Read Nzema Zɛk 12 Bible Online

Zɛk 12 - Nzema bible

Zɛk 12

¹Ɛdɛnkɛma nrɛlaleɛ mɔɔ fane Yizilayɛma anwo la ɛne: Ɛdɛnkɛma mɔɔ bɔle anwuma, ɔbɔle azɛlɛ, na ɔbɔle sonla sunsum mɔɔ wɔ ye nu la se,

²“Mebayɛ Gyɛlusalɛm kɛ kɔpo mɔɔ nwanye ɛyi ye tɛkɛɛ la; maanle maanle mɔɔ zuozua ye la baranlo bie na bɛabo kɛ tandi. Saa bɛfa ɛlɔnema bɛbabɛnra bɛyia Gyɛlusalɛm a, ɛnee bɛbɛnra bɛyia Dwuda azuamgbole kɔsɔɔti noko.

³Mekɛ ne anu, mebamaa Gyɛlusalɛm ayɛ kɛ bolɛ ɛnlomboɛ yeamaa maanle maanle ne mɔ. Bɛdabɛ mɔɔ bɛkɛbɔ ɛhɔne kɛ bɛmaa ye zo la babodɛboda. Azɛlɛ ye azo maanle maanle kɔsɔɔti baboɔboa bɛ nloa atia ye.

⁴Mekɛ ne anu, medame Ɛdɛnkɛma mese, mebamaa ɛkpɔnwɔ biala anye zo ada ye na mɔɔ ka la agyibi. Na Dwudama ɛdeɛ, saa memaa maanle maanle ne mɔ mgbɔnwɔ ne mɔ anye si a, mebabuke me nye na meanlea bɛ.

⁵Na akee Dwuda mbusua ekpulike ekpulike ne mɔ baha ahile bɛ nwo ngoko kɛ, ‘Tumivolɛ Ɛdɛnkɛma, bɛ Nyamenle ne ati, Gyɛlusalɛm lɛ anwosesebɛ.’

⁶“Mekɛ ne anu mebamaa Dwuda mbusua ekpulike ekpulike ne mɔ adɔlɔ woonwu kɛ siase mɔɔ gyi senle zo wɔ mbaka avinli, bɛayɛ kɛ tɛkɛ mɔɔ la nya avinli ɛlɛsɔ la. Bɛbazɛkye menli mɔɔ wɔ bɛ bɛne zo nee bɛ fema zo la amuala, na Gyɛlusalɛmma ɛdeɛ, bɛbadɛnla bɛ bo zo ne ala, wɔ Gyɛlusalɛm.

⁷“Medame Ɛdɛnkɛma, mebamaa Dwuda ɛlɔnema alumua ali konim, amaa Devidi abo zo amra nee Gyɛlusalɛmma annyia bɛ nyunlu andɛla Dwudama.

⁸Mekɛ ne anu mebawowa Gyɛlusalɛmma, amaa mɔɔ anwo ɛngyinla ye fee bɔbɔ wɔ bɛ avinli la anwo ayɛ se kɛ Devidi. Devidi abo zo amra bayɛ kɛ Nyamenle; bɛbayɛ kɛ Ɛdɛnkɛma soanvolɛ bɛali menli ne ati.

⁹Na mekɛ ne anu maanle biala mɔɔ kɛra Gyɛlusalɛm anwo zo la, mebazɛkye ye.

¹⁰ “Mebamaa Devidi abo zo amra ne nee Gyɛlusalɛmma aze anwunvɔne dɔɔnwo, na bɛanyia sunsum mɔɔ bɛfa bɛyɛ nzɛlɛlɛ la, amaa bɛnea sonla mɔɔ bɛboda ye la a bɛali nyane bɛamaa ye, kɛmɔ sonla su ɔ ra nrenya kokye mɔɔ ɔlɛ na ɔkɛwu la; bɛbazu ye kɛ sonla mɔɔ ye belamunli ralɛ kɛwu na ɔlɛsu ye la.

¹¹Mekɛ ne anu nyanelilɛ mɔɔ bara Gyɛlusalɛm la bayɛ kɛ nyane ne mɔɔ bɛlile wɔ Heedadelemɔn mɔɔ wɔ Mɛgedo fienemgbole nu la.

¹²Nyanelilɛ bara maanle ne anu amuala. Abusua ekpulike ko biala ɔdaye ɔ ngome ɔbali ye nyane ɛdeɛ. Devidi abo zo amra, Neetan abo zo amra, Livae abo zo amra, Hyemɛyae abo zo amra, yɛɛ mbusua ekpulike ekpulike mɔɔ ɛha la amuala bali nyane bɛ ti bɛ ti, abusua ekpulike ko biala anu mrenya bali bɛ nyane ɛdeɛ ngome na bɛ mraalɛ noko ali bɛ nyane ɛdeɛ ngome.