Read Nzema Nah 3 Bible Online

Nah 3 - Nzema bible

Nah 3

¹Munzule ɛha suakpole ne mɔɔ adalɛ nee ahɔdiawu ɛyi ye tɔ la! Anwonyia bɛfe ɛyi ye tɔ.

²Empele mɔɔ ɛlɛsu kpoladada, ehwili ne mɔ anwo alɛra, mgbɔnwɔ mɔɔ ɛlɛwuluwulu, nee konle ehwili mɔɔ ɛlɛyieyia nu!

³Mgbɔnwɔ zo ɛlɔnema mɔɔ ɛbɔ ye zo, dadeɛ nee atwɛ mɔɔ ɛlɛbili fɛlɛfɛlɛ, avunli mɔɔ gua ye yɛlɛdɛdɛ, bɛtietia bɛ nwo zo bɛkɔ bɛba!

⁴Nenɛvɛ tuutuu ɛbɛlabɔlɛ bebelebe ne ati ɔ. Ɔfa ye kɛnlɛma, ye ngonyiayelɛ nee tuutuu ɛbɛla ɔkpokpo maanle, ɔfa ye sili ɔkyekye menli.

⁵Tumivolɛ Ɛdɛnkɛma ɛha ɛdo ɛkɛ, ɔse, “Metia wɔ. Mebakpali wɔ tɛladeɛ meagua ɛ ti zo, meamaa maanle maanle anwu kɛ ɛlɛ ɛ nwo zɔ, na arelemgbunli maanle anwu wɔ anyiemgba.

⁶Mebado ɛ nwo nyɛlɛ, meabu wɔ mgbane, meamaa menli akpolo anlea wɔ.

⁷Awie biala mɔɔ kɛnwu wɔ la babɔ mgbatike, na yeaha kɛ, ‘Nenɛvɛ ɛbɔ, nwane a kɛzu ye a? Nienwu yɛɛ mekanyia awie mɔ mɔɔ kɛkyekye ɔ rɛle a?’ ”

⁸Nenɛvɛ, asoo ɛle kpalɛ ɛtɛla suakpole Tibise, Yigyibiti suakpole ne, mɔɔ la azule Naele ne anloa, na azule nee nyevile ɛbɔ ye ɛyia la?

⁹Sudan nee Yigyibiti le ye anwosesebɛ mɔɔ ɛnga aze ɛlɛ a. Pɛɛte nee Lebeya boa ye wɔ konle nu.

¹⁰Noko bɛhyele zolɛ menli nuokɛ bɛhɔle nlɔnu, bɛtetele ngakula mɔɔ wɔ zolɛ la anu nzokanzoka wɔ guabile zo. Bɛguale mandimasema mɔɔ wɔ nu la ati nzeleba, na bɛguale ye menli mɔɔ yɛ se la nwɔnzɔnwɔnzɔ.

¹¹Nenɛvɛ, ɛdawɔ noko ɛbabɔ, ɛbanriandi wɔakpondɛ ɛleka wɔavea, wɔavi wɔ kpɔvolɛma anye zo.

¹²Wɔ aranemgbole kɔsɔɔti bayɛ kɛ feege mbaka mɔɔ bɔ zo mɔɔ ɛzo na bɛbolo la; bɛkpusu bɛ a, bɛbakpolo bɛagua bɛamaa didiravolɛ ne.

¹³Nea, wɔ ɛlɔnema ne, bɛ muala bɛle mraalɛ! Bɛbabukebuke wɔ nlenkɛ mgbole ne mɔ bɛamaa wɔ kpɔvolɛma; senle bali nuhua mbulalɛ ne mɔ amuala.

¹⁴Bɛhwe nzule bɛmaa menli mɔɔ ɛlɔne ɛva bɛ aze la, bɛmiemia bɛ aranemgbole ne mɔ anu! Bɛfɔtɔ ndɛtɛlɛ, bɛtietia ɛva ne azo, bɛva bɛ belekese ɛgualɛ nlɛka ne mɔ!

¹⁵Senle ne bava bɛ aze wɔ ɛkɛ, bɛbayia dadeɛ na yeali bɛ kɛ abɛbɛ di nya. Bɛmaa bɛ nwo ɛzo, bɛyɛ mɔnwo mɔnwo kɛ abɛbɛ nee kɛlatua!

¹⁶Ɛnyianle gualilɛma dɔɔnwo mɔɔ anwo zonle dɛlale anwomanyunlu nwɔlɔra. Bɛle kɛ abɛbɛ, bɛtɛlɛ bɛ ndɛba anu na bɛtu bɛkɔ.

¹⁷Wɔ mgbanyima ne mɔ le kɛ kɛlatua, wɔ suakunlu mbɔlɔba le kɛ abɛbɛ kpolane, maanle nu dwo a, bɛtɛnlɛdɛnla bane ti; saa ewia finde a, ɛnee bɛdu bɛhɔ; awie ɛnze ɛleka mɔɔ bɛkɔ a.

¹⁸Aselea belemgbunli, wɔ mboaneneavolɛma ɛlafe; wɔ mgbanyima ɛlɛbɔ ngɔsɔkɛ. Wɔ menli ɛbɔ asande wɔ awoka ne mɔ azo lɔ, awie ɛnle ɛkɛ mɔɔ ɔboɔboa bɛ nloa a.

¹⁹Debie ɛnle ɛkɛ mɔɔ kɛyɛ wɔ nganlɛ ayile a, wɔ ɛbodalɛ ne le kpole! Awie biala mɔɔ kɛde wɔ edwɛkɛ la bɔ ɔ sa nu kɛ wɔdɔ aze a, ɔluakɛ awie biala ze wɔ amumuyɛ mɔɔ ɛde la.