Read Nzema Zɛk 1 Bible Online

Zɛk 1 - Nzema bible

Zɛk 1

¹ Mekɛ mɔɔ Maanle Maanle Belemgbunli Dalayɛse nyianle ɛvolɛ nwiɔ wɔ Pɛhyea ebia ne azo la, ye siane mɔtwɛ ne anu, Ɛdɛnkɛma rale Bɛlikaya ara Zɛkalaya, mɔɔ le Nyamenle kpɔmanvolɛ, na ɔ nlenya a le Yedo la anwo ɛkɛ

²na ɔzele ye kɛ, “Medame Ɛdɛnkɛma, menvale bɛ ze mɔ anwo ɛya kpole.

³Yemɔti ka kile bɛ kɛ, medame Tumivolɛ Ɛdɛnkɛma mese: Bɛzia bɛrɛla me nwo ɛke na medame mebazia meara bɛ nwo ɛkɛ, medame Tumivolɛ Ɛdɛnkɛma a mese a.

⁴Bɛmmayɛ kɛ bɛ ze mɔ, mɔɔ alumua Nyamenle kpɔmanvolɛma ne mɔ bɔle Tumivolɛ Ɛdɛnkɛma nrɛlaleɛ ne nolo hilele bɛ kɛ, ‘Bɛzia bɛ nzi bɛvi bɛ ninyɛndane nwo’ a bɛandie yɛɛ bɛanyɛ la.

⁵Bɛ ze mɔ zɔhane, bɛwɔ nienwu? Yɛɛ Nyamenle kpɔmanvolɛma zɔhane mɔ, asoo bɛtɛte aze?

⁶Noko me mɛla ne nee me ngyehyɛlɛ ne mɔ, mɔɔ menvale menzoanle me sonvolɛma kpɔmanvolɛma la ɛhyɛ ɛdɛla bɛ ze mɔ. Yemɔti bɛnlunle bɛ nwo na bɛhanle kɛ, ‘Kɛ Tumivolɛ Ɛdɛnkɛma zile hyehyɛle kɛ ɔ nee yɛ di wɔ yɛ ndenle nee yɛ nyɛleɛ ne mɔ ati la, zɔhane ala yɛɛ ɔ nee yɛ ɛli a.’ ”

⁷Mekɛ mɔɔ Pɛhyea Maanle Maanle Belemgbunli Dalayɛse nyianle ɛvolɛ nwiɔ wɔ ebia zo la, ye siane bulu nee ko ne mɔɔ bɛfɛlɛ ye Hyibate la, ye kenle abulanwiɔ nee nna ne azo, Ɛdɛnkɛma dendɛle hilele Bɛlikaya ara Zɛkalaya mɔɔ ɔ nlenya a le Yedo la, na Zɛkalaya hanle kɛ,

⁸ “Nɔe ne, menwunle kɛ nrenya bie de ɛkpɔnwɔ kɔkɔlɛ zo. Menwunle kɛ ɔgyi ‘mɛtele’ mbaka bie anu wɔ bɔnza bie anu, na ɔ nzi ɛkɛ ne, mgbɔnwɔ kɔkɔlɛ, ndetandeta, yɛɛ fufule gyigyi ɛkɛ.

⁹Na membizale ye kɛ, ‘Me menle, na ɛhye mɔ noko ɛ?’ “Nyamenle soanvolɛ ne nee me dendɛle na ɔzele me kɛ, ‘Mebahile wɔ deɛ holɛ ko mɔɔ bɛde la.’

¹⁰Na nrenya ne mɔɔ gyi ‘mɛtele’ mbaka ne mɔ avinli la buale kɛ, ‘Ɛhye mɔ a Ɛdɛnkɛma ɛzoa bɛ kɛ bɛrakpɔla azɛlɛ ye la.’

¹¹“Na bɛbuale Nyamenle soanvolɛ ne mɔɔ gyi ‘mɛtele’ mbaka ne mɔ avinli la kɛ, ‘Yɛkpɔla aleɛabo amuala, na yɛnwu kɛ ewiade ye amuala ɛlɛdie ye ɛnwomenle.’

¹²“Na Nyamenle soanvolɛ ne hanle kɛ, ‘O Tumivolɛ Ɛdɛnkɛma, kenlenzu yɛɛ ɛkɛnwu Gyɛlusalɛm nee Dwuda azuamgbole ne mɔ mɔɔ wɔva bɛ nwo ɛya toonwo ɛvolɛ abulasuu ye anu la anwunvɔne a?’

¹³“Ɛdɛnkɛma vale ɛlolɛ nee arɛlekyekyelɛ edwɛkɛ buale Nyamenle soanvolɛ ne mɔɔ nee me dendɛle la.

¹⁴Na Nyamenle soanvolɛ ne mɔɔ nee me dendɛle la hanle hilele me kɛ, ‘Tea nu ka kɛ, Tumivolɛ Ɛdɛnkɛma se: Metwe Gyɛlusalɛm nee Zayɔn anwo nungule kpole kpalɛ.

¹⁵Meva maanle maanle ne mɔ anwo ɛya kpole kpalɛ kɛ bɛmɛ bɛ nwo ɛdɔ bɛ a. Ɔluakɛ saa mame meva me menli ne anwo ɛya ekyii bie a, akee bɛmɛ bɛmaa munzule ne ɛyɛ kpole.

¹⁶Zɔhane ati medame Tumivolɛ Ɛdɛnkɛma mese, mezia mera Gyɛlusalɛm, na me nee anwunvɔnezelɛ a ɛra a. Bɛbazi me Sua ne wɔ zolɛ, na bɛbava ɛzuzudeɛ ne bɛado Gyɛlusalɛm anwo.’

¹⁷“Eza Nyamenle soanvolɛ ne zele me kɛ, ‘Tea nuhua bieko ka kɛ: Medame Tumivolɛ Ɛdɛnkɛma mese, me azuamgbole ne mɔ azo bayɛ gbudugbudu bieko. Menli ne bakpazi, na medame Ɛdɛnkɛma mebakyekye Zayɔn arɛle bieko na eza meakpa nu meaye Gyɛlusalɛm.’ ”

¹⁸Akee memanle me nye zo na menwunle mɛne nna.

¹⁹Na membizale Nyamenle soanvolɛ ne mɔɔ nee me dendɛle la kɛ, “Duzu a le ɛhye mɔ?” Ɔbuale me kɛ, “Ɛhye mɔ a le mɛne ne mɔ mɔɔ ɛbɔ menli mɔɔ wɔ Dwuda, Yizilayɛ, yɛɛ Gyɛlusalɛm la asande la.”

²⁰Akee Ɛdɛnkɛma hilele me dwinvolɛma nna.

²¹Na membizale kɛ, “Na ɛhye mɔ ɛlɛba arayɛ duzu?” Ɔbuale me kɛ, “Ɛhye mɔ a le mɛne ne mɔɔ bɔle Dwudama asande mɔɔ yemɔti awie angola ammaa ɔ ti zo la. Na dwinvolɛma ɛhye mɔ ɛra kɛ bɛbanwunlonwunla bɛ, na bɛazɛkye maanle maanle ne mɔ mɔɔ dwazole Dwuda anwo zo kɛ bɛsɛkye ye la tumi ne.”