Yigyibiti ɛweɛne zo la anu, na yeahɔgua ye Mɛdetɛlenia Nyevile ne anloa.

⁶“Adɔleɛ afoa nu ɛweɛne ne a le Mɛdetɛlenia Nyevile ne.

⁷“Sɔlɔ ɛweɛne ne vi Mɛdetɛlenia Nyevile ne anloa kɔdwu Hɔɔ Boka,

⁸na ɔvi ɛkɛ ne yeahɔ Heemate Ademgbolezo. Ɔbadoa zo yeahɔ Zidade,

⁹na eza yeahɔ Zefɔlɔn, na yeahɔgua ye Heeza Yinan.

¹⁰“Aduduleɛ ɛweɛne ne vi Heeza Yinan kɔdwu Hyifam.

¹¹Akee ɔbawɔne ɔ ti nyiakɛ yeahɔ Habɛle wɔ Eyen aduduleɛ, na yeahɔ Galeli Tandane ne aduduleɛ ɛvoleɛ.

¹²Ɔdwu ɛkɛ a ɔbawɔne ɔ ti aze yeava nyiakɛ, yealua Azule Dwɔdan ne anloa yeahɔgua ye Nyevile Wulera ne anloa. “Bɛ azɛlɛ ne ɛweɛne nna ne, bɛmɛ ɛ.”

¹³ Mosisi hanle hilele Yizilayɛma kɛ, “Azɛlɛ ne mɔɔ Ɛdɛnkɛma ɛva ɛmaa mbusua ekpunli ngɔnla nee foa ne, mɔɔ bɛbagua nwolɛ nzeleba bɛahyɛ bɛava la ɛne.

¹⁴Wulubɛn nee Gaade mbusua ekpunli ne mɔ nee Manasɛ abusua ekpunli ne foa ko asa ɛha bɛ afoa nu ɛdeɛ

¹⁵wɔ Dwɔdan aduduleɛ afoa nu mɔɔ bikye Gyɛleko la.”

¹⁶Ɛdɛnkɛma zele Mosisi kɛ,

¹⁷“Sɛlɛvolɛ Ɛlieza nee Nɛn ara Dwɔhyua a bahyɛ azɛlɛ ne amaa menli ne a.

¹⁸Bɛye mbusua ekpunli ne mɔ mgbanyima ngoko bɛmaa bɛboa bɛ bɛmaa bɛhyɛ azɛlɛ ne.”

¹⁹Menli ɛhye mɔ a Ɛdɛnkɛma yele bɛ a: [Abusua Ekpunli] — [Abusua Kpanyinli] Dwuda — Gyɛfɛni ara nrenya Kalɛbe Semɛyɔn — Amehɛde ara nrenya Hyɛlumeɛle Bɛngyaman — Keleselɔn ara nrenya Yilaedade Dan — Dwɔgelae ara nrenya Bɛkae Manasɛ — Yifɔdo ara nrenya Haneɛle Yifelaem — Hyefetan ara nrenya Kɛmuwɛle Zɛbulɛn — Panake ara nrenya Yilaezeefan Yesakaa — Azan ara nrenya Paleteɛle Ahya — Hyɛlomae ara nrenya Ahaehɛde Nafetalae — Amehɛde ara nrenya Pɛdaahɛle

²⁹Menli ɛhye mɔ a Ɛdɛnkɛma yele bɛ manle bɛhyɛle Keena azɛlɛ ne bɛmanle Yizilayɛma a.