Read Nzema Hab 2 Bible Online

Hab 2 - Nzema bible

Hab 2

¹Mebahɔgyinla tawa ne azo meazinza, na meanlea mɔɔ Ɛdɛnkɛma kɛha kɛhile me la, na meanwu nyelebɛnloa mɔɔ ɔwɔ kɛ mefa memaa ye wɔ edwɛkɛ mɔɔ meva medo ɔ nyunlu la anwo.

²Na Ɛdɛnkɛma buale me kɛ, “Kɛlɛ ɛnyelɛzodeɛnwunlɛ ne; kɛlɛ ye wɔ bolɛ ndɛbandɛba zo maa ɔ nye ɛvinde kpalɛ, amaa mɔɔ kɛgenga la adɔ ɛbɔ nu.

³ Ɔluakɛ mekɛ ɛtɛdwule mɔɔ ɛnyelɛzodeɛnwunlɛ ne yɛ zɔhane a, noko mekɛ ne ɛlɛbikye, ɔnrɛyɛ adalɛ edwɛkɛ. Saa ɔkyɛ a kendɛ, ɔluakɛ nɔhalɛ nu, ɔbara, ɔnrɛhyɛ fee.

⁴ Nea, awie biala mɔɔ ɛnle tenlene la bakpo aze, noko tenlenenli ne balua ye diedi zo anyia ngoane.”

⁵Eza bɛnwu ye kɛ nwanye le ngunzi debie; adubɛnwonli ne ɛngyɛ; ye adidikpoku kpole le kɛ ɛbolɔ, ɔle kɛ ewule la, debie biala mɔɔ ɔlɛ la ɛnza ye. Ɔkuohua maanle maanle muala anloa, na ɔsesa maanle maanle kɔsɔɔti kɛ ɔdaye ye ɛdeɛ ɔ.

⁶Asoo menli ɛhye mɔ amuala ɛnrɛhakyi bɛ nwo ɛnrɛbɔ ye aholoba, ɛnrɛzi ye amgbu, na bɛnrɛze kɛ, “Munzule ɛha sonla ne mɔɔ kuohua mɔɔ ɛnle ye ɛdeɛ la anloa fa yɛ ye ɛdeɛ la. Kenlenzu yɛɛ ɔkɛgyakyi awoba ninyɛne ɛlielɛ a?”

⁷Asoo menli mɔɔ tua wɔ kakɛ la anye ɛnrɛra bɛ nwo zo ɛnrɛmaa bɛnrɛdwazo ɛ nwo zo arɛlevilɛ nu, ɛnrɛmaa ɛ nwo ɛnrɛwozo wɔ? Akee ɛbayɛ afedeɛ wɔamaa bɛ.

⁸Kɛmɔ wɔwua maanle maanle dɔɔnwo la, maanle maanle zɔhane mɔ anu abo zo amra bɛdabɛ bɛbawua wɔ wɔ mogya mɔɔ wɔha wɔgua nee konle mɔɔ wɔva wɔdoa menli mɔɔ wɔ ewiade, wɔzɛkye azuamgbole nee zolɛ menli ne mɔ la ati.

⁹Munzule ɛha sonla ne mɔɔ fa adenle ɛtane zo kpondɛ anyiabɛnwo ba ye awuke nu, maa ye awuke ne yɛ bedevinli na ɔbɔ ɔ nwo bane, amaa awie biala angyegye ye la.

¹⁰Wɔva anyiemgba kpole wɔra wɔ awuke nu kɛ wɔzɛkye maanle maanle dɔɔnwo a, yɛɛ ɛdawɔ mumua ne wɔhwe munzule wɔmaa ɛ nwo.

¹¹Ɔluakɛ bolɛ ne mɔɔ wɔ bane ne anu la badea nu avɛlɛ, na aakɔ ne mɔ alie zolɛ.

¹²Munzule ɛha sonla ne mɔɔ dua menli ɛhunlɛ zo kyekye sua, na ɔdua ɛtanelilɛ zo ɔkyekye suakpole la.

¹³Bɛnlea, asoo tɛ Tumivolɛ Ɛdɛnkɛma a maa adenle maa menli yɛ gyima maa senle sɛkye ye, na maanle maanle fonla bɛ nwo yɛ gyima mɔɔ nvasoɛ biala ɛnle zolɛ la?

¹⁴ Ɛdɛnkɛma anyunlunyia ne anwo adwenle bayi azɛlɛ ye tɛkɛɛ kɛ nyevile tɛtɛtɛlɛlɛ ne anu nzule la.

¹⁵Munzule ɛha sonla ne mɔɔ dua ye ɛya zo sisi ɔ gɔnwo mɔ, ɔbɔ bɛ anyiemgba, na ɔmaa bɛkɔ ye gyigyiligyigyili kɛ asɛɛ bɛnlo nza bɛbo la. Munzule ɛha sonla ne mɔɔ kɛmaa ɔ gɔnwo nza kɛnlo kɛbo na yeagolo ɔ nwo la.

¹⁶Ɛdawɔ noko anyiemgba babia wɔ takaa, ɛnrɛnyia ɛ nyunlu. Ɛdawɔ ɛbanlo, wɔabo na wɔahɔ ye gyigyilii. Ɛdɛnkɛma ndeanlɛ kpole ne bara ɛ nwo zo, ɔbadea wɔ yeamaa anyiemgba aheda wɔ anyunlunyia zo.

¹⁷Konle mɔɔ wɔva wɔzɛkye Lɛbanɔn la babu azia wɔ. Nanemgbole mɔɔ wɔhu bɛ la banwunlonwunla wɔ, wɔ menli mɔɔ wɔha bɛ mogya wɔgua, nee konle mɔɔ wɔva wɔdoa ewiade amra, wɔzɛkye azuamgbole nee zolɛ menli kɔsɔɔti la ati.

¹⁸Duzu nvasoɛ a wɔ ananze mɔɔ sonla ɔdaye yeyɛ la azo a? Ɔle ananze ala, ɔle kilehilevolɛ adalɛ. Dwinvolɛ biala die ananze mɔɔ ɔdaye yeyɛ, mɔɔ ɛndendɛ la di.

¹⁹Munzule ɛha sonla ne mɔɔ kɛha kɛhile debie mɔɔ bɛva baka bɛze la kɛ, “Dwazo!” na ɔkɛze bolɛ mɔɔ ɛndendɛ la kɛ, “Dwazo!” la. Asoo ɛhye kola ye yekile ɔ? Nea, bɛholo ezukoa nvutuke nee dwɛtɛ fufule bɛgua nwolɛ, noko ɛnwomenle biala ɛnle ye nu.

²⁰Ɛdɛnkɛma wɔ ye Ɛzonlenlɛ Sua Nwuanzanwuanza ne anu; bɛmaa aleɛabo amra amuala ɛyɛ koonwu wɔ ɔ nyunlu.