Read Nzema Mae 3 Bible Online

Mae 3 - Nzema bible

Mae 3

¹Na Maeka hanle kɛ, “Bɛmɛ Yizilayɛ mbusua mgbanyinli nee mgbanyima mɔɔ sie Yizilayɛma la, bɛdie! Ɔwɔ kɛ bɛdwenle pɛlepɛlelilɛ nwo.

²Noko bɛmɛ, bɛkyi kpalɛ na bɛkulo ɛtane; bɛye me menli ne nwoma na bɛye bɛ nwonane bɛfi bɛ mbowule nwo.

³Bɛdi me menli ne nwonane; bɛye bɛ nwo nwoma; bɛbubu bɛ mbowule nu dwɔkɔdwɔkɔ, na bɛpepɛ bɛ azinli kɛ nane mɔɔ bɛgua bɛ danesɛne nu bɛado la.

⁴Mekɛ badwu mɔɔ bɛbadea bɛavɛlɛ Ɛdɛnkɛma a, na ɔnrɛdɛne bɛ zo. Ɔbava ɔ nye yeavea bɛ, ɔboalekɛ bɛbɔ ɛbɛla ɛtane.”

⁵Nyamenle kpɔmanvolɛma bɛlɛbɛla Nyamenle menli ne minli bɛ. Saa bɛnyia ye bɛdi a ɛnee bɛse, “Anzonudwolɛ!” Awie mɔɔ annyia bie ammaa bɛ la ɛnee bɛzo konle bɛdoa ye. Yemɔti kɛ Ɛdɛnkɛma se la ɛne,

⁶“Bɛmɛ kpɔmanvolɛma, aleɛ badwo bɛ, bɛnrɛnwu ɛnyelɛzodeɛnwunlɛ; awozinli bava bɛ, na bɛnrɛde ɛbizalɛ edwɛkɛ biala. Sɛnzɛne ne badɔ Nyamenle kpɔmanvolɛma ati zo, yɛɛ alehyenlɛ ne bayɛ awozinli ava bɛ.”

⁷Bɛdabɛ mɔɔ bɛka mɔɔ kenle bie bazi la anyunlu bagua aze, yɛɛ bɛdabɛ mɔɔ bɛka ɛbizalɛ edwɛkɛ la babɔ anyiemgba. Bɛ muala bɛbamua bɛ nloa, ɔluakɛ Nyamenle ɛnrɛbua bɛ.

⁸Na mame, Ɛdɛnkɛma Sunsum ne ɛva tumi ɛyi me tɛkɛɛ, yemaa me pɛlepɛlelilɛ nee anwosesebɛ kɛ membɔ Gyɛkɔbo abo zo amra mɛladonlɛ ne nee Yizilayɛma ɛtane mɔɔ bɛyɛ la nolo mengile bɛ.

⁹Bɛmɛ Yizilayɛ mbusua mgbanyinli nee Yizilayɛ mgbanyima mɔɔ bɛkyi pɛlepɛlelilɛ na bɛdi mɔguazo la, bɛdie ɛhye.

¹⁰Bɛlɛfa menli ɛhunlɛ nee nzisi a bɛakyekye Nyamenle suakpole Gyɛlusalɛm a.

¹¹Zolɛ mgbanyima die ndoloboa na bɛabua ndɛne, zolɛ sɛlɛvolɛma maa bɛbɔ bɛ ɛkpa na bɛahilehile Nyamenle edwɛkɛ ne, yɛɛ Nyamenle kpɔmanvolɛma pɛ bolɛ na bɛaha ɛbizalɛ edwɛkɛ ne. Noko bɛfa bɛ adwenle bɛto kɛ Ɛdɛnkɛma nee bɛ lua na bɛka kɛ, “Ɛdɛnkɛma de yɛ avinli. Munzule biala ɛnrɛra yɛ nwo zo.”

¹² Yemɔti bɛmɛ ti, bɛbagologolo Gyɛlusalɛm kɛ bɛgolo ɛya la bɛamaa yeayɛ suadu na boka ne mɔɔ Ɛzonlenlɛ Sua ne gyi zo la ahakyi kpɔkɛ.