Read Nzema Ɛdi 9 Bible Online

Ɛdi 9 - Nzema bible

Ɛdi 9

¹ Mɔɔ Yizilayɛma vile Yigyibiti azɛlɛ zo la, ye ɛvolɛ nwiɔ ne anu na siane ne mɔɔ lumua la anu, Ɛdɛnkɛma dendɛle hilele Mosisi wɔ Saenae fienemgbole ne anu. Ɔse,

²“Saa mekɛ ne dwu a maa Yizilayɛma ɛli Akpabɛnwo Ɛvoyia ne.

³Siane ɛhye, ye kenle mɔɔ tɔ zolɛ bulu nee nna ne la, ye nɔsolɛ nu, bɛli Akpabɛnwo Ɛvoyia ne, kɛmɔ nwolɛ mɛla nee ngyehyɛlɛ ne mɔ se la.”

⁴Na Mosisi hanle hilele Yizilayɛma amuala kɛ bɛli Akpabɛnwo Ɛvoyia ne.

⁵Yemɔti siane ne mɔɔ lumua la, ye kenle ne mɔɔ tɔ zolɛ bulu nee nna ne la nɔsolɛ nu, Yizilayɛma lile Akpabɛnwo Ɛvoyia ne wɔ Saenae fienemgbole ne anu, kɛmɔ Ɛdɛnkɛma zele Mosisi ala la.

⁶Na menli bie wɔ bɛ nuhua mɔɔ ɛnee evinli ɛha bɛ a, ɔboalekɛ bɛvale bɛ sa bɛhanle funli, amaa ɔlua zolɛ kenle ko ne bɛangola bɛanli Akpabɛnwo Ɛvoyia ne bie. Na bɛhɔle Mosisi nee Aalɔn anwo ɛkɛ

⁷bɛhɔhanle kɛ, “Evinli ɛha yɛ, ɔboalekɛ yɛva yɛ sa yɛha funli, na duzu ati a ɔnle kɛ bɛmaa yɛ adenle bɛmaa yɛboka Yizilayɛma anwo na yɛfa yɛ azubɔdeɛ yɛkɔmaa Ɛdɛnkɛma ɛ?”

⁸Mosisi buale kɛ, “Bɛhendɛ toonwo kɔkpula kɛ menwɔnyia mualɛ menwɔvi Ɛdɛnkɛma lɔ la.”

⁹Ɛdɛnkɛma zele Mosisi kɛ

¹⁰ɔha ɔhile Yizilayɛma kɛ, “Saa evinli ɛha bɛ nuhua bie anzɛɛ bɛ bo zo amra bie, ɔluakɛ yeva ɔ sa yeha funli anzɛɛ yedu adenle yehɔ maanle zo na ɔkulo kɛ ɔdi Akpabɛnwo Ɛvoyia ne a, ɔlɛ adenle kɛ nzinlii ɔdi ɛvoyia ne.

¹¹Ɔwɔ kɛ ɔdi ye siane nwiɔ ne anu ye kenle ne mɔɔ tɔ zolɛ bulu nee nna la nɔsolɛ nu. Bɛva kpanwo mɔɔ mgbɔvonle ɛnle nu nee nya nya ɛnwonle bɛli Ɛvoyia ne.

¹² Bɛmmagyakyi aleɛ ne bie bɛmaa aleɛ kye zolɛ, yɛɛ bɛmmabɔ nane ne bowule biala anu. Bɛli Akpabɛnwo Ɛvoyia ne, kɛmɔ ngyehyɛlɛ ne mɔ se la.

¹³Awie biala mɔɔ evinli ɛtɛkanle ye, yɛɛ ɔtɛtule adenle na yeanli Akpabɛnwo Ɛvoyia ne la, ɔwɔ kɛ bɛye ye bɛfi ye menli ne avinli, ɔboalekɛ mekɛ ne dwule la, yeanva Ɛdɛnkɛma azubɔdeɛ ne yeamaa ye. Sonla zɔhane ɛtane zo ye.

¹⁴“Saa ɛyɛvolɛ mɔɔ wɔ bɛ avinli la kulo kɛ ɔdi Akpabɛnwo Ɛvoyia ne bie a, ɔli ye kɛmɔ nwolɛ mɛla nee nwolɛ ngyehyɛlɛ ne mɔ se la. Mɛla ɛhye wɔ ɛkɛ maa awie biala, ɛyɛvolɛ anzɛɛ ekulomeni.”

¹⁵Kenle ko ne mɔɔ bɛzile Ɛdɛnkɛma Ndanlɛ Sua ne la, amungu rahedale zolɛ. Nɔɔzo ɛnee amungu ne ɛdɔlɔ kɛ senle la, ɔsɔ toonwo aleɛ kye, na alehyenlɛ nu ɛnee amungu ne ala a heda zolɛ a.

¹⁷Kenle biala mɔɔ amungu ne vi Ɛdɛnkɛma Ndanlɛ Sua ne azo kɛdu ɔ bo la, ɛnee Yizilayɛma ne bɛdabɛ bɛdu bɛ bo bɛlɛkɔ. Ɛleka biala mɔɔ amungu ne kɛgyinla la, ɛnee Yizilayɛma ne ɛkyekye azokoɛleɛ ɛkɛ.

¹⁸Saa Ɛdɛnkɛma se Yizilayɛma kɛ bɛhɔ a, ɛnee bɛlɛkɔ; saa Ɛdɛnkɛma se bɛ kɛ bɛkyekye azokoɛleɛ a, ɛnee bɛkyekye. Melɛ tendenle biala mɔɔ amungu ne zinze Ɛdɛnkɛma Ndanlɛ Sua ne ati zo la, Yizilayɛma ne ɛndu bɛ bo.

¹⁹Saa amungu ne sinze Ndanlɛ Sua ne azo kyɛ a, Yizilayɛma ne yɛ tieyɛ maa Ɛdɛnkɛma, bɛndu bɛ bo.

²⁰Ɔdwu mekɛ ne bie a amungu ne gyinla Ɛdɛnkɛma Ndanlɛ Sua ne ati zo kenle ekyi bie ala, noko saa Ɛdɛnkɛma se bɛ kɛ bɛhɔ a, ɛnee bɛlɛkɔ. Saa Ɛdɛnkɛma se bɛ kɛ bɛdɛnla ɛkɛ a, ɛnee bɛdɛnla ɛkɛ.

²¹Ɔdwu mekɛ ne bie a amungu ne gyinla, ɔvi nɔsolɛ ɔkɔdwu nwonlomɔ ala, noko saa ɔye ɔ nwo Ɛdɛnkɛma Ndanlɛ Sua ne azo alehyenlɛ ne anu ala a, ɛnee bɛdabɛ noko bɛdu bɛ bo. Saa amungu ne twe ɔ nwo fi Ndanlɛ Sua ne azo ala a, ɔwɔ kɛ bɛtu bɛ bo.

²²Saa kenle nwiɔ o, siane ko o, ɛvolɛ ko anzɛɛ ɔbo o, sumunli kenle ala mɔɔ amungu ne wɔ Ɛdɛnkɛma Ndanlɛ Sua ne azo anwuma la, bɛndu bɛ bo; na kɛ ɔye ɔ nwo zolɛ la, ɛnee bɛdu bɛ bo.

²³Bɛlile azokoɛleɛ kyekyetu. Bɛyɛle ɛhye bɛvale bɛyɛle tieyɛ bɛmanle Ɛdɛnkɛma wɔ mɔɔ ɔluale Mosisi anwo zo ɔhanle ɔhilele bɛ la anwo.