Read Nzema Hag 1 Bible Online

Hag 1 - Nzema bible

Hag 1

¹ Mekɛ mɔɔ Pɛhyea Maanle Maanle Belemgbunli Dalayɛse lile ɛvolɛ nwiɔ wɔ ebia zo la, ye siane nsia ne azo, kenle ne mɔɔ lumua la, Ɛdɛnkɛma dendɛle hilele Nyamenle kpɔmanvolɛ Hagae. Hagae hanle nrɛlaleɛ ne hilele Dwuda amɛnlado ne, Hyialeteɛle ara Zɛlubabɛle nee Sɛlɛvolɛ Kpanyinli ne, Gyɛhɔzeedake ara Dwɔhyua.

²Ɔse, “Tumivolɛ Ɛdɛnkɛma se, ‘Menli ɛhye mɔ se mekɛ ɛtɛdwule mɔɔ bɛfa bɛsi Ɛdɛnkɛma Ɛzonlenlɛ Sua ne bieko a.’ ”

³Na Ɛdɛnkɛma dendɛle hilele Nyamenle kpɔmanvolɛ Hagae. Ɔse,

⁴“Na se mekɛ ɛdwu ɛdeɛ, mɔɔ ɔwɔ kɛ bɛmɛ bɛda azua nu, na bɛgyakyi Nyamenle Sua ne bɛmaa ɔyɛ ewula a?

⁵Zɔhane ati medame Tumivolɛ Ɛdɛnkɛma, mese: Bɛnlea kɛ bɛwie ye a.

⁶Bɛlua ma dɔɔnwo, na bɛbu ekyi bie; bɛdi debie, noko bɛ ko ɛnyi; bɛno nwanye, noko bɛmbo; bɛkeda ndanlɛ, noko bɛ nwo ɛnyɛ wuluwulu, yɛɛ mɔɔ die ahatualɛ la die ezukoa ne gua kodoku mɔɔ abo le tokule la anu.

⁷Medame Tumivolɛ Ɛdɛnkɛma, mese: Bɛnlea kɛ bɛwie ye a.

⁸Bɛhɔ awoka ne mɔ azo lɔ bɛhɔva mbaka bɛrazi sua ne, amaa me nye alie nuhua, na meala me anyunlunyia ne ali wɔ nuhua. Medame Ɛdɛnkɛma a mese a.

⁹“Bɛ nye la kɛ bɛ bɛyɔba kɛzo dɔɔnwo, noko ekyi bie a bɛnyianle ye a; eza mɔɔ bɛ nee ye rale sua nu la, membɔle menguale. Na medame Ɛdɛnkɛma, mebiza bɛ kɛ duzu ati ɔ? Ɔboalekɛ bɛgyakyi me sua ne bɛmaa yeyɛ ewula na bɛmɛ, bɛ nuhua ko biala anye ɛbolo ɛlɛsi sua ala nuhua.

¹⁰Ɛhye ati a ezule ɛndɔ na azɛlɛ ɛngye aleɛ ɛmmaa bɛ la.

¹¹Eza meyɛ kɛ ezule mmatɔ mbɔnza ne mɔ anu nee awoka ne mɔ azo ɔmaa bɛnyia ma fofolɛ, nwanye, nwole, yɛɛ debie biala mɔɔ azɛlɛ ne maa bɛ la, menli nee nyɛmoa nee bɛ sa anloa gyima biala.”

¹²Akee Zɛlubabɛle nee Dwɔhyua nee Yizilayɛma mɔɔ hale la amuala diele Ɛdɛnkɛma bɛ Nyamenle ne ane, na bɛlile ye edwɛkɛ ne mɔɔ Nyamenle kpɔmanvolɛ Hagae, mɔɔ Ɛdɛnkɛma bɛ Nyamenle ne zoanle ye manle ɔhanle ɔhilele bɛ la azo. Na menli ne zulole Ɛdɛnkɛma.

¹³Akee Ɛdɛnkɛma ɛbɔfoɔ ne, Hagae, hanle Ɛdɛnkɛma nrɛlaleɛ ne hilele menli ne. Ɔse, “Medame Ɛdɛnkɛma, me nee bɛ lua.”

¹⁴Na Ɛdɛnkɛma hanle Dwuda Amɛnlado Zɛlubabɛle, Sɛlɛvolɛ Kpanyinli Dwɔhyua, yɛɛ Yizilayɛma mɔɔ ɛha la kɔsɔɔti ahonle manle bɛrayɛle Tumivolɛ Ɛdɛnkɛma, bɛ Nyamenle ne Sua ne anwo gyima.

¹⁵Bɛbɔle ɔ bo wɔ siane nsia ne anu, kenle abulanwiɔ nee nna ne azo.