Read Nzema Zɛf 1 Bible Online

Zɛf 1 - Nzema bible

Zɛf 1

¹ Mekɛ mɔɔ Belemgbunli Emɔn ara Dwosaya di ebia wɔ Dwuda la, Ɛdɛnkɛma dendɛle hilele Zɛfanaya. Bɛfɛlɛ Zɛfanaya ɔ ze Kuhyae, Kuhyae ɔ ze a le Gɛdalaya, Gɛdalaya ɔ ze a le Amalaya, yɛɛ Amalaya ɔ ze a le Belemgbunli Hɛzikaya.

²Ɛdɛnkɛma se, “Mebazɛkye debie biala mɔɔ wɔ azɛlɛ ye azo la.

³Mebazɛkye menli nee nane, nloma mɔɔ wɔ anwomanyunlu nee nyevile nu fɛlɛ kɔsɔɔti. Mebavoa amumuyɛma; mebaye sonla dasanli meavi ewiade. Medame, Ɛdɛnkɛma a mese a.”

⁴Ɛdɛnkɛma se, “Mebahakyi me nzi meazi Dwuda nee menli mɔɔ wɔ Gyɛlusalɛm la amuala. Mebaminliminli bozonle Beeyale ne nee ye ahɔmenle ne mɔ amuala abo zo bɔkɔɔ.

⁵Bɛdabɛ mɔɔ bɛgyinla sua ti zo bɛbɔ bɛ ti aze bɛmaa anwumaneamra, bɛdabɛ mɔɔ bɛdi amonle bɛkile Ɛdɛnkɛma na eza bɛali amonle bɛahile bozonle Molɛke noko,

⁶nee bɛdabɛ mɔɔ bɛhakyi bɛ nzi bɛzi Ɛdɛnkɛma, mɔɔ bɛmkpondɛ ye, yɛɛ bɛmbiza ye ɛkɛ ne edwɛkɛ la, mebazɛkye bɛ muala.”

⁷Bɛyɛ koonwu wɔ Awulae Nyamenle ne anyunlu, ɔluakɛ Ɛdɛnkɛma kenle ne ɛbikye. Ɛdɛnkɛma ɛde menli mɔɔ yevɛlɛ bɛ la anwo, yeboɔboa azubɔlɛ ninyɛne ne anloa yezie ɛkɛ.

⁸Kenle mɔɔ Ɛdɛnkɛma babɔ ye azu ne la, Ɛdɛnkɛma se, “Mebadua belemgbunli mgbanyima ne, ɔ mra mrenya ne mɔ, yɛɛ menli mɔɔ keda maanle zo ndanlɛ la kakɛ.

⁹Kenle zɔhane mebadua awie biala mɔɔ wulu ba nwolodo ne anu, nee bɛdabɛ mɔɔ bɛfa konle nee nwule ninyɛne bɛyi bɛ menle sua ne tɛkɛɛ la kakɛ.”

¹⁰Ɛdɛnkɛma se, “Kenle zɔhane, ɛzunlɛ bade Fɛlɛ Anlenkɛ Kpole ne anloa, bɛdabɛ mɔɔ bɛwɔ sua fofolɛ zo la baye awolɛ, yɛɛ konle kpole bazi awoka zo lɔ.

¹¹Bɛdabɛ mɔɔ bɛde gua nu lɔ afoa nu la, bɛzu bɛye awolɛ, ɔluakɛ menli mɔɔ nee bɛ di dwɛtɛ fufule gua la nee bɛ gualilɛma amuala ɛwie wu!

¹²“Mekɛ ne anu mebava kɛnlaneɛ meanleɛnlea Gyɛlusalɛm ahodoka ne mɔ anu kpalɛ, na meadea bɛdabɛ mɔɔ bɛ sa yi bɛ nwo a bɛka kɛ, ‘Ɛdɛnkɛma ɛnrɛyɛ debie kpalɛ anzɛɛ ɛtane biala’ la.

¹³Bɛbawua bɛ nwo ninyɛne kɔsɔɔti, yɛɛ bɛ azua ne mɔ badɔ mgbane. Bɛbasisi azua, na bɛnrɛdɛnla nuhua; bɛbahye vanye tola, na bɛnrɛnlo nuhua nwanye.”

¹⁴Ɛdɛnkɛma kenle kpole ne ɛbikye. Ɔnrɛhyɛ biala, yebikye kpalɛ. Ɛzunlɛ mɔɔ bade Ɛdɛnkɛma kenle ne la bayɛ alɔbɔlɛ, ɔluakɛ kenle zɔhane, katakyiema bazu alɔbɔlɛ ɛzunlɛ.

¹⁵Kenle zɔhane le ɛya kenle, nyane nee abodelɛ kenle, ɛzɛkyelɛ nee ewule kenle, awozinli nee alɔbɔlɛ kenle, yɛɛ amungu nee awozinli kabii kenle.

¹⁶Ɔbayɛ kenle mɔɔ bɛbabɔ konle aweɛne nu na konle ava azuamgbole mɔɔ bɛhye nwolɛ nee tawa mɔɔ bɛgyinla zolɛ bɛnea kɛ ɛlɔne ɛlɛba la aze.

¹⁷Ɛdɛnkɛma se, “Mebamaa nyane aha menli na bɛavuovua kɛ anyenzinlirama, ɔboalekɛ bɛyɛ ɛtane bɛtia me. Bɛbahwi bɛ mogya bɛagua kɛ nzule, bɛ nwonane bakpɔlɔ.”

¹⁸Bɛ ezukoa nvutuke nee dwɛtɛ fufule ɛnrɛhola ɛnrɛlie bɛ wɔ Ɛdɛnkɛma ɛya kenle ne anu. Ewiade amuala bayela wee wɔ ye ɛya senle ne anu, ɔluakɛ ɔbazɛkye bɛdabɛ mɔɔ bɛwɔ azɛlɛ ye azo la arɛlevilɛ nu.