Read Nzema Mae 6 Bible Online

Mae 6 - Nzema bible

Mae 6

¹Bɛdie Ɛdɛnkɛma edwɛkɛ ne: Dwazo, O Ɛdɛnkɛma, ka wɔ edwɛkɛ ne maa awoka mgbole nee ngyikyi ɛde ɛ ne.

²Bɛmɛ awoka mgbole nee azɛlɛ ye adiabo ne mɔ mɔɔ gyi kpundii, bɛdie Ɛdɛnkɛma edwɛkɛ ne; Ɛdɛnkɛma nee ye menli ne lɛ edwɛkɛ, ɔ nee Yizilayɛ baha ndɛne.

³Ɛdɛnkɛma se, “O me menli, duzu a meyɛ bɛ a? Duzu ngyegyelɛ a megyegye bɛ a? Bɛbua me!

⁴ Ɔluakɛ me nee bɛ vi Yigyibiti azɛlɛ zo a rale a, memkpɔnenle bɛ menvile akɛlɛzonlenlɛ nu. Memanle Mosisi, Aalɔn, yɛɛ Meleam a lile bɛ ti a.

⁵ O me menli, bɛhakye adwenle mɔɔ Mowabe Belemgbunli Beelake bɔle ye bɛ nwo, nee Biyɔ ara Beelam mualɛ mɔɔ vale manle ye la, na bɛhakye mɔɔ zile Akasea mɔɔ kɔ Gelegale adenle nu la, amaa bɛanwu nyɛleɛ mɔɔ medame Ɛdɛnkɛma mefa medie menli la.”

⁶Duzu a menva membɛlɛ Ɛdɛnkɛma a, duzu a menva membanzonle Nyamenle mɔɔ wɔ anwuma la a? Asoo menva nlankɛ ndonrandonra mɔɔ ɛli ɛvolɛ ko menyɛ ɛyelalɛ azubɔdeɛ membɛla ɔ nyunlu?

⁷Asoo Ɛdɛnkɛma anye bazɔ mboane nyinli apenle apenle nee nwole mɔɔ se kɛ azule apenle bulu se la? Asoo menva me belamunli ralɛ mendua me ɛtane ne mɔ anwo kakɛ?

⁸O sonla, Ɛdɛnkɛma ɛhile wɔ mɔɔ le kpalɛ la, na duzu bieko yɛɛ akee Ɛdɛnkɛma kpondɛ kɛ ɛyɛ a? Ɔkulo kɛ ɛdi pɛlepɛle, ɛkile ɛhulolɛ kpundii,[2] na ɛfa mɛlɛbɛnwoaze ɛ nee Nyamenle dua.

⁹Ɔle nrɛlɛbɛ debie bɔkɔɔ kɛ bɛkɛzulo Ɛdɛnkɛma. Tie Ɛdɛnkɛma ane kɛ ɔlɛfɛlɛ suakpole ne azo amra ɛ? Ɔse, “O abusua ekpunli nee menli mɔɔ ɛyia suakpole ye azo la, bɛdie!

¹⁰Asoo me rɛle bavi anwonyia mɔɔ amumuyɛma ɛhuohua ɔ nloa wɔ bɛ azua nu nee bɛ awule ɛzuzudeɛ ne mɔ mɔɔ mekyi la?

¹¹Bɛdwenle kɛ mebagyakyi sonla ne mɔɔ lɛ amumuyɛ tone ne nee adalɛ ɛzuzudeɛ kodoku ne la ɔ?

¹²Suakpole ye azo sukoavolɛma le ahɔdiawu, menli mɔɔ wɔ zolɛ la kɔsɔɔti bɔ adalɛ, bɛ nloa anu le menlemenle.

¹³Yemɔti mebɔ ɔ bo kɛ mesɛkye suakpole ne meamaa yeadɔ mgbane wɔ menli mɔɔ wɔ zolɛ la ɛtane ne mɔ ati.

¹⁴Bɛbali debie, na bɛ ko ɛnrɛyi, ɛhɔne bahu bɛ. Bɛnrɛhola ninyɛne fa sie, ɔ muala babɔ asande; yɛɛ mɔɔ bɛkɛbɔ mɔdenle bɛkɛva bɛkɛzie la mebamaa ɔ muala aminli konle nu.

¹⁵Bɛbalua, na bɛnrɛbu; bɛbabua ɔlivi ma, na bɛnrɛva ye nwole ne bie bɛnrɛkpokpa; bɛbabua vanye ma, na bɛnrɛnlo nuhua nwanye ne bie.

¹⁶ Ɔluakɛ Belemgbunli Ɔmelae nee ɔ ra Belemgbunli Ehabe amumuyɛ mɛla ne mɔ nee bɛ folɛdulɛ ne a bɛli zolɛ a, amaa meanyia adenle meayɛ suakpole ne suadu na zolɛ menli kɔsɔɔti anrese. Yemɔti ɛbazoa me menli[3] ne mɔ kɔsɔɔti ndeanlɛ ne.”