Read Nzema Zɛf 2 Bible Online

Zɛf 2 - Nzema bible

Zɛf 2

¹Maanlema mɔɔ anwo yɛ nyiane a, bɛboɔboa bɛ nloa na bɛdwenle bɛ nwo

²kolaa na bɛakpoa bɛ bɛagua kɛ ewula. Bɛboɔboa bɛ nloa kolaa na Ɛdɛnkɛma ɛya kpole ne ara bɛ nwo zo.

³Bɛdabɛ mɔɔ bɛbɛlɛ bɛ nwo aze wɔ azɛlɛ ne azo, na bɛyɛ mɔɔ Ɛdɛnkɛma kɛze bɛ la, bɛkpondɛ Ɛdɛnkɛma. Bɛyɛ mɔɔ le tenlene na bɛbɛlɛ bɛ nwo aze kɛ wɔannea a bɛkɛheda bɛ nwo zo wɔ Ɛdɛnkɛma ɛya kenle ne anu.

⁴ Gaza bayɛ suadu yɛɛ Ahyekɛlɔn badɔ mgbane. Sɛnzɛnegyinla yɛɛ Ahyedɔdoma bagua ɛbɔ nu na Ɛkelɔn abɔ tɔɔ a. Emɔ 1.6-8; Zɛk 9.5-7

⁵Bɛdabɛ mɔɔ bɛwɔ Kɛlɛte maanle nu, mɔɔ bɛde nyevile ne anloa la, bɛ gyakɔ! Filisitiama mɔɔ de Keena azɛlɛ zo, Ɛdɛnkɛma edwɛkɛ ne tia bɛ. Ɔse, “Mebazɛkye bɛ bɔkɔɔ; sonla ko bɔbɔ ɛnrɛha.”

⁶Azɛlɛ ne mɔɔ la nyevilenloa la bayɛ ndile mɔɔ mboane didi nu, mboaneneavolɛma ɛleka mɔɔ bɛpɛ bɛ ndile, yɛɛ mboane adunli ɛleka.

⁷Ɔbayɛ Dwudama mɔɔ ɛha la ɛdeɛ; ɛkɛ ne a bɛ mboane badidi a. Aleɛ dwo a bɛbadeda Ahyekɛlɔnoma azua ne mɔ anu. Ɛdɛnkɛma bɛ Nyamenle ne banlea bɛ nwo zo na yeamaa bɛakpazi bieko.

⁸ Tumivolɛ Ɛdɛnkɛma, Yizilayɛ Nyamenle ne se, “Menwu kɛ Mowabema ɛlɛsi agolo me menli ne anwo, nee Amɔnoma aholoba mɔɔ ɛlɛbɔ bɛ, yɛɛ ɛnwunlonwunlanlɛ mɔɔ bɛlɛnwunlonwunla bɛ wɔ bɛ azɛlɛ ne anwo la. Emɔ 1.13-15

⁹ Zɔhane ati meka meka kɛ, suzuamgba ala mɔɔ medame a mele tease Ɛdɛnkɛma la, Mowabe bayɛ kɛ Sodɔm na Amɔn ayɛ kɛ Gomɔla. Azɛlɛ ne azo bafifi ndile, ayɛ ngyenle ahuma, na yeadɔ mgbane mekɛ mɔɔ ɛnlɛ awieleɛ. Me menli ne mɔɔ ɛha la bahɔve bɛ ninyɛne, na me menli mɔɔ anwu la bava bɛ azɛlɛ ne ayɛ bɛ ɛdeɛ.”

¹⁰Bɛ mgbanyizonle ne mɔɔ bɛyɛle, mgbane mgbane mɔɔ bɛhanle, yɛɛ amgbu mɔɔ bɛzile Tumivolɛ Ɛdɛnkɛma menli ne la anwo ahatualɛ mɔɔ bɛbanyia ye la ɛne.

¹¹Ɛdɛnkɛma nee bɛ bali ye ɛsesebɛ. Ɔbazɛkye azɛlɛ ye azo awozonle ne mɔ amuala, na maanle maanle kɔsɔɔti bazonle ye wɔ bɛ azɛlɛ ne mɔ azo.

¹² Bɛdabɛ Sudanema noko, bɛbadɔ Ɛdɛnkɛma dadeɛ ne anloa.

¹³ Ɛdɛnkɛma badende ɔ sa ɛbɔ nu afoa nu na yeazɛkye Aselea, na Nenɛvɛ adɔ mgbane, zolɛ awe kɛ ɛsɛlɛ zo.

¹⁴Mboane, nlankɛ nee nane ngakyile, ɛkpɔtɛ nee ɛzonlɛ mɔ bava bɛ maanle ne azuamgbole ne mɔ ayɛ bɛ alaleɛ. Kpadule bavea azua ne mɔ anu, na bɛ ɛzunlɛ balielie nvɛnzɛlɛ ne mɔ anu, ɔluakɛ ye sida mbaka mgbunla ne mɔ anwo bala ɛkɛ.

¹⁵Suakpole ne mɔɔ memanle ɔ nwo zo, dwenlenle kɛ ɔ nwo ɛdɔ ye na ɔhanle kɛ, “Medame ɛne, awie bieko ɛnle ɛkɛ” la, ɛyɛ suadu bɔkɔɔ, yehakyi ɛleka mɔɔ nanemgbole da die bɛ ɛnwomenle a. Awie biala mɔɔ pɛ nuhua ɛkɛ la tea nu na ɔkpusu ɔ ti.