Read Nzema Zɛf 3 Bible Online

Zɛf 3 - Nzema bible

Zɛf 3

¹Munzule ɛha sua ne mɔɔ nzisima nee atuadelɛma mɔɔ anwo ɛnde la a wɔ zolɛ la.

²Bɛndie awie biala edwɛkɛ, yɛɛ bɛkyi bɛ nyunlu ɛhwilɛ. Bɛnva bɛ rɛle bɛnwula Ɛdɛnkɛma anu, yɛɛ bɛndwe bɛmbikye bɛ Nyamenle ne.

³Bɛ mgbanyima le kɛ awenade mɔɔ ɛlɛkpo la; bɛ ndɛnebuavolɛma le kɛ nɔɔzo bedi; bɛdi a bɛtu ɔ bo, mɔɔ aleɛ kahye la, ɛnee bie ɛnle ɛkɛ.

⁴Bɛ Nyamenle kpɔmanvolɛma le menli mgbane; bɛnli nɔhalɛ. Bɛ sɛlɛvolɛma fa evinli ka ɛleka nwuanzanwuanza ne, na bɛtietia mɛla ne azo.

⁵Noko Ɛdɛnkɛma mɔɔ de bɛ avinli la di pɛlepɛle, ɔnli ɛtane. Nwonlomɔ biala ɔkile ye pɛlepɛlelilɛ ne, yɛɛ ɔmaa alehyenlɛ kpalɛ to bɛ dahuu; noko akee menli agbamgbanvolɛ ne ɛnze nyiane deɛ holɛ.

⁶Yemɔti Ɛdɛnkɛma se, “Mebɔ maanle maanle megua, mebubu bɛ konle ɛleka ɛsesebɛ ne mɔ amuala. Memaa bɛ gua ne mɔ azo ɛdɔ mgbane, awie biala ɛnva zolɛ. Bɛ azuamgbole ne mɔ ɛbɔ; awie ko anga, kyɛkyɛ, awie ko bɔbɔ ɛnde zolɛ.

⁷Menganle kɛ, ‘Nɔhalɛ, ɔbazulo me na yealie me ndeanlɛ ne. Akee bɛnrɛzɛkye ye azua ne mɔ, nee mɔɔ meva memaa ye la amuala.’ Noko bɛmɛ, debie biala anu bɛbɔle mɔdenle kɛ bɛyɛ amumuyɛ.

⁸“Zɔhane ati bɛhendɛ me bɛmaa ɔhɔdwu kenle mɔɔ menwɔdwazo bɛ nwo zo la. Mebɔ kpɔkɛ kɛ meboɔboa maanle maanle kɔsɔɔti nee bɛ arelemgbunli anloa meawola me ɛya kpole ne meagua bɛ nwo zo. Ɔluakɛ me ɛya kpole ne senle ne bayela ewiade amuala yeamaa yeadɔ nzonle.

⁹“Mekɛ ne anu mebade me menli ne anloa meamaa bɛadendɛ ɛdendɛlɛ kpalɛ mɔɔ anwo te la, amaa bɛ muala bɛadea bɛavɛlɛ medame Ɛdɛnkɛma na bɛabɔ nu bɛazonle me.

¹⁰Bɛdabɛ mɔɔ bɛsonle me, me menli ne mɔɔ ɛzande la vi Sudan azule ne anzi lɔ bava bɛ azubɔlɛ ninyɛne arɛlɛ me.

¹¹Mekɛ ne anu bɛnrɛgua bɛ nyunlu aze kɛ bɛyɛle ɛtane bɛtiale me a, ɔboalekɛ mebaye bɛdabɛ mɔɔ bɛ nye die bɛ ngome bɛ kpoleyɛlɛ nwo la meavi bɛ avinli. Bɛnrɛha mgbole wɔ me boka nwuanzanwuanza ne azo ɛlɛ.

¹²Ɔluakɛ mebagyakyi menli mɔɔ bɛlɛ bɛ nwo aze na bɛ nwo dwo la. Bɛbakpondɛ ɛvealeka wɔ Ɛdɛnkɛma duma ne anu.

¹³ Yizilayɛma mɔɔ ɛha la ɛnrɛyɛ ɛtane; bɛnrɛbɔ adalɛ bɛnrɛbɛlɛbɛla awie mɔ, ɔluakɛ bɛbadidi na bɛala koonwu, awie ɛnrɛnwunlonwunla bɛ.”

¹⁴O Zayɔnoma, bɛdo edwɛne; O Yizilayɛma, bɛdea nu! Bɛmaa bɛ nye ɛlie na bɛva bɛ ahonle muala bɛli fɛlɛko, O Gyɛlusalɛmma!

¹⁵Ɛdɛnkɛma ɛye wɔ ndeanlɛ ne ɛvi ɛkɛ, yevoa wɔ kpɔvolɛma ne. Ɛdɛnkɛma, Yizilayɛ Belemgbunli ne, nee bɛ de; bɛnrɛzulo munzule bieko.

¹⁶Mekɛ ne anu bɛbaha bɛahile Gyɛlusalɛmma kɛ, “Zayɔn, mmasulo; mmamaa ɛ sa nu to.

¹⁷Ɛdɛnkɛma, wɔ Nyamenle ne, nee wɔ de; ɔle katakyie mɔɔ maa ɛdi konim a. Ɔ nye balie ɛ nwo fɛlɛkolilɛ nu, ɔbava ye ɛhulolɛ yeakpɔda wɔ monle; yeava edwɛndolɛ yeamaa ɔ nye alie ɛ nwo,

¹⁸kɛ awie mɔɔ ɛlɛto ɛkponle la.” Ɛdɛnkɛma se, “Mebakpa bɛ nwo munzule meagua, amaa awie andea bɛ wɔ nwolɛ.

¹⁹Mekɛ ne anu me nee menli mɔɔ sisile bɛ la bali. Mebalie abuburama, na meaboɔboa menli mɔɔ bɛmbu bɛ bie la anloa; mebahakyi bɛ anyiemgba ne ayɛlɛyelɛ, nee enililɛ wɔ ewiade ye amuala anu.

²⁰Mekɛ ne anu mebaboɔboa bɛ nloa, me nee bɛ ara sua nu; mebamaa menli kɔsɔɔti mɔɔ wɔ ewiade la ali bɛ eni aye bɛ ayɛlɛ, na bɛdabɛ Yizilayɛma bɛanwu kɛ meva bɛ anwonyia ne amuala merɛlɛ bɛ. Medame Ɛdɛnkɛma a mese a.”