Read Nzema Nah 2 Bible Online

Nah 2 - Nzema bible

Nah 2

¹Nenɛvɛ, kɛ mɔɔ bazɛkye wɔ la ɛra ɛ nwo zo ɛ! Sinza wɔ bane ne mɔ! Sinza wɔ ndenle ne mɔ! Fa wɔ anwosesebɛ muala, bɛza kpalɛ!

²(Ɔluakɛ Ɛdɛnkɛma ɛlɛmaa Yizilayɛma azia anyia bɛ belemgbunli dibilɛ ne bieko, kɛmɔ bɛde kolaa na nwule akpokpo bɛ, abɔ bɛ bo zo la.)

³Kpɔvolɛ ne katakyiema asa anu enyinlike le kɔkɔlɛ, ye ɛlɔnema ne wula ebo adɛladeɛ. Saa bɛwie bɛ konle ehwili ne mɔ solo a, bɛ mbulalɛ ne mɔ anwo ta kɛ senle, bɛ mgbɔnwɔ ne mɔ wuluwulu.

⁴Konle ehwili ne mɔ luolua gua ne mɔ azo, bɛtu bɛkɔ bɛba wɔ ɛleka kpatawienyi ne. Bɛsɔ kɛ tɛkɛ, bɛpɛ fɛlɛ kɛ ɛsɛlɛmanye.

⁵Bɛvɛlɛ mgbanyima ne mɔ kɛ bɛrayia, bɛlɛkɔ a bɛ gyakɛ kpulokpula. Bɛtu twi bɛkɔ suakpole ne bane ne anwo, bɛhye bɛ nwo ɛhane.

⁶Bɛdukue azule ne nlenkɛ mgbole ne mɔ, alɔbɔlɛ ɛra belemgbunli sua nu.

⁷Bɛhye belemgbunli raalɛ ne nuokɛ bɛhɔ; ye sonvolɛ mraalɛ ɛlɛsu kɛ abubule mralɛ, na bɛbila bɛ kɛnra azo.

⁸Nenɛvɛ ɛyɛ kɛ nzubula, mɔɔ nuhua nzule se la. Bɛtea nu, “Bɛgyinla, bɛgyinla!” Noko awie ɛndo ɔ nye.

⁹Bɛve dwɛtɛ fufule ne mɔ! Bɛve ezukoa nvutuke ne mɔ! Ye anwonyia bo ɛndu ɛlɛ, ɔlɛ ninyɛne kpalɛ mɔɔ sonle bolɛ.

¹⁰Bɛdu Nenɛvɛ bɛfonyia! Bɛgologolo ye! Menli ne ahonle ɛdu; bɛngola gyinla; bɛ nwo wozo bɛ; bɛ nyunlu ɛza.

¹¹Na awenade tunli ne wɔ nienwu? Bolɛ bɔne ne mɔɔ awenade mralɛ ne mɔ wɔ nu, mɔɔ awenade ne fa mɔɔ ɔkɛhye ye la kɔ nu, na ɔ mra wɔ nu a bɛnzulo ɛhwee la, wɔ nienwu?

¹²Awenade ne hunle bie dɔɔnwo manle ɔ mra ne mɔ, ɔlofole bie ɔmanle awenade mbelɛ ne mɔ, ɔsesale mɔɔ yehu bɛ la ɔguale ye bɔne ne anu, ye tunli nu yɛle nane ngome.

¹³Tumivolɛ Ɛdɛnkɛma se, “Nea, mekpo wɔ. Mebayela wɔ konle ehwili ne mɔ, na wɔ awenade ngyikyi ne mɔ badɔ dadeɛ nloa. Mebaye ɛ nloa anu aleɛ meavi ewiade, na awie ɛnrɛde wɔ soanvolɛma ane bieko.”