Read Nzema Mae 7 Bible Online

Mae 7 - Nzema bible

Mae 7

¹Abule ɛbu me! Ɔluakɛ meyɛ kɛ sonla mɔɔ ɛhɔne ɛlɛku ye na bɛtete ye wawaa nzoleɛ muala la, vanye ma ɛwie vanye mbaka zo, yɛɛ feege ma mɔɔ ɛlielie la bie ɛnle ɛkɛ na meade bie meazɔ me ɛbolɛ.

²Menli mɔɔ sulo Nyamenle la ɛwie wu, sonlakpalɛ ko bɔbɔ anga menli ne anu. Menli mɔɔ ɛha la kɔsɔɔti, biala kpondɛ kɛ ɔka mogya ɔgua, yɛɛ ko biala sua ɔ diema ɛhane.

³Ɛtane ala a bɛdi a, yɛɛ bɛdi ye nrɛlɛbɛ nu kpalɛ. Belemgbunli o, ndɛnebuavolɛ o, biala kpondɛ ndoloboa, yɛɛ menli mgbole ne mɔ ka ɛtane mɔɔ bɛkulo kɛ bɛdi la bɛkile bɛ, bɛ muala bɛdi bɛwula bɛ nwo.

⁴Kpalɛ mɔɔ wɔ bɛ avinli la le kɛ mbowule nyɛma yɛɛ mɔɔ di boɛ la le kɛ mbowuzaka. Mekɛ mɔɔ bɛfa bɛadea bɛ la ɛdwu; kɛkala ɔnrɛhyɛ biala, bɛ adwenle baha abɔ nu.

⁵Mmafa ɛ rɛle ɛwula mɔɔ ɛ nee ye zua la anu, yɛɛ mmafa wɔ adwenle ɛmaa ɛ gɔnwo. Sinza ɛ nloa wɔ ɛ ye bɔbɔ anwo,

⁶ ɔluakɛ ralɛ nrenya ɛmbu selɛ bie, ralɛ raalɛ dwazo ninli anwo zo, yɛɛ raalɛ mɔɔ wɔ agyalɛ la dwazo ɔ hu ɔ nli anwo zo; sonla kpɔvolɛma a le ɔdaye ye sua nu amra.

⁷Na mame, mebanlea mɔɔ Ɛdɛnkɛma kɛyɛ la, mebahendɛ me ngoanelielɛ Nyamenle ne; me Nyamenle ne badie me.

⁸O me kpɔvolɛ, mmadi me nwo zo wulupe. Saa metɔ aze a mebadwazo. Saa metɛnla awozinli nu a Ɛdɛnkɛma bayɛ me kɛnlaneɛ.

⁹Mekponle Ɛdɛnkɛma ndeanlɛ ne azo, ɔboalekɛ meyɛ ɛtane metia ye. Na nzinlii ɔbanwu me anwunvɔne na yeali me edwɛkɛ yeamaa me. Ɔbava me yeara wienyi nu; mebanwu ye ngoanelielɛ ne.

¹⁰Akee me kpɔvolɛ ne banwu ye na nyiane bahu mɔɔ hanle hilele me kɛ, “Ɛdɛnkɛma wɔ Nyamenle ne wɔ nienwu?” la. Me nye banwu kɛ bɛli bɛ nwo zo konim na bɛtietia bɛ nwo zo kɛ guabile zo ndɛtɛlɛ.

¹¹Mekɛ ɛlɛba mɔɔ bɛbalie Gyɛlusalɛm bane ne mɔ fofolɛ a. Mekɛ ne anu bɛbadɛlɛ bɛ ɛweɛne ne anu.

¹²Mekɛ ne anu bɛvi Aselea, Yigyibiti[4] nee Azule kpole ne anloa, yɛɛ ɛnwea nee awoka ne mɔ azo bɛbara.

¹³Na azɛlɛ ye amuala badɔ mgbane wɔ menli mɔɔ wɔ zolɛ la nyɛleɛ ne mɔ ati.

¹⁴O Ɛdɛnkɛma, fa wɔ kpɔma ne na nea wɔ menli ne mɔɔ le wɔ agyadeɛ la anwo zo kɛ mboaneneavolɛ ka mboane la. Bɛ ngome bɛwɔ tola bie anu wɔ kpɔkɛ bie anu; maa bɛvinde bɛhɔdidi Beehyan nee Geleade fienemgbole nu, kɛmɔ bɛyɛle ye dɛba ne la.

¹⁵Yɛ nwanwane ninyɛne kile yɛ,[5] kɛmɔ ɛyɛle wɔ mekɛ mɔɔ ɛyele yɛ ɛvile Yigyibiti la.

¹⁶Maanle maanle ne mɔ banwu ye na bɛ anwosesebɛ kpole ne anzi, nyiane bahu bɛ. Bɛ nzo badi na bɛava bɛ sa bɛasosɔ bɛ nloa.

¹⁷Bɛbali ɛnwea kɛ ɛwɔlɛ nee ninyɛne mɔɔ twenle bɛ kɛnra aze la, bɛbava anwowozolɛ bɛavi bɛ aranemgbole ne mɔ anu bɛavinde, na bɛava sulosulo bɛahakyi bɛ nye Ɛdɛnkɛma yɛ Nyamenle ne anwo, na ɛdawɔ ɛ ti, ɛzulolɛ baha bɛ.

¹⁸Nwane a le Nyamenle kɛ ɛdawɔ, O Ɛdɛnkɛma, mɔɔ ɛfa ɛtane ɛkyɛ na ɛmbu wɔ menli Yizilayɛma mɔɔ hale la mɛladonlɛ nwo mgbonda a? Ɛnva ɛya ɛnga zo, ɔboalekɛ ɛ nye die ɛhulolɛ kpundii nwo.

¹⁹Ɛbanwu yɛ anwunvɔne bieko, ɛbakpa yɛ ɛtane kɔsɔɔti wɔagua. Ɛbado yɛ ɛtane ne mɔ wɔagua nyevile kunlu lɔ.

²⁰Ɛbahile wɔ nɔhalɛlilɛ ne nee wɔ ɛhulolɛ kpundii ne mɔɔ ɛlɛ ye wɔ yɛ nlenya mɔ, Gyekɔbo nee Ebileham anwo la wɔ bɛ bo zo amra anwo zo, kɛmɔ wɔ ɛwɔkɛ ne mɔɔ ɛbɔle la de la.