Read Nzema Hag 2 Bible Online

Hag 2 - Nzema bible

Hag 2

¹Mekɛ mɔɔ Maanle Maanle Belemgbunli Dalayɛse lile ɛvolɛ nwiɔ wɔ ebia zo la, ye siane nsuu ne anu, ye kenle abulanwiɔ nee ko ne azo, Ɛdɛnkɛma dendɛle hilele Nyamenle kpɔmanvolɛ Hagae.

²Ɔse, “Akee tendɛ kile Hyialeteɛle ara Zɛlubabɛle, Dwuda amɛnlado ne, Gyɛhɔzeedake ara Dwɔhyua, Sɛlɛvolɛ Kpanyinli ne, yɛɛ Yizilayɛma mɔɔ ɛha la amuala na biza bɛ kɛ:

³ Bɛdabɛ mɔɔ bɛha la, bɛ nuhua boni a nwunle sua ɛhye nee ye kɛnlɛma ne a? Na kɛkala kɛ bɛsi bɛnwu ye ɛ? Asoo ɔnle bɛ nye zo debie mgbane ɔ?

⁴Noko akee bɛzi ahonle, Zɛlubabɛle! Medame Ɛdɛnkɛma a mese a. Dwɔhyua, Gyɛhɔzeedake ara, Sɛlɛvolɛ Kpanyinli, bɛzi ahonle. Bɛzi ahonle, bɛdabɛ Yizilayɛma kɔsɔɔti mɔɔ bɛwɔ maanle ye anu la. Medame Ɛdɛnkɛma a mese a. Medame Tumivolɛ Ɛdɛnkɛma mese: Bɛyɛ gyima ne, na me nee bɛ lua,

⁵ kɛmɔ menvale membɔle bɛ ɛwɔkɛ wɔ mekɛ mɔɔ bɛvile Yigyibiti la. Me Sunsum ne nee bɛ de; bɛmmasulo.

⁶ “Ɔnrɛhyɛ biala, mebamaa anwuma, azɛlɛ nee nyevile akpusu bieko, medame Tumivolɛ Ɛdɛnkɛma a mese a.

⁷Eza mebakpusu maanle maanle ne mɔ meamaa bɛ anwonyia ne mɔ apɛ arali ɛke, na meamaa Ɛzonlenlɛ Sua ɛhye anu ayɛ kɛnlɛma kpalɛ, medame Tumivolɛ Ɛdɛnkɛma a mese a.

⁸Dwɛtɛ fufule le me ɛdeɛ, yɛɛ ezukoa nvutuke le me ɛdeɛ, medame Tumivolɛ Ɛdɛnkɛma a mese a.

⁹Amozi sua ɛdeɛ ne bayɛ kɛnlɛma kpole kpalɛ adɛla alumua ɛdeɛ ne, na ɛke yɛɛ mebamaa me menli ne akpazi a, medame Ɛdɛnkɛma a mese a.”

¹⁰Belemgbunli Dalayɛse lile ɛvolɛ nwiɔ wɔ ebia zo la, siane ngɔnla ne anu, ye kenle abulanwiɔ nee nna ne azo, Ɛdɛnkɛma dendɛle hilele Nyamenle kpɔmanvolɛ Hagae.

¹¹Ɔse, “Medame Tumivolɛ Ɛdɛnkɛma mese: Biza sɛlɛvolɛma ne mɔ maa bɛye kpuyia ɛhye anloa.

¹²‘Saa awie fa nane azinli mɔɔ le nwuanzanwuanza la gua ye tɛladeɛ nu, na ɔfa tɛladeɛ ne ɔka kpanwo, subue, nwanye anzɛɛ aleɛ ngakyile biala a, ɛnee aleɛ zɔhane anwo ɛde ɛyɛ nwuanzanwuanza ɔ?’ ” Sɛlɛvolɛma ne mɔ buale kɛ, “Kyɛkyɛ.”

¹³ Na Hagae bizale bɛ kɛ, “Saa awie mɔɔ ɛva ɔ sa ɛha funli na ɔ nwo ɛnde la fa ɔ sa ka ninyɛne ɛhye mɔ bie a, ɔmaa ɔyɛ aleɛ mɔɔ anwo ɛnde la ɔ?” Sɛlɛvolɛma ne mɔ buale kɛ, “Ɛhɛe, ɔyɛ aleɛ mɔɔ anwo ɛnde la.”

¹⁴Na Hagae zele bɛ kɛ, “Ɛdɛnkɛma se, ‘Zɔhane ala yɛɛ menli ɛhye mɔ nee maanle ɛhye de wɔ me nyunlu a, yɛɛ bɛ sa anloa gyima biala anwo ɛnde. Debie biala mɔɔ bɛfa bɛmaa kɛ bɛva bɛbɔ azu la anwo ɛnde.’ ”

¹⁵Ɛdɛnkɛma se, “Bɛdabɛ bɛdwenle bɛnwu mɔɔ bazi bɛ nwo zo, ɔvi ɛnɛ mɔɔ kɔ la. Mekɛ mɔɔ bɛkava bolɛ ko bɛado ko azo wɔ Ɛdɛnkɛma Ɛzonlenlɛ Sua ye ɛzilɛ nu la ɛnee kɛ bɛsi bɛde ɛ?

¹⁶Saa bɛkɔ bɛ ɛya nu kɛ bɛkava abɛlɛ mɔɔ to tone nu kilo ɛya nwiɔ la a, kilo ɛya ko a bɛnyia ye a. Saa bɛkɔ kɛ bɛkava nwanye litili ɛya ko a, abulanla a bɛnyia ye a.

¹⁷Menvale anwoma anu wuluwulu, adubue, yɛɛ ezuawolɛ menzɛkyele bɛ nee debie biala mɔɔ bɛyɛle la, noko bɛanzia bɛamba me nwo ɛkɛ.

¹⁸Bɛdwenle nwolɛ bɛvi ɛnɛ kenle ye mɔɔ le siane ngɔnla ye kenle abulanwiɔ nee nna la azo. Bɛdwenle nwolɛ bɛvi kenle ne mɔɔ bɛwulale Ɛdɛnkɛma Ɛzonlenlɛ Sua ne adiabo ne aze la azo.

¹⁹Asoo ma tɛbɔ bonwolo zo? Asoo bɛ vanye mbaka, feege mbaka, bɛ ma ne mɔɔ le kɛ akutue, yɛɛ bɛ ɔlivi mbaka ne mɔ ɛnzo ɔ? Ɔvi ɛnɛ mɔɔ kɔ la mebayila bɛ.”

²⁰Kenle ko ne ala, Ɛdɛnkɛma dendɛle hilele Hagae bieko.

²¹Ɔse, “Ka kile Dwuda Amɛnlado Zɛlubabɛle kɛ, ɔnrɛhyɛ biala mebakpusu anwuma nee aze,

²²na meabutubutu arelemgbunlililɛ nye aze. Mebazɛkye maanle maanle ne mɔ anwosesebɛ, meazɛkye bɛ konle ehwili ne mɔ nee menli mɔɔ ka la; bɛ mgbɔnwɔ nee menli mɔɔ ka mgbɔnwɔ ne mɔ la amuala badu agua, bɛdabɛ bɛ ngome bɛbapɛ bɛ nwo bɛahuhu bɛ nwo.

²³Mekɛ ne anu, medame Tumivolɛ Ɛdɛnkɛma mese, mebava ɛdawɔ Zɛlubabɛle, me akɛlɛ mɔɔ ɛ ze a le Hyialeteɛle la, na meayɛ wɔ kɛ belemgbunli kpɔdelera, ɔluakɛ mekpa nu meye wɔ, medame Tumivolɛ Ɛdɛnkɛma a mese a.”