Read Nzema Nah 1 Bible Online

Nah 1 - Nzema bible

Nah 1

¹Nrɛlaleɛ ɛhye fane Nenɛvɛ anwo. Ɔle Nahum mɔɔ vi Ɛlekɔhye la ɛnyelɛzodeɛnwunlɛ buluku.

²Ɛdɛnkɛma le Nyamenle mɔɔ twe nungule, ɔdi nzenralɛ a; Ɛdɛnkɛma di nzenralɛ yɛɛ ɔfa ɛya; Ɛdɛnkɛma di ye kpɔvolɛma nzenralɛ, yɛɛ ye ɛya wɔ bɛ nwo zo.

³Ɛdɛnkɛma ɛnva ɛya mgbane mgbane, noko ɔlɛ tumi kpole kpalɛ; ɔnrɛmaa mɔɔ di fɔlɛ la ɛnrɛva ɔ nwo dwɔɔ. Ye adenle la ahumu nee ahumuakyima nu, yɛɛ ɔ gyakɛ abo munlutu a le amungu.

⁴Ɔtea nyevile ɔmaa ɔsesa, ɔmaa azule muala sesa; Beehyan nee Kamɛle azɛlɛ ne mɔ yɛ resee, na Lɛbanɔn ndotolo kpolo gua.

⁵Ɔye ɔ nyunlu a awoka kpusu, awoka ngyikyi ne mɔ kolo. Azɛlɛ ye tɔ mgbane wɔ ɔ nyunlu, ewiade nee nuhua ninyɛne muala yɛ mgbane.

⁶Ɔfa ɛya a, nwane a kɛhola ɔ nyunlu gyinla a? Nwane a kɛhola ye ɛya kpole ne anloa gyinla a? Ye ɛya sɔ kɛ senle; ɔka bodane a ɔkpukekpuke.

⁷Ɛdɛnkɛma le kpalɛ, ɔle ɛvealeka wɔ ɛmianlɛ nu; ɔsɔ bɛdabɛ mɔɔ bɛnriandi bɛbatane ye la.

⁸Ɔbava azuyilɛ kpole yeazɛkye ye kpɔvolɛma, yeavoa bɛ, yeaminli bɛ bo zo.

⁹Duzu akpamo a bɛlɛkɔ ye Ɛdɛnkɛma anwo a? Ɔbamaa ɔ muala abo agua; ɔnli ye kpɔvolɛma nzenralɛ ɔndia nwiɔ.

¹⁰Bɛyela kɛ mbowule mɔɔ ɛdo ɛsɛka nu, bɛyela kɛ abɛlɛ dosinli.

¹¹Nenɛvɛ, wɔ ɛkɛ ne yɛɛ awie vi ɛra ɛrabɔ amumuyɛ kpɔkɛ ɛtia Ɛdɛnkɛma, na ɔtu amumuyɛ folɛ a.

¹²Kɛ Ɛdɛnkɛma ɛlɛse ye menli Yizilayɛma la ɛne, “Aseleama anwo yɛ se yɛɛ bɛzonle bɔbɔ ɛdeɛ, noko bɛbaha bɛ bɛagua na bɛazɛkye bɛ. Memaa nyane ɛha me menli ne, na menrɛmaa bɛnrɛnwu nyane bieko.

¹³Mebaye Aseleama kpomgbolo ne me menli ne akɔme na meabubu Aseleama kpanwu ne mɔ anu.”

¹⁴Ɛdɛnkɛma ɛli Aseleama anwo mɛla, ɔse, “Bɛ duma ne ɛnrɛdɛnla ɛkɛ ne dahuu. Mebazɛkye bɛ mmonle mɔɔ bɛgua nee mɔɔ bɛze mɔɔ wɔ bɛ awozonle azua ne mɔ anu la amuala.”

¹⁵ Nea awoka ne mɔ azo lɔ, awie nee amaneɛ fɛlɛko ɛlɛba; ɔbɔ anzonudwolɛ nwo nolo! Dwudama, bɛli bɛ ɛvoyia ne mɔ na bɛye bɛ ɛwɔkɛ ne mɔ, ɔluakɛ amumuyɛma ɛnrɛra bɛ nwo zo bieko; bɛzɛkye bɛ bɔkɔɔ.