Read Nzema Mae 4 Bible Online

Mae 4 - Nzema bible

Mae 4

¹Ɔbara ye kɛ, mekɛ ne mɔɔ li amozi la anu, boka ne mɔɔ Ɛdɛnkɛma Ɛzonlenlɛ Sua ne gyi zolɛ la bayɛ boka tendenle adɛla ewiade boka biala. Maanle maanle bapia ara nwolɛ,

²na menli dɔɔnwo baraha kɛ, “Bɛrɛla bɛmaa yɛhɔ Ɛdɛnkɛma Boka[1] ne azo, yɛhɔ Gyekɔbo Nyamenle ne sua nu, amaa yeahilehile yɛ ye ndenle ne mɔ, na yɛalua ye ndenle ne mɔ anu. Ɔluakɛ Zayɔn yɛɛ mɛla ne vi bara a, Ɛdɛnkɛma edwɛkɛ ne vi Gyɛlusalɛm a bara a.”

³ Ɔbabua maanle maanle ne mɔ ndɛne, ɔbabua maanle mgbole mɔɔ wɔ moa la ndɛne. Bɛbabolo bɛ konle dadeɛ ne mɔ bɛava bɛazo ɛya, bɛbabolo bɛ atwɛ ne mɔ bɛayɛ ɛdedadeɛ. Maanle biala ɛnrɛva konle ɛnrɛdoa maanle, yɛɛ bɛnrɛzukoa konle ɛhonlɛ bieko.

⁴ Awie biala badɛnla ye vanye egyinli nu, yɛɛ ye feege mbaka bo anzonudwolɛ nu; awie ɛnrɛha bɛ ɛzulolɛ, ɔluakɛ Tumivolɛ Ɛdɛnkɛma a ɛdendɛ a.

⁵Maanle maanle kɔsɔɔti di bɛ nyamenle ne mɔ mɛla zo na bɛsonle bɛ, na yɛmɛ, yɛbazonle Ɛdɛnkɛma yɛ Nyamenle ne na yɛali ye mɛla zo dahuu.

⁶Ɛdɛnkɛma se, “Mekɛ ne anu, mebaboɔboa bɛdabɛ mɔɔ medea bɛ la amuala anloa, abuburama nee bɛdabɛ mɔɔ bɛvoa bɛ bɛmaa bɛhɔ nlɔnu la.

⁷Abuburama ne bayɛ Yizilayɛ abo zo amra mɔɔ ɛha la, na menli ne mɔɔ bɛambu bɛ bie la bayɛ maanle kpole, na Ɛdɛnkɛma badɛnla Boka Zayɔn na yeazie bɛ, ɔvi ɛnɛ mɔɔ kɔ nee mekɛ mɔɔ ɛnlɛ awieleɛ.”

⁸Na wɔmɔ Gyɛlusalɛm, boka mɔɔ ɛle tawa, mɔɔ Nyamenle gyinla zolɛ sinza ye menli kɛ mboaneneavolɛ sinza ye nyɛmoa la, wɔ ɛkɛ ne yɛɛ mɔmoane fanwodi ne bazia ara a, na ɛbayɛ maanle ne suakpole.

⁹Na duzu ati a ɛsu kpole zɛhae a? Ɛnlɛ belemgbunli ɔ? Asoo wɔ folɛdulɛma ɛwie wu la ati a ɛlɛte nyane kɛ raalɛ mɔɔ ɛvo awolɛ zo la ɔ?

¹⁰Gyɛlusalɛmma, bɛgyengye bɛ nwo bɛkponle kɛ raalɛ mɔɔ ɛvo awolɛ zo la. Ɔluakɛ ɔvi ɛnɛ, bɛvi suakpole ye azo bɛbadu bɛahɔdɛnla namule nu wɔ kpɔkɛ nu. Bɛbahye bɛ bɛahɔ Babelɔn, na ɛkɛ ne yɛɛ Ɛdɛnkɛma baralie bɛ, yeakpɔne bɛ yeavi bɛ kpɔvolɛma asa anu a.

¹¹Maanle maanle dɔɔnwo ɛli bɛ nloa ɛvua Gyɛlusalɛm ati; bɛse, “Bɛmaa yɛva yɛ nye yɛzie Gyɛlusalɛm anwo na yɛhɔzɛkye ye.”

¹²Noko bɛnze Ɛdɛnkɛma adwenle, bɛnde ye ngyehyɛlɛ ne mɔ abo. Bɛnze kɛ Ɛdɛnkɛma ɛboɔboa bɛ nloa kɛ ma mɔɔ bɛkyekye bɛ avile avile mɔɔ bɛfa bɛahɔ ma ɛwozolɛ ɛleka la.

¹³Ɛdɛnkɛma se, “Gyɛlusalɛmma, bɛdwazo bɛwozo ma ne na mebamaa bɛ mɛne ne mɔ ayɛ mbulalɛ na bɛ ndwɛlɛ ndaboa ayɛ kɔbele. Bɛbatietia maanle maanle dɔɔnwo anwo zo bɛazɛkye bɛ, na bɛadu anwonyia mɔɔ bɛkɛnyia ye la bɛamaa medame Ɛdɛnkɛma, ewiade amuala Awulae.”