Read Nzema Mae 2 Bible Online

Mae 2 - Nzema bible

Mae 2

¹Munzule ɛha bɛdabɛ mɔɔ bɛdwenle amumuyɛ ɛyɛlɛ nwo na bɛda bɛ ɛkpa zo bɛbɔ ɛtaneyɛlɛ nwo adwenle la. Bɛlɛ tumi la ati, aleɛ kye a bɛyɛ awukade.

²Bɛ nye bolo awie mɔ ɛya avule na bɛsa bɛ bɛdie; bɛ nye bolo awie mɔ azua na bɛdie bɛfi bɛ sa nu; bɛsisi awie mɔ bɛdie bɛ agyadeɛ nee bɛ sua nu amra.

³Yemɔti Ɛdɛnkɛma se, “Mebamaa munzule ado menli ne mɔɔ ɛyɛ kpomgbolo ɛkpolo bɛ kɔme na bɛngola ye ye la. Menli zɔhane ɛnrɛhola tia memaa bɛ bati zo, ɔluakɛ mekɛ ne bayɛ munzule mekɛ amaa bɛ.

⁴Mekɛ ne anu menli bado edwɛne agolo bɛ nwo, na bɛbazu bɛaye awolɛ nyane nyane kɛ, Munzule ɛdo yɛ! Ɛdɛnkɛma ɛlie yɛ agyadeɛ muala; yemaa yɛ azɛlɛ ne amuala ɛvi yɛ sa, yehyɛ yemaa bɛdabɛ mɔɔ bɛhye yɛ nuokɛ la.”

⁵Yemɔti saa mekɛ ne dwu na Ɛdɛnkɛma menli ne sia bayia a, menli zɔhane mɔ abo zo amra ɛnrɛnyia awie ɛnrɛgua bɛ ti nzeleba ɛnrɛmaa bɛ.

⁶Menli ne mɔ tendɛ me na bɛse me kɛ, “Mmabɔ zɔhane nolo ne! Ɔnle kɛ awie biala bɔ nolo mɔɔ le zɛhae la. Nyamenle ɛnrɛmaa yɛ nyunlu ɛnrɛgua aze.”

⁷O Yizilayɛma, asoo edwɛkɛ mɔɔ bɛka la ɛne? Asoo Ɛdɛnkɛma ɛnlɛ abotane? Asoo ɔdaye a yeyɛ ɛhye mɔ a? Asoo ye edwɛkɛ ne ɛnle kpalɛ ɛmmaa mɔɔ di boɛ la?

⁸Noko bɛmɛ bɛyɛ me menli ne kpɔvolɛma; bɛdwazo bɛtia me menli ne; bɛkpolo mɔɔ ɛngulo kpolera la adɛladeɛ, na bɛdie menli mɔɔ se bɛ adenle zo, mɔɔ ɛnlɛ konle adwenle biala la anwo ninyɛne.

⁹Bɛtu me menli ne mɔ mraalɛ wɔ bɛ azua ngɛnlɛma ne mɔ anu, bɛmaa bɛ mra nyilalɛ mɔɔ anrɛɛ kenle bie menwɔmaa bɛ la bɔ bɛ bɔkɔɔ.

¹⁰Bɛdwazo bɛhɔ, ɛke ɛnle ɛleka mɔɔ bɛdie bɛ ɛnwomenle a, ɔboalekɛ bɛva bɛ nwo evinli bɛzɛkye ɛke bɔkɔɔ.

¹¹Saa awie duolua nuhua aheha mgbane mgbane, abɔ adalɛ kɛ, “Mebabɔ nwanye nee nza ɛsesebɛ nwo nolo meahile bɛ” a, anrɛɛ yemɔ a ɔkɛyɛ nolobɔvo kpalɛ ɔkɛmaa menli ɛhye mɔ a.

¹²Ɛdɛnkɛma se, “Mebaboɔboa bɛ kɔsɔɔti bɛ nloa, O Yizilayɛma. Mebaboɔboa Yizilayɛma mɔɔ ɛha la anloa. Mebayɛ bɛ menli ekpunli ko kɛ mboane mɔɔ wɔ tunli nu la. Mebamaa menli ayɛ bɛ azɛlɛ ne azo gbudugbudu kɛ nyɛmoa mɔɔ ɛhɔ adidileka la.”

¹³Nyamenle, mɔɔ yemɔ a ɔbabuke adenle ne yeamaa bɛ la, bali bɛ nyunlu. Bɛbalua suakpole ne mɔɔ bɛhyele bɛ nuokɛ bɛhɔle zolɛ la anlenkɛ kpole ne anu bɛavinde; Ɛdɛnkɛma, bɛ belemgbunli ne bali bɛ ti.