Read Nzema Mae 5 Bible Online

Mae 5 - Nzema bible

Mae 5

¹Gyɛlusalɛm ɛlɔnema, bɛbɛza, na ɛlɔnema ɛbɛnra ɛyia yɛ. Bɛbava baka bɛabɔ Yizilayɛ belemgbunli ne anzo nu.

² Na Ɛdɛnkɛma hanle kɛ, “Na wɔmɔ, O Bɛtelɛhɛm Ɛfelata, ɛle sua ekyi kpalɛ wɔ Dwuda maanle ne anu, noko wɔ nuhua yɛɛ awie vi bara, aragyinla me gyakɛ anu, na yeazie Yizilayɛma amuala a. Ye abusua ɛlɔnwɔne ne abo vi tete.”

³Yemɔti Ɛdɛnkɛma baye bɛ amaa bɛ kpɔvolɛma kɔkpula mekɛ mɔɔ raalɛ ne mɔɔ ɛvo awolɛ zo la kɛwo la. Ɛhye anzi, ɔ mediema mɔɔ ɛha la bazia ara bɛ maanle nu Yizilayɛ.

⁴Ɔbalua Ɛdɛnkɛma anwosesebɛ zo yeagyinla yeayɛne ye nyɛmoa wɔ Ɛdɛnkɛma ye Nyamenle ne anyunlunyia nu. Na ye menli ne badɛnla bɛ nwo adɔ bɛ, ɔluakɛ ɛnɛ ɛdeɛ, ɔbayɛ sonlakpole wɔ ewiade ɛleka biala.

⁵Na ɛhye bava anzonudwolɛ ara. Saa Aseleama fa konle batoa yɛ wɔ yɛ maanle ye anu na bɛfa bɛ gyakɛ bɛtia yɛ azɛlɛ ye azo a, yɛbava mboaneneavolɛma kɛyɛ nsuu nee mgbanyima kɛyɛ mɔtwɛ a yɛaho yɛatia bɛ a.

⁶ Bɛbava tumi kpole bɛali Aseleama nee Nemelɔdoma anwo zo konim, na bɛalie yɛ bɛavi Aseleama asa anu, wɔ mekɛ mɔɔ bɛkɛva konle bɛkɛradoa yɛ wɔ yɛ maanle ye anu la.

⁷Akee Gyekɔbo abo zo amra mɔɔ hale la bayɛ kɛ ɛbɔlɛ mɔɔ Ɛdɛnkɛma ɛlɛmaa yeadɔ, nee kyɛngyɛne mɔɔ ɛlɛgugua ndile zo la; bɛngendɛ sonla yɛɛ bɛngendɛ awie biala.

⁸Gyekɔbo abo zo amra mɔɔ baha maanle maanle ne mɔ anu la bayɛ kɛ awenade mɔɔ la kpɔkɛ nu nane avinli la; ɔkɔ mboane ne anu, ɔtietia bɛ nwo zo na ɔtete bɛ azinli azinli, yɛɛ awie biala ɛngola bɛ die.

⁹Yizilayɛ, ɛ sa bahomo wɔ kpɔvolɛma anwo zo, na bɛbazɛkye bɛdabɛ mɔɔ bɛkpɔ wɔ la amuala.

¹⁰Ɛdɛnkɛma se, “Mekɛ ne anu mebazɛkye bɛ mgbɔnwɔ nee bɛ konle ehwili ne mɔ amuala.

¹¹Mebazɛkye bɛ maanle ne anu azuamgbole ne mɔ na meagologolo bɛ aranemgbole ne mɔ amuala meagua.

¹²Mebazɛkye bɛ ngonyia ninyɛne ne mɔ amuala na bɛnrɛnyia awie ɛnrɛha ɛbizalɛ edwɛkɛ ɛnrɛhile bɛ.

¹³Mebazɛkye bɛ ananze ne mɔ nee bɛ mpila ne mɔ mɔɔ bɛsonle nwolɛ la, na bɛnrɛbɔ bɛ ti aze bɛnrɛmaa bɛdabɛ bɛ sa anloa gyima bieko.

¹⁴Mebadudu bɛ bozonle raalɛ Ahyela sɛkɛlɛneɛ mbaka ne mɔ na meazɛkye bɛ azuamgbole ne mɔ.

¹⁵Mebava ɛya kpole kpalɛ meali maanle maanle ne mɔ mɔɔ ɛmbu me la nzenralɛ.”