Read Nzema Hab 3 Bible Online

Hab 3 - Nzema bible

Hab 3

¹Nyamenle kpɔmanvolɛ Habakɛke nzɛlɛlɛ ne, kɛmɔ Hyegeyenotu hɛlɛle la:

²O Ɛdɛnkɛma, mede wɔ nganeɛ, yɛɛ menwu wɔ gyima ne, O Ɛdɛnkɛma, na mesulo. Yɛ ye bieko wɔ yɛ mekɛ zo, da ye ali wienyi wɔ yɛ mekɛ zo; ɛfa ɛya a kakye wɔ anwunvɔnezelɛ ne.

³Nyamenle vi Yidɔm rale, Nwuanzanwuanza Ko ne vi Pɛlan Boka rale. Ye anyunlunyia hedale anwuma amuala, ye ayɛlɛyelɛ yile azɛlɛ ye tɛkɛɛ.

⁴Ye wienyi ne le kɛ ɛsɛlɛmanye, ɔ sa akunlu ta kɛ sɛnzɛne, na ɛkɛ a ye tumi ne wɔ a.

⁵Ewulenzane li ɔ nyunlu, ewulenzane li ɔ nzi.

⁶Ɔgyinlanle ɔzuzule azɛlɛ ye, ɔnleanle, na maanle maanle ne mɔ kpusule; tete awoka ne mɔ amuala kpukekpukele, tete awoka ngyikyi nwonlonle, ye ndenle ne mɔ le kɛ dɛba ne ala la.

⁷Menwunle kɛ Kuhyan sua nu amra ɛlɛnwu amaneɛ; Medeanema anwo wozole bɛ.

⁸O Ɛdɛnkɛma, asoo azule ne mɔ ati a ɛvale ɛya a? Asoo wɔ ɛya ne tia azule ne mɔ, anzɛɛ wɔ ɛya ne tia nyevile ne, wɔ mekɛ mɔɔ ɛde wɔ mgbɔnwɔ ne mɔ azo, na ɛde wɔ konimlilɛ konle ehwili ne anu la?

⁹Ɛyele wɔ ɛda mbaka ne ɛvile bɛ boa ne anu, na ɛkponle wɔ ɛda ne. Ɛvale azule ɛhyɛle azɛlɛ ye anu.

¹⁰Awoka ne mɔ nwunle wɔ na bɛkpusule; azudulɛ ne anu yɛle se; buma hulule na ɔbule azɛlɛkye mgbole.

¹¹Sɛnzɛne ne nee siane ne gyinlanle bɛ bo zo ne mɔ, mekɛ mɔɔ wɔ ɛda mbaka ne mɔ ɛlɛsɔ se, na wɔ atwɛ ne mɔ ɛlɛpɛ memeamemea se la.

¹²Ɛvale ɛya ɛdiale mgbole ɛpɛle nu azɛlɛ ye azo, ɛvale ɛya ɛtietiale maanle maanle ne mɔ anwo zo.

¹³Ɛhɔle wɔ menli ne mɔ ngoane ɛlielɛ, ɛhɔle kɛ ɛkalie sonla ne mɔɔ wɔkpa nu wɔye ye la. Ɛgelegelele amumuyɛnli ne ati, ɛkpale ɔ nwo, ɔvi ye ɛzɔlɛ nwo ɔdwule ɔ kɔme anwo.

¹⁴Ɛvale wɔ ɛda mbaka ti ɛwowɔle ye ɛlɔnema kpanyinli ne mɔɔ rale me nwo zo kɛ ahumuakyima batete me la. Bɛvale anyelielɛ bɛrale kɛ bɛbazɛkye me kɛ ehyianli wɔ fealera nu.

¹⁵Ɛvale wɔ mgbɔnwɔ ne mɔ ɛtietiale nyevile ne anye, na azuamgbole ne mɔ anye yɛle awubue.

¹⁶Mete na me nwo wozo me, ɔ ne maa me nloa babonle wozo; me nwo golo me, me gyakɛ to bɛka nu. Mebayɛ koonwu meahendɛ amaneɛnwunlɛ kenle ne mɔɔ Nyamenle bava adea menli mɔɔ ko fa yɛ la.

¹⁷Feege mbaka ɛnrɛzo bɔbɔ ɛdeɛ, yɛɛ ma ɛnrɛra vanye mbaka zo, ɔlivi mbaka ɛnrɛzo bɔbɔ ɛdeɛ, yɛɛ aleɛ ɛnrɛvinde kpɔkɛ nu, mboane ne mɔ amuala bawu bɔbɔ ɛdeɛ, yɛɛ nlankɛ adunli ne mɔ badɔ mgbane,

¹⁸noko Ɛdɛnkɛma ati, mebali fɛlɛko, me ngoanelielɛ Nyamenle ne ati, me nye balie.

¹⁹Awulae Nyamenle ne le me anwosesebɛ; ɔmaa me gyakɛ nyia anwosesebɛ kɛ weɛlɛ na ɔmaa me nwo yɛ kɔlɔnwo wɔ awoka ne mɔ azo.