Read Nzema Hab 1 Bible Online

Hab 1 - Nzema bible

Hab 1

¹Ɛdɛnkɛma nrɛlaleɛ mɔɔ vale manle Nyamenle kpɔmanvolɛ Habakɛke manle ɔvale ɔdole gua la ɛne:

²O Ɛdɛnkɛma, menzu menvɛlɛ wɔ moalɛ ɔhɔdwu kenlenzu na wɔadie me? Anzɛɛ mendeɛdea nu kɛ, “Konle o! Konle o!” na wɔalie yɛ?

³Duzu ati a ɛmaa me nye nwu nvonleɛ nee ngyegyelɛ ɛ? Ninyɛne ɛzɛkyelɛ ɛva yɛ aze, yɛɛ konle, mgbonde nee butule ɛlie ebia.

⁴Ɔlua zolɛ mɛla nwo ɛnlɛ nvasoɛ yɛɛ pɛlepɛlelilɛ ɛnle ɛkɛ bieko. Ɔluakɛ amumuyɛma ɛbɔ tenlenema ɛnlo ɛmaa pɛlepɛlelilɛ ɛwie.

⁵ Akee Ɛdɛnkɛma buale kɛ “To ɛ nye nea maanle maanle ne mɔ na nea, ɔbayɛ wɔ nwanwane nee azibɛnwo. Ɔluakɛ melɛdi gyima bie wɔ wɔ mekɛ zo mɔɔ saa bɛka bɛkile wɔ a ɛnrɛlie ɛnrɛli a.

⁶ Ɔluakɛ nea, melɛmaa Babeloniama, maanle anwo ɛzulolɛ, atisesebɛ ne mɔɔ kpɔsa azɛlɛ ye ati nee ɔ bo la ava maanle maanle mɔɔ ɛnle bɛ ɛdeɛ la ayɛ bɛ ɛdeɛ.

⁷Bɛ nwo ka ɛzulolɛ kpalɛ; bɛ pɛlepɛlelilɛ nee bɛ kpoleyɛlɛ vi bɛdabɛ mumua ne bɛ ɛkɛ.

⁸“Bɛ mgbɔnwɔ nwo yɛ ndɛ tɛla boboduma, bɛ nwo yɛ ɛzulolɛ tɛla nɔsolɛ nu bedi; bɛ menli mɔɔ ka mgbɔnwɔ la ɛnzulo ɛhwee yɛɛ bɛ nyunlu ala a bɛkɔ a. Bɛvi moa moa a bɛbara a, yɛɛ bɛtu hyee kɛ kɔleɛ mɔɔ ɛlɛkye nane la.

⁹“Konle ala a bɛzo bɛlua a; bɛ ɛlɔnema anwo ka ɛzulolɛ. Menli mɔɔ bɛkye bɛ nuokɛ la zonle kɛ anwea la.

¹⁰Bɛmbu arelemgbunli, yɛɛ bɛgolo maamulɛma anwo. Aranemgbole biala ɛndu bɛ ahonle. Bɛkuohua anwea bɛsi ye na bɛgolo ye bɛgua.

¹¹Akee bɛtele zolɛ bɛkɔ bɛ nyunlu huu kɛ anwoma la; bɛle menli mɔɔ di fɔlɛ a; bɛ nyamenle a le bɛ anwosesebɛ.”

¹²Asoo ɛnle damɛnlangoate ɔ, O Ɛdɛnkɛma me Nyamenle, me Nwuanzanwuanza Ko? Yɛnrɛwu. O Ɛdɛnkɛma me Bodane, wɔye Babeloniama kɛ ɛdua bɛ nwo zo wɔadea yɛ, wɔahwe yɛ nzo.

¹³Wɔmɔ, ɛlɛ ɛnyelɛ mɔɔ zolɛ te kpalɛ mɔɔ ɛnva ɛnnea ninyɛndane nee ɛtane a. Duzu ati a ɛ nye gyi menli ne mɔɔ ɛnlɛ diedi la anwo na wɔyɛ koonwu ɛlɛmaa amumuyɛma ye azɛkye tenlenema ɛ?

¹⁴Ɔluakɛ ɛyɛ menli kɛ fɛlɛ mɔɔ wɔ nyevile nu, anzɛɛ ninyɛne mɔɔ twenle bɛ kɛnra aze mɔɔ ɛnlɛ mɔɔ sie bɛ la;

¹⁵yɛɛ Babeloniama to bɛ koba, bɛto bɛ avonle, bɛkye bɛ wɔ bɛ nwowie nu, na bɛdi nwolɛ fɛlɛko.

¹⁶Ɛhye ati bɛbɔ azu bɛmaa bɛ avonle ne na bɛkpu ɛyɛlɛ bɛmaa bɛ nwowie ne, ɔluakɛ bɛlua bɛ nwo zo bɛtɛnla ye anyelielɛ nu na bɛdi aleɛ kpalɛ.

¹⁷Asoo yemɔti ɔwɔ kɛ bɛkɔ zolɛ dahuu bɛyeye fɛlɛ ne bɛfi avonle ne anu na bɛsɛkye maanle maanle mɔɔ bɛnze bɛ anwunvɔne biala ɔ?