Read Nzema Zɛk 11 Bible Online

Zɛk 11 - Nzema bible

Zɛk 11

¹O Lɛbanɔnoma, bɛbukebuke bɛ nlenkɛ ne mɔ, amaa senle ne ayela bɛ sida mbaka ne mɔ!

²Sepelɛse mbaka, bɛzu bɛye awolɛ, na sida mbaka ngɛnlɛma ne mɔ ɛzɛkye! Beehyan oku mbaka, bɛzu bɛye awolɛ, ɔluakɛ bɛzo kpɔkɛmile ne bɔkɔɔ!

³Bɛdie, mboaneneavolɛma ɛlɛsu ye awolɛ, ɔluakɛ bɛ anyunlunyia ɛdɔ aze! Bɛdie, awenade ne mɔ ɛlɛkpo, ɔluakɛ Dwɔdan kpɔkɛmile ne ɛhakyi ɛsɛlɛ!

⁴Ɛdɛnkɛma me Nyamenle ne zele me kɛ, “Yɛ mboane ne mɔ mɔɔ bɛ nee bɛ ɛlɛkɔ ahunleɛ la neavolɛ.

⁵Menli mɔɔ tɔ la ku bɛ fa bɛ nwo dwɔɔ kɔ, awie ɛnze bɛ ɛhwee, yɛɛ menli mɔɔ tɔne bɛ la ka kɛ, ‘Ayɛlɛyelɛ ɛha Ɛdɛnkɛma, menyia me nwo;’ yɛɛ bɛ neavolɛma mumua ne ɛnze bɛ anwunvɔne.”

⁶(Ɛdɛnkɛma zele kɛ, “Medame menrɛze awie biala anwunvɔne wɔ azɛlɛ ɛhye azo. Nea, mebamaa menli adɔ; ko biala badɔ ye mboaneneavolɛ ne asa anu, na ye mboaneneavolɛ ne adɔ ye belemgbunli ne asa anu, bɛava bɛazɛkye azɛlɛ ye, na menrɛlie biala.”)

⁷Yemɔti menyɛle mboane ne mɔ mɔɔ bɛ nee bɛ ɛlɛkɔ ahunleɛ bɛamaa menli mɔɔ di mboane awule gua la neavolɛ. Menvale agbɔma nwiɔ; mendonle ko “Ɛlolɛ” yɛɛ ko ne noko mendonle ye “Koyɛlɛ”.

⁸Akee menyɛnenle mboane ne mɔ. Siane ko anu, menzɛkyele mboaneneavolɛma nsa. Me kunlu andwo bɛ nwo fee, yɛɛ bɛdabɛ noko bɛangulo me edwɛkɛ.

⁹Yemɔti menganle kɛ, “Menrɛyɛ bɛ neavolɛ. Mɔɔ ɔwɔ kɛ ɔwu la, bɛmaa ɔwu; mɔɔ ɔwɔ kɛ bɛsɛkye ye la, bɛzɛkye ye na bɛgyakyi bɛdabɛ mɔɔ bɛha la bɛmaa bɛdabɛ bɛ ngome bɛkeka bɛ nwo ngoko ngoko bɛli.”

¹⁰Akee menvale me kpɔma ne mɔɔ medo ye “Ɛlolɛ” la na membubule nu, menvale menzɛkyele ngyekyeleɛ ne mɔɔ me nee maanle maanle ne mɔ ɛkyekye la.

¹¹Yemɔti mentulule ngyekyeleɛ ne kenle ko ne, na nwule ne mɔ mɔɔ di mboane gua, mɔɔ ɛnee ɛlɛnea me la nwunle kɛ ɔle Ɛdɛnkɛma anloa edwɛkɛ.

¹² Akee menganle mengilele bɛ kɛ, “Saa bɛdabɛ bɛnea na ɔle kpalɛ a, ɛnee bɛdua me kakɛ, na saa bɛnea na ɔnle kpalɛ a, ɛnee bɛmaa ɔha.” Na bɛduale me dwɛtɛ fufule abulasa.

¹³Ɛdɛnkɛma zele me kɛ, “Fa kɔgua Ɛzonlenlɛ Sua ne gya ne anu.” Yemɔti menvale dwɛtɛ fufule ne, ezukoa kpole ne mɔɔ bɛdua bɛmaa me la mengɔnguale Ɛdɛnkɛma Ɛzonlenlɛ Sua ne gya ne anu.

¹⁴Akee membubule me kpɔma ne mɔɔ tɔ zo nwiɔ, mɔɔ medo ye “Koyɛlɛ” la anu mengilele kɛ mezɛkye mediemayɛlɛ mɔɔ la Dwuda nee Yizilayɛ avinli la.

¹⁵Akee Ɛdɛnkɛma zele me kɛ, “Eza fa mboaneneavolɛ ninyɛne mɔɔ ɛnzonle bolɛ la.

¹⁶Ɔluakɛ nea, melɛmaa mboaneneavolɛ bie mɔɔ ɛndwenle mboane mɔɔ ɛlɛwu la anwo, ɔmkpondɛ mɔɔ ɛminli la, ɔnyɛ mɔɔ ɛboda la ayile, yɛɛ ɔmmaa mɔɔ te kpɔkɛ la aleɛ la ara. Ye ɛdeɛ ne a le kɛ, ɔbali mboane ne mɔ mɔɔ ɛlɔ la, yeafufo bɛ mbowule nu.

¹⁷Me mboaneneavolɛ mgbane zɔhane, mɔɔ kpo me mboane ne mɔ la, ye gyakɔ! Bɛbapepɛ ɔ sa wɔ konle nu na bɛadu ɔ nye fema ne. Ɔ sa badwe, yɛɛ ɔ nye fema ne bazi bɔkɔɔ.”