Read Nzema Ɛdi 36 Bible Online

Ɛdi 36 - Nzema bible

Ɛdi 36

¹Meekɛ ara Geleade mɔɔ le Dwosefi ara Manasɛ anlɔnra la mbusua ekpulike ekpulike ne mgbanyinli nee Yizilayɛ mgbanyima ne mɔ hɔle Mosisi anwo ɛkɛ.

² Bɛhanle kɛ, “Ɛdɛnkɛma se ɛgua nzeleba na ɛhyɛ azɛlɛ ne ɛmaa Yizilayɛma. Eza ɔse ɛva yɛ diema Zilɔfɛhade agyadeɛ ne mɔ ɛmaa ɔ mra mraalɛ ne mɔ.

³Noko akee saa mrenya mɔɔ vi abusua gyɛne nu la gyigya bɛ a, ninyɛne zɔhane mɔ bapɛ ali mbusua ekpunli zɔhane lɔ, yemɔti yɛ agyadeɛ ne azo bade.

⁴Wɔ Ninyɛne Ɛzianenlɛ Ɛvolɛ ne anu, mekɛ mɔɔ bɛsiane ninyɛne mɔɔ bɛdɔnenle bɛ la bɛkɔmaa bɛ menle mɔ la dwu a, bɛbava Zilɔfɛhade amra mraalɛ agyadeɛ ne mɔ bɛahɔboka mbusua ekpunli ne mɔɔ nuhua mrenya ɛgyigya bɛ la ɛdeɛ ne mɔ anwo, na yɛmɛ yɛ abusua ekpunli ne aminli agyadeɛ ɛhye mɔ.”

⁵Yemɔti Mosisi vale Ɛdɛnkɛma mɛla ɛhye manle Yizilayɛma. Ɔse, “Edwɛkɛ mɔɔ Dwosefi abusua ekpunli ne anu amra ɛha la le fɔɔnwo,

⁶yemɔti Ɛdɛnkɛma se, ‘Zilɔfɛhade amra mraalɛ ne mɔ lɛ adenle gya mrenya mɔɔ bɛdabɛ bɛkulo la, noko bɛgya mrenya mɔɔ vi bɛdabɛ bɛ ze abusua ekpunli ne anu la.

⁷Ɔnle kɛ bɛfa Yizilayɛma mbusua ekpunli ne mɔ anu agyadeɛ ne bie bɛfi ko anu bɛkɔ ko anu. Ɔwɔ kɛ abusua ekpunli ko biala sɔ ye agyadeɛ ne mɔ anu kpundii.

⁸Ɔwɔ kɛ raalɛ biala mɔɔ kɛli agya wɔ Yizilayɛ abusua ekpunli nu la gya nrenya mɔɔ vi abusua ekpunli ko ne ala anu la. Ɛhye bamaa Yizilayɛnli biala asa aha ye mgbanyima anzɛɛ ɔ ze mɔ agyadeɛ ne mɔ,

⁹na agyadeɛ ne mɔ vi abusua ekpunli ko anu angɔ abusua ekpunli gyɛne nu.’ ”

¹⁰Yemɔti Zilɔfɛhade amra mraalɛ ne mɔ, Maala, Tɛza, Hɔgela, Melekaa, yɛɛ Nowa yɛle kɛmɔ Ɛdɛnkɛma zele Mosisi la. Bɛgyigyale bɛ ze mɔ amediema mrenya ne mɔ amra mrenya.

¹²Bɛgyigyale Dwosefi ara Manasɛ abusua ekpunli ne mbusua ekpulike ekpulike ne mɔ anu mrenya. Yemɔti bɛ agyadeɛ ne mɔ hale bɛ ze mɔ abusua ekpunli ne anu.

¹³Mɛla ɛhye mɔ a Ɛdɛnkɛma luale Mosisi anwo zo vale manle Yizilayɛma wɔ Mowabe ɛsɛlɛ ne anu, wɔ Azule Dwɔdan ne anloa, mɔɔ bikye Gyɛleko la a.