Read Nzema Mae 1 Bible Online

Mae 1 - Nzema bible

Mae 1

¹Wɔ Dwuda arelemgbunli Dwɔtam, Ehaze, yɛɛ Hɛzikaya mekɛ zo, Ɛdɛnkɛma dendɛle hilele Maeka mɔɔ vi Molɛhyɛte la. Edwɛkɛ ne fane Samɛlea nee Gyɛlusalɛm anwo.

²Maanle maanle, bɛ muala bɛdie; bɛdie, O azɛlɛ ye nee zolɛ ninyɛne kɔsɔɔti; Awulae Nyamenle badendɛ atia bɛ, Awulae badendɛ avi ye anwuma lɔ sua nwuanzanwuanza ne anu.

³Ɔluakɛ bɛnlea, Ɛdɛnkɛma vi ɛleka mɔɔ ɔde la ɔlɛba, ɔbara yearaluolua ewiade awoka mgbole ne mɔ azo.

⁴Awoka ne mɔ baholo ɔ gyakɛ abo, mbɔnza ne mɔ anu badudu ahuma mgbole; bɛbaholo kɛ ɛyɛlɛ mɔɔ ɛha senle la, na bɛaze kɛ azule mɔɔ vi boka kyengye zo ɛlɛwola la.

⁵Yizilayɛma mɛladonlɛ nee bɛ ɛtane ne mɔ ati yɛɛ ɛhye mɔ bazi a. Yizilayɛma mɛladonlɛ ne a le boni? Asoo tɛ Samɛlea ɔ? Dwudama ɛtane ne mɔ a le boni? Asoo tɛ Gyɛlusalɛm ɔ?

⁶Yemɔti Ɛdɛnkɛma se, “Mebazɛkye Samɛlea maanle ne amuala, meahakyi ye ɛleka mɔɔ bɛyɛ vanye egyinli la. Mebapiepia sua ne azo azua ne awolɛ ne mɔ meahɔgua bɔnza ne anu, na meaza bɛ adiabo ne mɔ meagua zolɛ.

⁷Bɛbabubu ye mmonle ananze ne mɔ dwɔkɔdwɔkɔ, bɛayela mɔɔ ɔnyianle bɛ wɔ ɛkpabɔlɛ nu la amuala, na meazɛkye bɛ awozonle ananze ne mɔ meayɛ bɛ ewula edukue, ɔluakɛ ɔluale tuutuulilɛ zo a ɔnyianle ɛhye mɔ a, na bɛbava bɛazia bɛahɔmaa menli mɔɔ bɔ tuutuu ɛbɛla la.”

⁸Na Maeka hanle kɛ, “Ɔlua ɛhye ati mebazu meaye awolɛ, mebakpa me nwo, mealɛ me nwo zɔ, meaye awolɛ kɛ ɛsɛlɛ zo ɛzonlɛ, na meali nyane kɛ anloma soholo,

⁹ɔluakɛ Samɛlea nganlɛ ne mɔ ɛyɛ kukulabi. Nganlɛdudulɛ ne ɛva Dwuda na yera toonwo yeradwu me menli ne anlenkɛ kpole ne anloa wɔ Gyɛlusalɛm.”

¹⁰Bɛmmaka ye wɔ Gate, bɛmmasu fee; bɛva nzonle bɛbɔ bɛ nwo wɔ Bɛte Lɛyafela.

¹¹Bɛmɛ Hyeefɛma, bɛva nyiane bɛlɛ bɛ nwo zɔ bɛpɛ nuhua bɛhɔ. Zeeyanema mmaba fee; anrɛɛ Bɛte Yizɛlema ɛzunlɛ kpole ne kɛheda bɛ nwo zo na bɛkɛlie ye gyinlabelɛ ne bɛkɛvi ye ɛkɛ ne.

¹²Menli mɔɔ wɔ Mɛlo la ɛlɛkendɛ anyebololɛ nu akpondɛ kpalɛ, ɔboalekɛ Ɛdɛnkɛma ɛmaa munzule ɛdo Gyɛlusalɛm.

¹³Bɛmɛ Leekehyema, bɛhendɛhenda bɛ konle ehwili ne mɔ. Bɛmɛ a bɛlumuale bɛyɛle ɛtane, bɛmanle mɛladonlɛ zanenle Yizilayɛ kɔsɔɔti na Gyɛlusalɛmma yɛle ɛtane a.

¹⁴Zɔhane ati bɛbava ahyɛlɛ ninyɛne bɛamaa Molɛhyɛte Gatema bɛ nee bɛ ali nrɛlaleɛ. Akezebe azua ne mɔ bayɛ mɛlɛbɛla debie amaa Yizilayɛ arelemgbunli.

¹⁵Bɛmɛ Malihyaama, Ɛdɛnkɛma se, “Mebamaa awie arali bɛ nwo zo konim. Yizilayɛ titilema banriandi ahɔvea Adɛlam.

¹⁶Yizilayɛma, bakpa bɛ ti, bɛbapepɛ bɛ nwo enrinli kɔsɔɔti wɔ bɛ mra ne mɔ mɔɔ bɛ nye die bɛ nwo la ati. Bɛkpa bɛ ti koabekoabe kɛ ɛkpɔtɛ, ɔluakɛ bɛbahye bɛ mra ne mɔ bɛahɔ nlɔnu.”