Read Nzema Zɛk 10 Bible Online

Zɛk 10 - Nzema bible

Zɛk 10

¹Bɛbiza Ɛdɛnkɛma kɛ ɔmaa ezule ɛdɔ wɔ nyenyensuo mekɛ nu. Ɛdɛnkɛma a maa anwomanyunlu yɛ dukuduku na ɔtɔ ezule ɔmaa menli, na ɔmaa awie biala egyinli kye a.

²Mmonle ananze ne mɔ ka ngoaseasɛm, ngonyiama bɔ adalɛ, yɛɛ menli mɔɔ ka ɛlalɛ la nwu adalɛ yekile, bɛfa bɛbɛlɛbɛla awie mɔ kɛ bɛfa bɛakyekye bɛ rɛle. Zɔhane ati menli ne duolua nuhua kɛ mboane; bɛnwu amaneɛ, ɔboalekɛ bɛnlɛ neavolɛ.

³Ɛdɛnkɛma se, “Meva mboaneneavolɛma ne mɔ anwo ɛya kpole, na mebadea mgbanyima ne mɔ. Ɔluakɛ medame Tumivolɛ Ɛdɛnkɛma mebanlea me mboane ne, mɔɔ le Dwuda abo zo amra ne, na mebayɛ bɛ me konle mgbɔnwɔ mɔɔ anwo yɛ ɛzulolɛ a.

⁴Bɛ nuhua yɛɛ menli vi bara arabu maanle ne, arayɛ maanle mgbanyima nee safohyenlema na bɛazie me menli ne a.

⁵Bɛbɔ nuhua a, bɛbayɛ menli anwo ɛzulolɛ wɔ konle nu, bɛatietia bɛ agbɔvolɛ nwo zo wɔ guabile ne mɔ azo. Bɛbaho ɔboalekɛ Ɛdɛnkɛma nee bɛ lua, na bɛbali kpɔvolɛ konlema ne mɔɔ ka mgbɔnwɔ la anwo zo konim.

⁶“Mebamaa Dwudama anwo ayɛ se, yɛɛ mebalie Dwosefi sua nu amra. Mebanwu bɛ anwunvɔne, na me nee bɛ kɔsɔɔti azia ara sua nu. Bɛbayɛ kɛ asɛɛ metɛkpole bɛ, ɔluakɛ medame a mele Ɛdɛnkɛma bɛ Nyamenle ne a, mebadie bɛ nzɛlɛlɛ.

⁷Yifelaemma bayɛ kɛ katakyiema, na bɛali fɛlɛko kɛ menli mɔɔ ɛnlo nza la. Bɛ mra banwu ye na bɛ nye alie, na bɛali fɛlɛko wɔ mɔɔ Ɛdɛnkɛma ɛyɛ la anwo.

⁸“Mebavɛlɛ bɛ na meaboɔboa bɛ nloa, ɔluakɛ melie bɛ, na bɛ nwo bazo kɛ dɛba ne la.

⁹Mendele bɛ memkpondenle maanle maanle avinli bɔbɔ ɛdeɛ, noko wɔ moa moa maanle ne mɔ anu lɔ, bɛbahakye me, na bɛ nee bɛ mra bɛbadɛnla ngoane nu na bɛazia bɛara.

¹⁰Me nee bɛ vi Yigyibiti nee Aselea bazia ara sua nu. Mebava bɛ meahɔgua Geleade nee Lɛbanɔn azɛlɛ zo, bɛbava azɛlɛ ne amuala, noko ɔnrɛza bɛ.

¹¹Bɛbalua ngyegyelɛ nyevile nu, na medame Ɛdɛnkɛma, mebabɔ nyevile azɛlɛkye ne mɔ, na Azule Naele ne basesa, awe resee. Aselea adubɛnloanu ne baha aze, na Yigyibiti tumi ne bavi ɔ sa.

¹²Medame Ɛdɛnkɛma me ti, mebamaa bɛ nwo ayɛ se; bɛbazonle me na bɛadie me ne.” Ɛdɛnkɛma a ɛdendɛ a.